ياطير عقبي كن خاطرك شاين

[محمد الدلماني]

ياطير عقبي كن خاطرك شاين = خاطرك شين وغيبتي عنك يومين ؟
النقص فيك مبينٍ له بواين = في لمعة الريشه وفي ناظر العين
ياطير انا وياك كنّا خداين = وبيني وبينك ولف ومعاملٍ زين
يوم نتخاوى مع وجيه الضعاين = ونهمل سبوقك في مناكب ( خسيرين )
ولاّ ( شمال الهضبتين القراين ) = شرقّ ( طلال) .. ومن ( سواحيق) ويمين
ولإ عطينا سكّة ( التابلاين ) = ولاقد عطيناها عليهن حراذين
نصبح على طارات شهب المكاين = بين ( العراقيين ) و ( الأردنيين )
في خايعٍ به كنّ عيني تعاين = ربد الحباري به على أربع وثنتين
ونأخذ لنا أيامٍ بذيك الدفاين = مابين برقع والغدف والبسيتين
ونكسر على ماينحدر من ضواين = وناخذ هناك أسبوع والاّ سبوعين
وننكف نشاط وسالمين الصخاين = ولوّ كان نتعب عدنّا مستريحين
قدّام يطلع للصقاره زباين = ناسٍ تحوش القوبعه بأم روحين
ليّا روحوّ بمشحنّات الخزاين = مافي نحاهم ذوّقوه الأمرين
واليوم مابيني وبينك مداين = أنا سعودي وأنت جايٍ من الصين
وأمّا لقينا للحباري عواين = والاّ توادعنا وداع المحبين
الوقت ماتاليه معنا بزاين = والبرّ في حادور من حين في حين
أدناه مليانٍ كراتين ( فاين ) = وأقصاه ضاق وضيّقوه به هل الضين
وضاقت مناهج طيبين الضغاين = اللّ على المقناص يالطير ضارين
واليوم كّن اللي يحاكيك ماين = هذي سبوقك وأنتهض بالجناحين
وهاجر مهاجر مبحرات السفاين = للصين والاّ أهبط على ضلع غزوين
لوّ كان عندي من فراقك بهاين = حنّا عزاز ولانهين العزيزين
خلّك تروح ولاتشوف الغباين = شاملك عفوٍ مثل عفو المساجين

الشاعر عبدالله بن عون

[رابح الغضيان]

شكرا من الاعماق ياااذوق.....سلمت يمينك الفاضل محمد....

وصح السان الرائع والشاعر الكبير ابن عون

تحياااتي لك واحترامي يامديرنا الكريم........

[الصقار]

الف شكر محمد على هذا الاختيار ....وصح لسان عبد الله ابن عون

تحياتي لك ...

[محمد الدلماني]

ياهلا بمشرفي الكريم رابح الغضبان وشرفتنا بمرورك

[محمد الدلماني]

ياهلا ابن هندي وحياك الله وشرفتنا بمرورك

[خلف الغريب]

اختيار رائع ومؤثر اخوي محمد..

هذه من اشهر قصائد ابن عون التي اطلق بعدها الطير ...

ابن عون علم وقمة شعرية شاهقة اطال الله عمره...


تحياتي..

[ابن ريحان]

اخوي محمد


والله قصيده رائعه جدآ


والشاعر ابن عون شاعر كبير وحس راقي في جميع قصائده


الله يعطيك العافيه

تقبل مرور تلميذك الأصغر

اخوي رابح يقول مديرنا وانا اقول تلميذك


دمت بخير

اخوك ابن ريحاااااااااان