ماكنت احسب ان الفرح يبكي العين

[عبدالمحسن الجلوي]

ماكنت احسب ان الفرح يبكي العين = الا عقب قبل امس شيء جرالي
انشهد اني يوم شفت الوغادين = هلت عيوني بالدموع الهمالي
ذكرت ابوهم يافهد قبل عامين = الله واكبر كن وجهه قبالي
كما فرح يوسف بشوف ابن يامين = من عقب غيبات السنين الطوالي
والا كما عودا عياله بعيدين = قعد بنجد وهم بقرن الشمالي
ابطوا عليه وقام يصفق بكفين = وجاه البشير وبشره بالعيالي
يامرحبا واهلين في شوف غالين = ويالله لا تقطع ديار الغوالي
لا شك لبوكم على هامتي دين = صنايعه بيضا ولاهن هزالي
ياما وقف معيه على الزين والشين = ايام انا مالي عضيد ن موالي
يوم اتصفق عند ناسا قريبين = مافيهم اللي سرني وانتبالي
حاما محاماة الرجال الشريفين = بالنفس والا في خشوم الريالي
جلست في بيته حوال اربع سنين = كني ببيت ابوي والا خــوالي
لا نية ن قشرا ولا خاطرن شين = يزيد طيبه مع مرور الليالي
اقفت به اللي روحت بالسلاطين = اللي تلف القوم لــف الـــزوالي
ولا ذكر ناسن على الارض باقين = هذا عزاي بدمعتي واحتمالي
يالله ياللي ترتجيك المصلين = ان تنزلــه في باردات الظلالي
في جنة ن فيها انهار وبساتين = امــين يامنشي الهضاب الــعوالي

[سلامة الجعفري]

الله الله الله


ابيات تخاطب الوجدان صح لسانك ياعبد المحسن

ياما وقف معيه على الزين والشي

ايام انا مالـي عضيـد ن موالـي

يوم اتصفق عنـد ناسـا قريبيـن

مافيهـم اللـي سرنـي وانتبالـي

حاما محاماة الرجـال الشريفيـن

بالنفس والا في خشـوم الريالـي

ونعم بالممدوح والمادح
وهنا طرى لي البيت الشهير


ياحمود يطلع لك صديق من القوم
ويطلع من الربع الموالين عدوان



صح لسانك ياعبدالمحسن مرة اخرى


وتقبل مروري ووافي تقديري

[سالم العنزي]

الشاعر عبد المحسن الجلوي

صح لسانك ابدعت وامتعت بما كتبت

تقبل اعجابي

[بدرفهد الجعفري]

عبد المحسن الجلوي

صح لسانك وافكارك وسملت بنانك التي نقلت لنا هذه القصيده

تقبل مروري

[بروق الشمال]

اخوي عبد المحسن
صح بدنك وانا اختك قصيده تحمل الكثير والكثير من جزيلات المعاني
تقبل خالص احترامي

[عاشق المعالي]

الشاعر عبدالمحسن الجلوي

صح لسانك على هذه القصيده التي اعجبتني وسجلت اعجابي هنا

[البدر]

عبدالمحسن الجلوي

صح لسانك قصيده جزله وممتعه

تقبل اعجابي