ياللي جرحت القلب بإيدك وانا اشوف"="حرام قلبك ليه مابه مرافه
ارحم جريحٍ طاح وبحالته روف"="اللي حياته لجل فرقاك عافه
تركتني في ظلمة الخوف مكسوف"="والبستني ثوب الشقا والكسافه
يابو جديلٍ فوق الامتان منسوف"="تلحق على روس الشطايا ضفافه
وعيون سود وخد ونهود وردوف"="واليا ابتسم تجذب عيوني رهافه
وجسمٍ حسين الطول والخصر منحوف"="عليه من تفصيخ ثوبه كلافه
والورك والفخذين والساق ملفوف"="والوجه ناعم ما شتكا من جفافه
ادعج غنج بالملح والزين موصوف"="من ينهبه يملك عذر لختطافه
في حب ذاك الزين مغرم ومشغوف"="اللي جمع بين الجمال وعفافه
تبدأ حياتي ليل لي كان مزفوف"="ونهايتي ليله لغيري زفافه
واوجد حالي وجد من جيب مكتوف"="وحطوه في سجنه وشدّو كتافه
مطلوب دم ولحظة الجرم مشيوف"="واخو القتيل اللي له الثار شافه
ومن جيب للتحقيق بادوه بكفوف"="وسجل بتقرير السجون اعترافه
عليك ياللي لجلك الدمع مذروف"="دمعي على فرقاك زاد انذرافه
أنا على لقياك يانوف ملهوف"="والقلب هم الود والبعد لافه
بالقلب من فرقاك هاجس ولافوف"="يزود مع زايد جفاك التفافه
صارن دقاته لهن رجف ورجوف"="زود الجفا والصد زاد ارتجافه
يا نوف باسمك صرت ألبي وانا اطوف"="وكلٍ يلبي للولي في طوافه
هم يرتجون الله وانا ارجيك يانوف"="أرجيك أنا رغم ابتعاد المسافه
ارجيك رجوى اللي مع الموج مجروف"="والموج حطم مركبه بانجرافه
في ليل مظلم واعتلى فوقه الطوف"="واطلق عنان الصوت باخر مطافه
سوي ولو مره بدنياك معروف"="تماكني قلبٍ بدابه تلافه
أجاوب النايح ليا ناح برفوف"="وأقنب كما ذيبٍ عنا الجوع حافه
روفي بحال اللي طعنتيه بالجوف"="اللي على شانك حلا النوم عافه
أعفي عن اللي بين أياديك موقوف"="فكي قياده واسمحي بانصرافه
وردي علي وبددي ظلمة الخوف"="لا تتركيني في هوان ومخافه
وان ما رجعتيلي فانا اموت يانوف"="ولا على دنياي بعدك حسافه
28/09/05, (07:56 AM)
الشاعر المرحوم (باذن الله) منصور بن سعدي الرمالي وقصيدة( يانوف)
العرض العادي
