اخواني واخواتي في ويلان ..
السلام عليكم ورحمة الله وبركاته
كل عام وانتم بخير
ظروف الحياة اشبه بدوامة لا تنتهي حرمتنا اللقاء بكم منذ زمن واليوم احضر هنا واتمنى ان يكون ويلان واهله في تمام الصحة والعافية ..
المقاطع الشعرية أقل من سبعة ابيات لذلك لا تسمى قصائد وهنا احببت ان اشارك بعدد من المقاطع الشعرية التي كتبتها في فترات متفاوتة آملا ان تحوز على اعجابكم ..
( 1 )
خلوه يذبح ويصلخ لا تردونه=دامه مصمّل وخوف الله ماهمّه
بضاعته من بنوك الكذب مشحونه=ولا ناقص من حلالي شي من ذمّه
لي طبعي ولوني ..وله طبعه ولونه=وما شرهة الناس يمي مثلها يمّه
من يتبع هروج خلق الله يبذّونه=والناس ماادرك رضاها صفوة الامّة
من يضلل الله كيف الناس يهدونه؟=حتى الرسول المطهّر ماهدى عمّه
( 2 )
عشنا بها والروس متعلية فوق=ونموت وأرض الذل ما نفترشها
حلوقنا لو حولها للزمن طوق=نصارع ظروف الزمن ونغرشها
لا نقبل الخنعة ولا نعرف البوق=امّا كلينا هبرها ما نعرشها
والادمي لا صار مستور مرزوق:=باقي السوالف حظ من هو قرشها
وانا يابو ناصر ولو مسني عوق=اسوقها يم العلا واخرشها
اخذت من دنياي مسات وطقوق=وشفت العروش اتطيح باللي عرشها
( 3 )
شبيت ضوك وانت دايم مطفيه=وكبرّت بيبانك ولا احدِ دخلها
تفتح على نفسك طريق المشاريه=وعيون خلق الله عليك تعدلها
تطيب مرة مير تبلش بتاليه=والمرجلة ماكل رجل احتملها
شوك النحل لا بد ما يصيب راعيه=ومن مااحتملها كيف يجني عسلها
الطيب نوبة كل واحد يسويه=أما العوايد مالها غير اهلها
باكر يعود كل سيل لمجاريه=ومن له طبيعة ما يدور بدلها
( 4 )
لو الردى ذنب تغطيه توبه =كل الاوادم يذنبون ويتوبون
مير الردي يلبس من العيب ثوبه=واهل الردى من شين الافعال يكسون
يبقى باسم راعيه لو كان نوبه=وينسى ولكن الاوادم ما ينسون
لو كان يستغفر لسابق ذنوبه=الله يسامح مير خلقه يعيون
( 5 )
مابيك يا مجلس هلابيس وختوش=مغنيني الله عن قهوته وشاهيه
لوهو بزل إيران مكسي ومفروش=ولو كثرت دلاله وكبرت مراكيه
مادام مابه غير ناقص ومربوش=يتيه من جالس هل الغي والتيه
مااجالس الا كل طيب ومدغوش=وعرق الردي لو زخرف البيت ما اجيه
وسلامتكم جميع
10/11/12, (01:50 AM)
خمسة مقاطع شعرية ..
العرض العادي
