هذه قصيدة قالها الأميرالشاعر/ سعود بن بندر ال سعود
في والدته الأميرة / البندري بنت عبد العزيزابن عبدالرحمن ..
رحمة الله عليهم .. جميعاً واسكنهم فسيح جناته امين ..
قال : "((أنتي الحياة)) "
ياليتني بينك وبين المضرة = من غزة الشوكة إلا سكرة الموت
أو ليت شاورني القدر بس مره = ولبى مطالب رغبتي قبل ما أفوت
أو ليتني لجرة موا طيك جرة = أحمي قدم رجلك مثل جزمه البوت
أوليت بيد يني اسعد والمسرة = وأحكم عليها عنك ما لحظة تفوت
يفدا ك عمر ٍ منك يشعر بعمره = أنتي الحياة لنفسي وردة الصوت
وبعد ماتوفى الامير/ سعود بن بندر قالت به أمة الأميرة/ البندري بنت عبدالعزيز
((والملقبة باخنساء الرياض )).. قصائد رثى .. كثيرة ترسم به
لوحات فنية وشاعرية مرهفة.. وإليكم بعض من ماقالت :
:"(( يا سعود )) "
يا سعود كل ٍ بالشعر قام ينعاك = ويبين أخصال ٍ لشخصك حميدة
بالعون حنا كننا ما عرفناك = كل ٍ يسافر يم دار ٍ بعيدة
امنولٍ يا سعود سلواي جمعاك = تشيل عني كل بلوى شديدة
أنت رحلت و والي العرش ناداك = عساه لك مشتاق صفوة عبيدة
عساه يوم الحشر يا سعود يرعاك = يثقل موازينك ولا جرك يزيده
واليوم انا يا سعود سلواي طرياك = أتابع أخبارك بوسط الجريدة
وقالت ايضا : (( الدمع غار ))
ليت المنايا وقفت عنك يا سعود = خلتك لين أوريتني في ضريحي
ياليتني حطيت أناعنك بالعود = وأنت معافا يا جنيني صحيحي
أنت الصديق الصادق الود ياسعود = وأنت الطبيب لقلبي اللي جريحي
أنا أشهد أني عقب فرقاك مقرود = ماأنلام أنا لو كان أصفق و أصيحي
والله لصيحك لين أجاورك يا سعود = والقلب ينحب والجوارح تصيحي
"(( يا عزوتي ليه ؟! ))"
اللي رحل عني بلحظة وأنا أرجيه = وأدعي بعال الصوت مالي مجيبي
لو ينفدا بالروح والله لفديه = أفديه باللي لي بعيد وقريبي
كلٍ يداوي جرحه اللي سطى فيه = وأنا جروحي كاميه ما تطيبي
يا سعود عني رحت يا عزوتي ليه ؟ = خليتني يا سعود قلبي صويبي
أمشي مع المخلوق واللي بي أخفيه = وأسهر طوال الليل وأنحب نحيبي
"(( جرحي على سعود ))"
ان جيت للبيت قام الفكر يلعببي = وإن رحت للخرج صاب القلب ولوالي
ما عاد أميز وأعرف الجد واللعبي = غديت مثل الخلوج أمشي على فالي
يا سعود هذي تدابير الولي ربي = والعبد ماله عن اللي دبرالوالي
جرحي على سعود ما ينفع به الطبي = وشلون أبسلى وهو دايم على بالي
أحس صوته يناديني وأنا ألبي = يقول يمه نسيتي شبلك الغالي
وِشلون أبنساك وانته ساكن ٍ قلبي = أنته حبيبي وزولك دايم قبالي
"(( لين اجتمعتوا ))"
لين اجتمعتوا لدت العين لسعود = قامت تلفت وين قرة نظرها
وين الكريم اللي سلك سكة الجود = كم واحد ٍ نفسه كسيرة جبرها
أضحك وأنا قلبي من الحزن ملهود = وأغضى أذل العين تنثر دررها
رضيت بالمقسوم وأيامي السود = وكتمت نيران ٍ تطاير شررها
أبي رضا رب ٍ كريم ٍ وماجود = علاممافي برها مع بحرها
لعل تجمعني بهم خير معبود = في جنة الفردوس نقطف ثمرها
"(( يافهد ))"
كل ما قلت أبا أسلى زاد قلبي جروح = قام يصفق خفوقي مثل صفق الهوى
أتصبّر ود معي بالمذنب يبوح = لو بغى القلب ينسى يا فهد ما قوى
بالنهار أتجمل والصدر به يفوح = مثل بركان يغلي بانفجاره نوى
لي ضوى الليل أصلي عند ربي وأنوح = مثل مقروص الأفعى لي صرخ والتوى
عقب مضنون عيني يا فهد وين أروح = ليتني مت قبله أو قضينا سوى
"(( أصفق عليك الكف ))"
أصفق عليك الكف يا سعود وأنوح = مثل الخلوج اللي تردا جهدها
تثور من حزن يلحوح الحشا لو ح = وقل الجهد ما تنثني منه يدها
طاحت عقب ما قوموها على لوح = خلوج طاول سقمها من ولدها
مثلي وأنا حزني على لبة الروح = جدد على النفس الحزينة نكدها
"(( ليتني ))"
من يلوم العين لو هلت دموع = من يلوم القلب لو صفق وصاح
لي حبيب ٍ راح ماطرّى الرجوع = ليتني ودعت زوله يوم راح
آه من قلب ٍ كفخ بين الضلوع = مثل كفخ الطير مكسور الجناح
ليتني وسط الخلا وأعطش وأجوع = ولاسمعت اللي نعى هاك الصباح
ساهرة ياسعود والعالم هجوع = ليت منهو مات قبلك وأستراح
امل ان تحوز على رضاكم
09/05/09, (10:53 PM)
من قصايد الاميره / البندري بنت عبد العزيز ابن عبد الرحمن(رثى)
العرض العادي
