احبتي اسعد الله اوقاتكم بكل محبه اضع هذه القصيده وقصتها الطريفه بين يديكم واتمنى ان تحوز على رضاكم
كنت في المطار ابي اسافر ولفت انتباهي رجال كبير سن كان مشغول بجواله يعزم ويلزم على ناس وباين عليه انه راعي كرم ومن لهجته اتضح لي انه شمري ركبنا الطياره وكانت مقاعدنا متجاوره وكنا في اول صف بعد الدرجه الاول وشاف المضيف بيده الدله وقام يمدحه يوم قرب المضيف عندنا سحب الستاره بيننا وبين الدرجه الاول قال الشايب بكل عفويه عوذه وش هالطبع الاقشر وحبيت اني امازحه بها القصيده مع العلم اني ما عرفه واتمنى انها توصل له 00
فنجالهم يالخال ماهو شفاقه =لا رخو ستايرهم بوجه الرجاجيل
والي دفع فرق التذاكر وساقه = بالصف الاول له حفاوه و تبجيل
كرسي وسيع ولف ساقه لساقه = وبنتاً تحوفه بالعطر والمناديل
ولأهل السياحي بالضيافه علاقه = وكلن على قرشه يجد المحاصيل
الضيق بالمركب وراعي الياقه = من ضيق كرسيه يشوف البهاذيل
ماحسبو لك وانت راعي لباقه = وماقدرو فزتك للبن والهيل
انا ادري انك زبن كل الرفاقه = وانا ادري انك بالكرم تذبح الحيل
وشلون لا لا وانتم اهل السباقه= ( شمر ) رجال الضلع زبن المداخيل
وهذا نظام الطائره والاناقه =حتى بصبتهم تشوق التهاويل
لا ينشغل فكرك تراها ذواقه = ونبي نوقع وامر ربك تساهيل
صدفه تجاورنا برقم البطاقه = وحنا ترانا للمجاور هماليل
نعطيه من نبع المحبه صداقه =ونمد له يمنى الموده بتسهيل
الطيب فينا عاشقينه عشاقه = من جدنا وايل ولا فيه تبديل
نكرمك في بيتاً فتحنا رواقه = وتلقى به الدله وصفر المعاميل
فينا الكرم والله ملكنا وثاقه =والي يجينا نسبقه بالتهاليل
بخورنا خالط طيابه زراقه = غالي نسوقه للرجال الحلاحيل
ربعي ترى مثل المطر بندفاقه = والذ من نبع الجبل والشخاليل
ويالعود انا بحراً شديد اصطفاقه = لا شدني الموقف اجيبه بتفصيل
بفنجال بن وتمرتاً واغتباقه = اعد قصتنا بزين التعاليل
ذا الي حصل والقلب يا ناس عاقه = فزة كبير السن لصوت الفناجيل
وتقبلو تحياتي
14/12/06, (01:34 AM)
؟؟قهوة الطياره ؟؟؟
.. تلــقــى الرعــايه والــكرم اللي تقوولون عنه .. 
العرض العادي
