لــــبــ/ــــيــ/ــــه ..

[عبدالله المعيوف الدهمشي]

قرأت قصيدة غزلية يقول فيها الشاعر

إن شفت خصره قلت يشكي من الجوع ... وان شفت ردفه قلت مابه مجاعه

فاستفزتني هذه الغزلية ، فكتبت هذه القصيدة وللأمانة قصيدتي من وحي الخيال لا تمت للواقع بصلة ..

لــبــيــهـ

لبيه يا غرو ٍ عرض بآخر الحَي=يوم السما بدر الدجى في نحرها
يا وي يازوله على القاع يا وَي=يا حظ الارض اللي برجله عبرها
وياحي طفل ٍ زمِّته يا بعد حَي=طفل ٍ مسك نقابها ثم فسرها
تَلَّ النقاب وشفت انا الزين يا وخَي=شفته بعين ٍ جعلها في عورها
يوم لمحتني شفت من زينها شوَي=صاحت وردت سترها اللي سترها
بنت ٍ حوت بالزين شي ٍ على شَي=هي بالصداره والعذارى بثرها
حال العذارى عندها يقول يهبَي=محد ٍ يطالع غير بسمة ثغرها
إليا اقبلت .. ضي ٍ تهجم على فـَي=وإليا ادبرت .. ليل الضفاير غمرها
تمشي تبي الحفله وانا آجرِّ رجلـَي=يا حفلة ٍ لا واهني من حضرها
كني بها يوم لعبت ،، وابتدا الغَي=شدت من عيون الخلايق نظرها
مالت بوسط الملعبه وانثنت زَي=غصن ٍ تثنى مع تثني شجرها
راجت وماجت والتوى عودها لـَي=ثم استدارت ولفحت في شعرها
من زينها كلن دهن ريقه بمَي=والناس عنها ما توخر بصرها
حتى البزارين اجلت لعبها شوَي=وقامت تزاحم حولها وتحشرها
لبى الجبين اللي تقل مشتعل ضَي=لبى ذوايبها ،، ولبى نحرها
بعيونها تحيي وتذبح لها حَي=وبين الحيا والموت يِرِّثْ حَوَرْهَا
والعود مبري مرتوي بالحلا رَي=والجيد من جيد المها ادق وارهىاا
والخصر كنه مستحي منطوي طَي=والردف ماخذ راحته ما ذخرها
والنهد زَمَّ الثوب لين انزوى زَي=لا وَاهَنِي الثوب يومه سترها
اقول في نفسي وانا اصفق ايدَي=واعيني اللي طببتني بحرها
اللي كوت قلب الطفل بالحلا كَي=وشلون ابا اسلم من حلاها وخطرها !!

عبدالله الدهمشي

[أبو غرام]

المبدع

والمجنون

والباذخ

والمسرف حتى انك دشت اخوك معك ..
ياويلك من الله

وعاد مثل هالنصوص
ماودك تجيبه الفجر والجو هادي

يكوي الكبد ياخوك ^_^


صح لسانك واعتلا شانك على هالنص



وخل عنك قولة خيال


ياخوك مابي تروح دوختي مع هالنص والتوصيف بلّوشي ^_^



صح لسانك ما حييت نوبتن اخرى <<< بد ما تقل فاق


وتقبل مرور اخوك وسجلني من متابعيك منذ اللحظه


شرط تجيب مثل هالوصف وزود


اخوك ومتابعك اللي راح ملح


ابو احمد

[فاضي عبدالعزيز]

صح لسا نك
صح لسا نك

ابداع وصف رائع


هذ خيال يخوي لو كنت حقيقه وشلون تكون

ولا اقول تخيل وكر لنا من درر النادره
لاهنت

[محمد بن موسى]

الشاعر الرائع / عبدالله الدهمشي

لا اعلم ماذا اقول امام هذة المترفه

ماذا اقول اما هذا النص المتشبع شعراً وعذوبه

ذائقه شعريه مهما قلت عنها واسهبت في المدح لن افيها حقها من الثناء والاطراء

اعجبني ياعبدالله فكرة القصيدة ومضمونها

وتوضيفك لأكثر من مفردة بنفس الحروف وباختلاف المعنى

فهذا يثبت انك امام شاعر لا تصعب عليه اقتناص المفرده وتطويعها كيفما شاء

لله ردك شاعرنا الراقي

صح السانك مدد بلا عدد

وبأنتظار مع رائعه اخرى من روائعك

دمت بحفظ المولى

[مشهور الرشدان]

إن شفت خصره قلت يشكي من الجوع ... وان شفت ردفه قلت مابه مجاعه
تمشي تدق الخط والراس مرفوع ياويل قلبي منه زادت اوجاعه

صح لسان الشاعر وصح لسانك اخوي عبد الله المعيوف
على هذه الشامخه عيشتنا معك بالجو يامطنوووخ

[غموض الشمال]

الأخ عبد الله الدهمشي

قيصده رائعه وجميله..

صح لسانك اخوي ودمت بهذا الابداع

تقديري لك

[سعد النفج]

الله الله ..
فعلاً استمتعت بهذه الفاتنه ..
لله درك أخي عبدالله المعيوف ..
نص فاخر يجبرنا على القراءة لآخر حرف ..
دمت بهذا الإبداع و لا تحرمنا جديدك ..