نيابةٍ عن يام والشيخ راكان؟؟ - °~*¤®§(§ شبـــكة ويــلان العـربـيـه §)§®¤*~ˆ°

**سالم بن جخير** · 17/09/05, (10:11 AM)

السلام عليكم ورحمة الله وبركاته

اخواني يعلم الله ان لقبيلة عنزه غلا بصدري لايعلمه الا الله
وهذا شجعني ان اتواجد بينكم وهذا يشرفني
ولا انسى ان اشكر الاعلامي القدير عبدالله الثابت على دعوته
واتمنى ان اكون عند حسن الظن
هذه اولى مشاركاتي وهي مرثيه في الملك فهد بن عبدالعزيز رحمه الله
ومبايعه لخادم الحرمين الشرفين الملك عبدالله وولي عهده الامير سلطان والى الاسره المالكه بشكل عام

صلوووو على النبي

اعوذ بالرحمن من كل شيطان = ومن الغدر ومن الحسد والعمايل
والى ابتدى ليل القصايد والالحان = بديت واشفيت النفوس الغلايل
وانا ماشوش الا على صهلة حصان = وعلى عزاوي ناقضات الجدايل
مانيب اخوض الحرب في كل ميدان = الين يشعفني صهيل الاصايل
الله خلق لي فكر وعيون ولسان = اقدر اميز واتكلم واخايل
نيابةٍ عن يام والشيخ راكان = وقفت امثل لي شعوب وقبايل
وذبيت في راس الطويلة مسيان = والحيل مامن حيل والدمع سايل
ومن البكا سالت ملازم ووديان = وحتى الطويله من دموعي تهايل
وبكوا على صوتي شغاميم نجران = وبكوا على صوتي شغاميم حايل
عليك ياعز العروبه اكحيلان = عز العرب رمز الوفا والجمايل
ملك ومتواضع وللعز عنوان = حذفك بعيد وشبر يمناك طايل
اسمك الحاله يرجح بكل ميزان = وذكرك مابين الناس صايل وجايل
من لا انجبت مثلك على مر الازمان = احسن لها تبقى على طول حايل
ومن لا نهج نهجك على سنان وعنان = ماظنتي يدعى صبي الصمايل
تركتنا في عز في امن وامان = وانعام ماتحصى وخير وفضايل
موتك فجيعه حلت بكل الاوطان = من هولها شفنا نجوم القوايل
يومٍ بدى مظلم تباشيره احزان = تقول في يوم الحشر والهوايل
لكن عزانا في هل العز والشان = اخوان نوره مقُدم اعيال وايل
العزوه اللي لكتسى الجو دخان = افعالهم تلغي جميع الفعايل
نرسل عزانا صوب ذربين الايمان = ونجدد البيعه بكل الوسايل
ونرفع يدينا كلنا سر واعلان = وندعي لهم بالفرض والا النفايل
على العهد باقين انصار واعوان = ماخانوا العشره اعيال الحمايل
ماعندنا باير وكاذب وخوان =نصدق مثل صادق حقوق المخايل
لعيون (عبد الله) ولعيون (سلطان) = ناقف ونردع كل غازي وعايل
هذي عوايدنا مقلع وخبلان = والى نوينا يعتدل كل مايل
ناتي كذا خبلان صقهان عميان = ونذود دون معوبسات الشمايل
حنا نهار الضيق رئاسة اركان = حنا الكتايب واللوا والفصايل
حنا لقادتنا محازم وفرسان = ضد الغدر ضد الجهل والتحايل
من عهدنا الاول الى عهدنا الان = وحنا على نهج الجدود الاوايل
والحكم لال سعود والضد خسران = وعندي على قولي شهود ودلايل
ومن لا اعتبر يقلط على السيف شامان = وماله عن الموت المحقق بدايل
اقولها من قلب يغشاه الايمان = واعيدها لاقيل ويش انت قايل ؟
وان ودع بليهان ياتي بليهان = وحنا بامن وامان والشك زايل

**عبدالله ثويني المانع** · 17/09/05, (11:35 AM)

أخي/ سالم بن جخير

حياك الله بين اخوانك ويا هلا وغلا . لنا الشرف بانضمامك لهذا الصرح الشامخ

ومشاعرك النبيله تسعدنا .

