امس يوم الشمس ماباقي سوى مثقال ذره - °~*¤®§(§ شبـــكة ويــلان العـربـيـه §)§®¤*~ˆ°

**سلامة الجعفري** · 08/04/10, (11:09 PM)

السلام عليكم وعذرا للغياب الذري حتمته الظروف وقد جئتكم بابيات هذه المرة غير عن ماعهدتم

ارجو ان تعجبكم ولو بنسبة 2%

كل مالديت عيني في جمال البيض مره = ثم راقت لي هنوف كنت اظن الله فردها
انبهرت من اختها اللي زينها لله دره = عقب ماقلت ان ذيك البنت مايوجد بعدها
صدق اثر فالبحر دره فارده عن كل دره = لو زعم من غاص فاعماقه وقال انه وجدها
امس يوم الشمس ماباقي سوى مثقال ذره = والظلام اللي ثواني هجمته قرب عددها
كنت اناظر للغروب استتبع النور لمقره = لين مليت انتظار الليل والنفس بجهدها
اثر شمس الناس غابت والظلام اقفى بسره = واثر هذا النور شمس ثانيه عمت بلدها
اقبلت كن الثرى يشتمها ساعة تمره = كل ما تاطى حصاه تقول الاخرى ياسعدها
والنحل يرقص على عطر بممشاها تذره = عاف يشموم الزهر وانساق مع بلسم جسدها
اقبلت حتى اصبحت قدام عيني مستقره = قلت هذي فرصة ٍ ماني بمتحين وعدها
جيت ابانطق واستعير من الخيال حروف حره = لين قامت تقترب حتى بغيت اوصف نهدها
عاجلتني واهي ترمي بالسواد اللي تجره = ماقدرت انطق ولاادري يم بابي وش قصدها
قيدتني بابتسامه ثم قالت من تشره = هو ليامن جاك يلقى حاجته والا فقدها؟؟
قلت شكلك سامعه عني صديق ٍ للمبره = آمري والنفس تحت رضاك يامحلى نكدها
بينت لي كفها الايسر عسى الله مايضره = ملمسه يكفي عن الدنيا ويغني عن رغدها
معصمه به ساعة بيضاء وبه خيط تفره = ابيض لكن بياض الجلد منه امر وادهى!!
قالت اقر اللي على كفي وعنوانه تحره = اسم خل ٍ جت تبي لقياه ماخانت عهدها
تذكر الموعد مضى وقته وهي كره وفره = مالقت من يعرفه والروح بنهاية جلدها
قلت هذا فلان ولدفلان بيته مانغره = سهل الله لك دروبك والا انا حالي قردها
روحت والعين ترعاها ووسط القلب حره = واعذاب اللي تيقن له بحاجه وافتقدها
ليتني لو بس ساعتها او زراز ٍ تزه = ذا يداوي روحي اللي ماتداوت من كمدها
ماشرهت اصبح حبيب حالها بلياه مره = ومن غلاته ياعذابي سجلت اسمه بيدها

**خلف الغريب** · 09/04/10, (01:53 AM)

العزيز والغالي سلامة

صح لسانك ..

معصمه به ساعة بيضاء وبـه خيـط تفـره

ابيض لكن بياض الجلد منه امـر وادهـى!!
سلمت وسلمت مشاعرك بس لا تعود توقف قدام الباب هالحزة ( حزة عصير ) تراها دايم تسببب الضيقة ..
تشرفت بالمرور هنا واكرر صح لسانك ...

**الجضيعي** · 09/04/10, (12:20 PM)

صح لسانك قصيده غاية في الروعه والجمال

ابداع من شاعر اعتاد على الابداع والتألق

قصيدة من الطراز الفريد

الجعفري فعلا قصيده غير هذه المرة

سلمت اناملك وسلم بوحك ودمت بخير

**سالم صالح** · 09/04/10, (01:29 PM)

الاخ العزيز / سلامة الجعفري

صح السانك فانت شاعر مميز ومبدع واكبر دليل هذة الفاتنة والحقيقة غير هالمرة راااااااايح بيدها وصدق ابو خالد انتبه (لحزة العصير )

لله درك شاعرية فذة والقادم امر وادهى

تسلسل مميز وقافية راااائعة الحقيقة اعجبتني كثير

تقبل ودي ولا تعود تغيب

**سليمان مفضي العنزي** · 09/04/10, (02:25 PM)

ماشاء الله عليك

الا عجبتنا 100% كيف وانت عيشتنا بهذا الجو وكأننا نشاهد معك

صح لسانك

**تركي علي الخالدي** · 09/04/10, (02:33 PM)

من طول الغيبات جاب الغنايم

ابداع ابداع بلا حدود

اقرأ هذه القصيده وكأني اتفرج على لوحة رسمها فنان مبدع

صح لسانك ياسلامه

**سعد النفج** · 09/04/10, (04:11 PM)

الرآئع / سلامه الجعفري ..
ما أروع هذا النص ..
2% لا و الله 100% يا بو بشآير ..
صح لسآنكـ لين ترضى على هالشعر ..
و الحمدلله على السلآمه و ان شاء الله آخر الغيبآت يالغالي ..
دمت بألف خير ..