رد على الشاعر الجاهلي عمرو بن كلثوم لعيون فيصل

[عبدالمحسن الجلوي]

أخواني صبحكم الله بالخير أبي اقول لكم قصيدة (( لها قصة طبعا)) حيث كنت انا والاخ فيصل العنزي مسافرين من الرياض الى الشمال وعندما مسكنا الخط تمثل بقصيدة الشاعر الجاهلي الكبير عمرو بن كلثوم :


ألا هبي بصحنك فاصبحينا = ولاتبقي خمور الاندرينا

فقال هذه احسن قصيدة عندي وسكت وحنا بالطريق السريع اللي بين بريدة والرياض صار لنا موقف مضحك فقلت له ابي اسوي بك قصيدة على وزن قصيدة عمرو بن كلثوم بس بشرط ندخل فيها اللهجة العنزية هههههههههههه فقلت:

تخاوينا أنا والقرم فيصل = عشير الغوش ملفى الغانمينا

على جمسا جديد من الوكالة = من النوع المسمى باليوكينا

مشينا من الرياض الصبح بدري = دعوت الله أن يستر علينا

هو السايق وانا جنبه اهيجن = واردد من قصيد الأولينا

من اشعار الوضيحي والفراوي = وابو عدوان ياقلبي الحزينا

معي دله اقهوي واتقهوى = اسوق الكيف باليد اليمينا

لأن الكيف ياللي مانت داري = عدو النوم للي منتوينا

ديارا من ورا حايل لاهلنا = سقتها المزن حتى يرتوينا

منازل قومنا وبنوا أبينا = حمـوها قبل حــكم الحاكمينا

واثناء الهجيني والسوالف = اذا سيارة طافت يمينا

بها بنتا كنور الشمس وجها = تدير برأسها تنـظر الينا

لبسنا شمغنا لما رأينا = وكــنا للـشماغ مــجدعينا

ورسمنا وتظبطنا وكشخنا = ومن عقب الهجيني صامتينا

وشغلنا الاماكن بالمسجل = وكنا للأغاني كـــارهينا

لأن البدوي مهما تطور = على الارشيف يأخذه الحنينا

اقول ادعس يافيصل لاعدمتك = وهو خـايف أبوها يبتلينا

يبلغ عننا مـركز بريدة = ونصبح بالحديد مــكبلينا

فقلت له يابن وايل تشجع = كما أجدادكم تحمي الظعينا

فشاش الوائلي من كثر مدحي = وقال ابوك يالــعمر اللعينا

وقال شف المسدس تحت رجلك = مدام انك يامحسن تنتخينا

فطفناهم لكي ننظر اليهم = لسوء الحظ اثارينا غــدينا

اذا سيارة ليست الاولى = بها البنقال شر الوافدينا

ولا ادري كيف فتناهم وفاتوا = وضاعوا عننا لما التهينا

المهم اننا قمنا نتهاوش = فمن بعد الوناسة غاضبينا

وكلا يعطي الاخر كلاما = ونمنا في بريدة دائخينا

صحينا الليل اكملنا سفرنا = وعدنا للهجيني منشدينا

هههههههههههههههههههههههههههههههههههههههههههههههههه ههه

[سعد النفج]

عبدالمحسن الجلوي ..
صح لسانك ..
نص جميل و راقي ..
عشت معكم الحدث يا عبدالمحسن ..
مبدع و ممتع ..
دمت بخير ..

[البدر]

هههههههه

اضحك الله سنك ياعبدالمحسن

فكرة القصيده جدا جميله ودمج اللغه الفصحى باللهجه العاميه او العنزيه زادها جمالا

ولان هذه القصيده فكاهيه والهدف منها وناستك انت وخويك في السفر فهي فلا داعي لنقدها مع انها اجمالا جيده

صح لسانك ياعبدالمحسن ويسلم راسك

[تركي علي الخالدي]

جميله جميله جدا

صح لسانك ياعبدالمحسن الجلوي

قصيده فكاهيه ومميزه

[بدرفهد الجعفري]

الحمدلله انكم مالقيتوهم في المره الثانيه كان رحتوا للسجن ههههههههه

مره ثانيه خلوا عيونكم على الخط ولاتناظرون للسارات الثانيه

قصيده قصصيه وطريفه تجعلك تعيش الموقف

صح لسانك

[حمد الضوّي]

عبدالمحسن الجلوي


صح لسانك قصيده جميله الله يعطيك العافيه انت وخويك بالسفر ,,,,,,,,,,,,, دمت بخير

[مشهور الرشدان]

فشاش الوائلي من كثر مدحي = وقال ابوك يالــعمر اللعينا

وقال شف المسدس تحت رجلك = مدام انك يامحسن تنتخينا

صح السانك اخوي عبد المحسن قصيده رائعه واروع مافيها هذ1 البيت تقبل مروري