عن المدينة طلعتي حق مشروع.. يم الفياض اللي سقاها مطرها... - °~*¤®§(§ شبـــكة ويــلان العـربـيـه §)§®¤*~ˆ°

**عبدالمحسن الجلوي** · 12/03/11, (07:19 PM)

عن المدينة طلعتي حق مشروع = يم الفياض اللي سقاها مطرها
ان شفت لي برقا تلا الليل لاموع = خلته صدوق ومزنته يستعرها
طار الكرى والنوم بالعين ممنوع = لو ان عيني موغلة في سهرها
صبحتها بأرضا مساييل ونقوع = يوم اختلط ريح المطر مع زهرها
ارقب على رجما طويلا ومرفوع = يشرف على خليانها مع هجرها
مشراف ذيبا يوم يسبر من الجوع = او الحرار اللي ترفع وكرها
يتلني قلبا به الحزن مطبوع = تعرضه سمر الليالي قهرها
يكفخ وهو مابين ضلعين مردوع = عن حاجة ن ما ينحسب وش خطرها
له من تجاريب الزمن سيف ودروع = وخيلا مثار النقع يسمك غبرها
مشى على دربا تواليه مقطوع= لوكان يدري ماتعب واختصرها
فيا ونتي ونة غريبا ومدفوع = في سجن عذرا جعل يمحل شجرها
يومه من اصحاب الردى بات مخدوع = قضيته حسبي على من مكرها
محكوم عشر اسنين ما اقضى له اسبوع = يحسب لياليها ويحسب شهرها
في غيهبان السجن متوسد الكوع = وانقطعت اخباره ولا احدا ذكرها
وياوجد حالي وجد من ماشيا طوع = لامه يراعي ضعفها من كبرها
ونة وجاها تالي الليل مفزوع = على تشهدها ومدت نظرها
يوم احتملها والقضا مابه رجوع = حلت منيتها وهذا قدرها
صلوا عليها الظهر والعالم جموع = ثم انزلوها في ضريحا سترها
ان شاف غرفتها كوى قلبه اللوع = وفاضت عيونه بالدموع ونثرها
فيا الله وانت اللي لك الامر مسموع = سامع دبيب النمل على حجرها
عسى الدهر تاليه بالخير متبوع = من شدة طالت على اللي صبرها

**بنت الكحيلا** · 12/03/11, (11:59 PM)

صح لسانك اخوي عبد المحسن الجلوي

وتسلم على القصيدة الرائعه

كتبت فأبدعت بارك الله فيك

**مشهور الرشدان** · 13/03/11, (12:54 AM)

الشاعر القدير / عبد المحسن الجلوي

صح لسانك وعتلا شانك ونحت من صخر امتعتني الله يعطيك العافيه
وانت وارث الشعر وراثه من البحر عايد الضافي
صح لسانك مره اخرى وبنتظار جديدك

**خلف الغريب** · 13/03/11, (07:51 AM)

يا رب يسرها وفرجها على من دعاك ..آآمين

صح لسانك اخوي عبد المحسن وعز الله انها جزلة من جزل ...

تحياتي لك

**محمد بن موسى** · 13/03/11, (06:09 PM)

عبدالمحسن الجلوي

صح السانك واعتلااا شانك

كلمات رائعه وتستحق التصفيق

لله درك اخوي عبدالمحسن على هذا الجزاله

تقبل فائق الود والتقدير

كن بخيرر

**سالم صالح** · 13/03/11, (08:01 PM)

الراقي ,,,,

عبدالمحسن الجلوي ,,,

صح السانك قصيدة راائعة وجزلة وعزالله انك جزل داائماً وانا اخوك

تقبل تقديري واعجابي

**عبدالمحسن الجلوي** · 13/03/11, (09:37 PM)

اقتباس:
المشاركة الأصلية كتبت بواسطة بنت الكحيلا
صح لسانك اخوي عبد المحسن الجلوي

وتسلم على القصيدة الرائعه

كتبت فأبدعت بارك الله فيك
بنت الكحيلا :صح بدنك اطال الله بعمرك ... تحياتي لك..