قصة وقصيدة ..الرابـــعــة !! تفضل !!

[جلال الدرعان]

	السلام عليكم ورحمه الله وبركاته اسعد الله مساكم يا أخواني وأخواتي اليوم أنا جايب لكم قصه وقصيده وأتمنى تحوز على رضاكم هذي قصيدة الشاعر حمد بن عبداللطيف المغلوث من شعراء الحساء المعدودين والمشهورين يرجح انه توفي 1349هـ يبدو من القصيدة انه كان في شبابه وهو صغير ناوي يحدر للكويت يترزق الله ودور حملة وربع يروح معهم ولكن ما اراد الله يروح مع الحملة الاولة ما تمكن و فاتته الحملة الثاتية ما ادركها يبي مجموعة يرغبها ويرتاح لها ، الحاصل جاء وقت وكان توه متزوج يعني عريس جديد والى هكالرفقة والمجموعة نقوة يعرفهم ويرتاح لهم وهذولا اللي يبيهم المهم توكل على الله وراح معهم للكويت ووصلو هناك والاه توه على شغف بزوجته ما امداه مثل ما تقول بشهر العسل الحاصل وصل هناك للكويت والى كل مجموعه اللي بالكويت يتجمعون لحالهم مثل ماتقول اهل الزلفي لحالهم واهل الحساء لحالهم والقصيم مثل , الحاصل ان الشاعر حمد المغلوث مع جماعته اهل الحساء والاهم ساكنين في بيت مثل ماتقول دور ارضي فيه غرفة تحت وسطوح فوق وكانوا في أيام القيض ينامون بالسطح، وماش الواحد الى راح عن ديرته يمضي عليه اسبوع او اسبوعين وهو يتذكر المكان اللي هو جا منه وخاصة الى صار شاعر وراعي غزل واحساس مرهف مثل شاعرنا حمد لا وبعد توه متزوج ( هذا بلا أبوك يا عقاب ) هاه فهو يبي له فترة لين ينسجم مع ربعه اللي جاي معهم ويركد شوي ويسلى ولو شوي عن اهله وذكراهم وديرته المهم مضت أيام مدام انهم لاهين فهو لاهي معهم لكن اذا جا الليل ليلين (لا تلومونه توه عريس ) ولا عندهم شجرة اظنها عبرية يمرح فيها طيور وحمام والحمام مثل ما تعرفون يهيض الشعراء ويستثير قرايحهم للشعر ويهيجهم الى قام الحمام ينوح ويغني ووقت الصفرة يهيض الشاعر خاصة الى صار لحاله فهذا الشاعر حمد الى ناموا الناس ماجاه النوم قام يتذكر اهله وربعه في الحساء وبالاخص زوجته وهالحمام اللي فوق راسه يهيضه وهو قاعد سهر لحاله واللي حولينه خالين وش هامهم لو تثور مدافع ماقاموا ، والى راح نصف الليل وهب الهوى من جهة ديرته وتهيض زيادة وقام يحس بالفرقى خطر عليه يشق ثيابه( ما ينلام تذكر اريش العين ) ماينام الا شوي من أول الليل فهو تهيض بهالقصيدة هذي وهي جميلة فيها وصف وحنين ووجد وغزل وكلام جزل . القصيدة يقول فيها .. باح العزا عقب الحبيب الجنوبي= كن العقل ياعلي بالكف مجذوب ياعلي تذكار اريش العين دوبي= زوله يزول لي وانا عنه محجوب ابكي على فرقاه والعي واهوبي = والدمع من عيني على الخد مسكوب من حر نار الولف مزعت ثوبي = وطوحت بالونة على كل نبنوب عقب الستر كل الخلايق دروبي = والسد ثار من الحشا ثورة الطوب ياعلي لا نسنس نسيم الهبوبي = نود من الشرقي برى حالي النوب سلال سل الحال من كثر لوبي = لاهم لا سقوة ولا نيب مطبوب الا بلاي فراق من سد نوبي = عن كل معشوق من البيض رعبوب ياعلي يافرز الوغى يا محبوبي = ويش انت شايف ياحجا كل منكوب عيا يطيب لي الكرا مع شروبي = كن الحشا يصلى على حر لا هوب ليت الركايب ياعلي ما مشوا بي = من ديرة المحبوب والرزق مكتوب وياليت ربي ما سعى في ركوبي = ليت السنع معتاق والدرب مقضوب واليــــوم يا غافر عظيم الذنوبي = اسالك يا معبود يا خير مطلوب تجمع بشملي مع حبيب عجوبي = محبوب ما غيره من الناس محبوب اللي كما بدر بدا للغيوبي = او شمعـــــدان في دجا الليـــل مشبـــــوب اصفر عفر والكف منه مخضوبي = ومجمله ربي ولا فيه عذروب الا الوفا ماهــــو مكور كذوبــــي = مغفــــل ما يعطـــي العلــم مقلــــوب عز الله انه ثقيل الحمل صوبي = بالحب وادعــــاني شقـــــي ومتعــــوب هو ريف روحي ياعلي لو يحكوا بي = مصدود عن عذل العواذل ومحجوب ما طيع انا العذال لو برقوا بي = ولا كف عن وصله ولا اسلى ولا توب ما سمع ولا وحي عن حبيبي ولوبي = صبر فلا حاربت زادي ومشروب ما طيق انا الفرقا رقاق جنوبي = قلبي ضعيف ودايـــم الدوم متعـــوب يوم الليالي عن حبيبي رموا بي = غديت مليوت الجناحين مصيوب مثل الفقير اللي غريب عزوبي = مستاجع ماله حد يقضي النوب او شبه حيد للسرات معصوبي = حمله ثقيل وصار بالكف شاذوب والا كما طفل يتيم يحوبي = من قلة الوالي ورا البــاب مذبــــوب هذي سواتي عقب فرقا الجنوبي = اللي هجرني مالفى منه مكتوب هو يحسب ان البيض عقبه غدوابي = انا بصوب وعن هوى البيض في صوب ما مل انا اللي لاذكرته يذوبي = عقلي وهو متغطرس يسحب الثـــــوب غرو من البيض العذارى محسوبي = هافي حشا ومعزل تقل مسلوب كن الردايف لا قتفاها الهبوبي = صيوان حكام بالاطناب مضروب وعيونه الخرسات سود سطوا بي = ونهود مثل التين والعنق مسلوب ياعلي وين اسلى الهوى وين انوبي = وين اقدر التجليد والعقل منهوب ياعلي خلوني وحيد الوبي = لوب الحمام اللي على راس نبنوب غير الوصل ماش يبرد لهوبي = وصلوا على المختار ما غرد اللوب // // أحبتي ..أتمنى أني وفقت في تقديم ماهو مفيد لكم وهذه والله غاية المنى..

