قصيدة رائعة بل فائقة الجمال للشاعر القحطاني فراج ابن قرقاح غريبة الألفاظ

[ابوحنين]

قال ابن ريفه بدا في المرقب العالـي بأعلى المراقيب تومـي بـه هبايبهـا
مايدهله كود صافي الريش والوالـي وإلا الولع يوم يفتـك فـي عجايبهـا
هيضني الرجم وأنا مـن أولٍ ٍ سالـي لهم على القلب ديـران شطيـت بهـا
يامرقبٍ جاك مـن الأمطـار همالـي إنصوب صيف ٍ من المنشا يهـل بهـا
لهم عليـه أشـدوق الثفـن لاسالـي وعطفة طريب ليـا زافـت جوانبهـا
لما غدا الفيـض كنـه زرع عمالـي سيلـه مـن القـدم للبطنـان ناهبهـا
كم مـرةٍ قـد نزلنـا عشبـه المالـي ببيوت لامن وزا المجرم يلـوذ بهـا
نبنـي بيـوت بـعـراف وجهـالـي وإن جاء النذر من حفيف مـا نتربهـا
بعوال مفلـح وهـم حمايـة التالـي بمصقـلات ٍ عطيبـات ٍ ضرايبـهـا
صبيان قوم ٍ تحـل المنجـم الخالـي كسابـة المـدح حمـايـة ركايبـهـا
ربعي عبيدة وأنا من حربهـم جالـي هل صبحة ٍ فالضحى تشعى كسايبهـا
وإنشد عبيدة هل الطالات مـن حالـي وإنشد الأجانيـب يـوم إنـا نقاربهـا
من هو يقلط على فـرش ٍ وفنجالـي سعد إبن عمـه ليـا جاتـه مكاربهـا
لمـا غـدا بيـن نقـاض ٍ وفتـالـي وصفوا ألاجانيـب وأذتـه بطلايبهـا
عديتهم ثم نسفت بهـم علـى الجالـي نسف الدلي للمعدي صـوب جاذبهـا
فإن كان ربعي نسوني مانـي بغالـي بأعيش فـي ديـرة ٍ قفـر ٍ جوانبهـا
عسى هل الشين مايبقـى لهـم تالـي وأهل سلوك الـردى يـارب تذهبهـا
واللـي رفيـع ٍ وللشطـات حمالـي إرفـع نواصيـه يـا ربـي وقطبهـا
أنا من الخبرة اللـي شورهـم عالـي وإما هـل البخـل بأمـر الله نجنبهـا
ياراكب ٍ من على اللي مشيها إرمالي مامونـة ٍ يرفـع الهـلان غاربـهـا
تزهى السفايف وتزهى الخرج وحبالي ومجرب ٍ لا سرا في الليـل صالبهـا
حي الطويله وحي اللي شراهـا لـي من واحـد ٍ جابهـا للسـوق جالبهـا
شريتها في الدهر يوم أرخص الغالي بميه وعشريـن مـا يمهـل بغايبهـا
حديدهـا وأذكـر الله كنـه ريـالـي كن الحيايـا تطـوى فـي مقاضبهـا
بنـت ٍ غراهـا زبـاد ٍ عنـد دلالـي وإلا طموح ٍ هواء الغربـي يلاعبهـا
لي بندق ٍ ماصنعها الصانـع التالـي من دقـة المـرك نحـال ٍ خشايبهـا
عطوا الطويله عريب الجد والخالـي وابن الردي لا تخلونـه يـزول بهـا
بيدي قرار ٍ تكف الجمـع لا إنهالـي طويلـة ٍ ناحـل ٍ مقـدم خشايبـهـا
أضرب بها الوعـل لا منـه تهيالـي أبوحنيـة كبيـر الــرأس شايبـهـا
لا ثـار بارودهـا لا العـود متالـي منهـا الريايـا مقطـعـة ٍ نشايبـهـا
ضربت عشر ٍ بها والفي مـا مالـي والحاديـه روحـت تثلـغ مضاربهـا
آقف مع لابتـي وأمنـع بهـا التالـي لاهاب ولد الـردي ماعـاد يزهبهـا
إليا لفونـا مـن المقنـاص زعالـي أحد ٍ مـدح بندقـه وأحـد ٍ يعذربهـا
بشرتهم بالعشاء مـن عقـب مقيالـي والقايدة من مـرد الكـوع ضاربهـا
وأسرح بها في السحر مانيب كسالـي وكم جملـة ٍ فرقـت منهـا ربايبهـا
يالله وأنا طالبك حمـراً هـوى بالـي حمراً من الجيـش طفـاح ٍ جنايبهـا
لاروح الجيش حادية أشهـب اللالـي لا هي تروح وسيـع صـدر راكبهـا
اللي على كورهـا واللـي بالحبالـي واللي علـى متنهـا واللـي بغاربهـا
لا روحت مع تخاتيخ الخـلا الخالـي كـن الذيابـة تنهـش مـن جوانبهـا
وأستغفـر الله وحـده فوقنـا عالـي وحطيت في حفـرة ٍ رزوا نصايبهـا
منقولة

[سعود المسعودي]

الله يعطيك العافيه على الحضور الجميل


ولكن القصيدة مكانها الصحيح


المختارات الشعريه

[الجوكر]

ابو حنين

يعطيك العافيه على هذا النقل الرائع

حتى وان كانت القصيده لديها شكوك بصحة انتسابها للقرقاح,,,

فالعلم عند الله انها كانت لشاعر عطيفي من عنزه

ولكــــن مع الأعلام المسلط نسبت للقرقاح


تقديري