صح لسانك على هذه القصيده الرائعه.. احساس صادق وجميل

رحم الله ملكنا وأسكنه فسيح جناته

وأدام الله عز خادم الحرمين الشريفين الملك عبدالله بن عبد العزيز وولي عهده

تقبل خالص الود
دمت بخير

**محمدعوادالعنزي** · 17/09/05, (11:49 AM)

الاخ// سالم بن جخير

اسعدالله اوقاتك بكل خير...

وصح الله السانك وبيض الله وجهك...

ورحمه الله ملكنا خادم الحرمين الشريفين

وتقبل خالص الود0والاعجاب

اخوك//محمدعوادالعنزي

**صالح الضويحي** · 17/09/05, (01:13 PM)

الله خلق لي فكـر وعيـون ولسـان
اقـدر امـيـز واتكـلـم واخـايـل
نيابـةٍ عـن يـام والشيـخ راكـان
وقفت امثـل لـي شعـوب وقبايـل
وذبيت فـي راس الطويلـة مسيـان
والحيل مامن حيـل والدمـع سايـل
ومن البكا سالـت مـلازم ووديـان
وحتى الطويله مـن دموعـي تهايـل
وبكوا على صوتي شغاميـم نجـران
وبكوا على صوتـي شغاميـم حايـل
عليـك ياعـز العروبـه اكحيـلان
عز العرب رمـز الوفـا والجمايـل
ملـك ومتواضـع وللعـز عنـوان
حذفك بعيـد وشبـر يمنـاك طايـل
اسمك الحاله يرجـح بكـل ميـزان
وذكرك مابين الناس صايل وجايـل

الاخ الشاعر

مرحبا بك واهلا وسهلا

اسعدنا تواجدك ونتشرف بك وامثالك من الاوفياء

نيابـةٍ عـن يـام والشيـخ راكـان
وقفت امثـل لـي شعـوب وقبايـل

والنعم بك وبمن تمثل 0وفيت وكفيت لاهنت ولاهان مقدارك

قصيدة تمثل مشاعر الجميع وتتحدث بلسان كل من ينتمى لهذا الكيان الشامخ

رحم الله الفقيد وابقى الله من استلم الامانه ورفع الرايه وواصل المسير

وحفظ الله الجميع0000

صح لسانك اخوي وعلا شانك

احترامي وتقديري

**فاضي عبدالعزيز** · 17/09/05, (02:35 PM)

الشاعر سالم بن جخير

اخواني يعلم الله ان لقبيلة عنزه غلا بصدري لايعلمه الا الله

والله ماعزيت الا من عزك والقلوب عند بعضها ويام القبيله المعروفه

ويشهد الله على معزتها ومقدارها

الله خلق لي فكـر وعيـون ولسـان***اقـدر امـيـز واتكـلـم واخـايـل
نيابـةٍ عـن يـام والشيـخ راكـان****وقفت امثـل لـي شعـوب وقبايـل

صح السانك وفكرك مثلت ربعك ونعم من مثلت ومن مثلهم

سلمت يااليامي

**محمد المقبل** · 17/09/05, (06:22 PM)

الاخ الشاعر سالم بن جخير

هلا وغلا بك اخي الفاضل ماحببت الامن احبك

لك كل الاحترام والتقدير

ولاهنت على هذه الرائعه والف نعم برجا ل يام السلاطين والف شكر لك على تلبيت دعوة اخوي عبد الله الثابت السباق على الطيب دائماً

تقبل تحياتي واحترامي

**سالم الجهبل** · 17/09/05, (07:08 PM)

الاخ الشاعر / سالم بن جخير

ارحب ارحب تراحيب المطر

الله الله الله مااجمل وانت تقول

نيابـةٍ عـن يـام والشيـخ راكـان

وقفت امثـل لـي شعـوب وقبايـل

بيض الله وجهك قصيده جزله من شاعر جزل

غفرالله للملك فهد واسكنه فسيح جناته وبارك الله باالملك عبدالله وولي عهده

وحفظ وطنا من كل سوء ومكروه

تقبلو تحياتي