[صالح الأسود الجعفري]

جلال الدرعان
سلمت يداك ع القصه والقصيده
يعجز التعبير امام
قلمك المميز والرائع
دمت بخير

[بنت الكحيلا]

الله يعطيك العافية اخوي جلال الدرعان

وتسلم على الموضوع الممتع

بارك الله فيك وفي جهودك الطيبه

لك كل الشكر

[عبدالرحمن الجابري الحربي]

يعطيك العافية جلال على هالقصة والقصيدة الأكثر من رائعة ...
والشاعر محد يلومه توه عريس ...

تقبل مروري واحترامي ...

[نافع عيد الجديد]

سلمت يداك ع القصه والقصيده
يعجز التعبير امام
قلمك المميز والرائع
دمت بخير

[جلال الدرعان]

اقتباس:
المشاركة الأصلية كتبت بواسطة صالح الأسود الجعفري
جلال الدرعان
سلمت يداك ع القصه والقصيده
يعجز التعبير امام
قلمك المميز والرائع
دمت بخير




هلا بك اخوي صالح الاسود الجعفري
ويسعدني مرورك الرااائع وكل الشكر لك على التواصل
كن بخير

[جلال الدرعان]

اقتباس:
المشاركة الأصلية كتبت بواسطة بنت الكحيلا
الله يعطيك العافية اخوي جلال الدرعان

وتسلم على الموضوع الممتع

بارك الله فيك وفي جهودك الطيبه

لك كل الشكر



هلا بك اختي / بنت الكحيلا
اشكر لكي حضورك وتواصلك المميز والرااائع ولكي خالص احترامي
كوني بخير