صوت فواز الغسلان...صدى خلف الغريب

[خلف الغريب]

اهدي لكم هذه المساجلة مع اخي وصديقي الشاعر والراوي المعروف فواز الغسلان واتمنى ان تنال اعجابكم وكانت البداية من عنده وقد التزمنا في قافية العجز خمسة احرف ..

عذابي ياخلف شوفة ثمانن كنها الياقوت=مع اللي ياخلف توقد بجوفي من لهايبها
لغمها ياخلف سلكه على وسط الحشى موقوت=واخاف ان اللغم يقبس بجوفي من سبايبها
اذا هاجت بي الذكرى رمتني في طريق الموت=طريحن من بواريد العساكر في كتايبها
طيوف الليل غاراته تجي مع سابقات الصوت=وانا اللي ماهقيت الريم تفجاني حرايبها
مواعيد الغلا كانت ضحى ثالث بروج الحوت=وراح الحوت والميزان ماجتني ركايبها
وعذر الزين برج الحوت دايم بالوعد مسحوت=مواعيده شكى العشاق من جمرة كذايبها
وقالت ثالث العقرب تجي في شارع الحتحوت=سفيه اللي مع العقرب رجى شوفة حبايبها
اشوف الظلم والخافق يعاني مثل عاشق نوت=واداري خاطر الغالين وابعد عن طلايبها
اقاسي ياخلف رمشن سحر قلبي مثل هاروت=ترك روحي بوسط الليل تشكي من غلايبها
علاج الروح برموشه واخاف انه يفوت الفوت=ولا يشفي صواب الروح غير علاج صايبها
لك الله ماهقيت الريم برموشه تشوتك شوت=لما شفت الحشى تومي غصونه في هبايبها
غدى جسمي من هموم الليالي ذابلن منحوت=تجيني من طيوف الزين في ليلي غرايبها
تراني ياخلف وسط الهبايب مثل غصن التوت=فزوعك او دنى يوم المقابر مع نصايبها

وكان هذا الصدى المتواضع

دخيلك ... خل ميت الحب ثاوي داخل التابوت=وانا جثة غرامي من زمن , راكز نصايبها
ولا تشكي غرام من لهيبه ذقت حر الموت=ترا الشكوى على ( مجنون ليلى ) ويش ثايبها ؟
تبث الوجد يا ( الراوي ) وانا ادفن وجدي المكبوت=ابين من مشاعر نكبتي : معشار غايبها
بعد سافرت في رحلة غرام وحجزها مثبوت=ذهاب بلا إياب... ورحلته ماشفت آيبها
لعنود من بنات أم الغزيل مرتعة بخبوت=رعت عشب الفياض اللي حما الحاكم عشايبها
جمع فيها المصور كل زين , وخصها بنعوت=وش آصف ويش أخلي من وصوف طاب طايبها ؟
اشوف الورد في خده ..واشوف بشفتيه التوت=واشوف الصبح في ليل تدلى اعلى ترايبها
رعى الله عودها الغض النشاش و خصرها المنحوت=وعينٍ كلما لدت وانا اسبح في غبايبها
وريقٍ بز مطعوم الحلاوة واذهل البسكوت=مظنة ... والا والله ما شرهت الحق ركايبها
شريفة جد , عد بعد , ما تنقاد للسربوت=حفظها الله عن يدين الخبيث : بحفظ شايبها
سلالة من يفكون التوالي طيبين الصوت=حديهم لا دعته المعركة ماقال : هايبها
شيوخ افعال , نسل ابطال , ماهي شيخة اهل بشوت=يهدون الصعايب والصعايب هم صعايبها
حوت خَلقٍ على خِلقٍ , كمال اخلاق , زين سموت=عذية عن سموم اهل الفساد وعن لهايبها
سبحت بحبها دربٍ حدرني وسط بطن الحوت=ولا ادري وش نهاية ما شبكني من نشايبها
اشوف ان العرب حلوا مشاكلهم على ( بيروت )=وانا مشكلتي الصغرى عجزت القى طبايبها
قصفني في سكود ولا قدر يقواه باتريوت=وبنت ( تمثال نصر ) بخافقي وانكفت خايبها
وهذي ثامن سنين العذاب بسيله المفلوت=عجز سدي يقاوم ما تهملع من سحايبها
دخيلك لا تعذبني بذكرى فراقها لا اموت=بقي شعرة عن جنون الهوى والقى عقايبها

وسلامتكم

[نايف الشبيعان]

الأخ العزيز خلف الغريب

صح لسانك ولسان الشاعر والراوي فوّاز الغسلان

صوت وصدى قمّة في الروعه والإبداع

أخي خلف يسهل على الشاعر المتمكّن نظم قصيده ذات القوافي الصعبه

ولاكن من الصعب الردّعليها بنفس المستوى من الجزاله

إلا إذا كان الشاعر التي أسندة إليه القصيده قمّه في التمكن والإبداع وبستواك الشعري


خلف الغريب قصائد جزلة بقوافي عسره صح لسانك ولسان فوّاز الغسلان

تقبل مروري وإعجابي بقصائدك

[الصقار]

الاخ الشاعر خلف الغريب صح لسانك ولسان الراوي فواز الغسلان
ومهما كانت القافيه صعبه فانها لاتصعب على شعار بحجمكم....تقبل مروري ودمتم بخير جميعاً

[هندي المقبل]

ابو خالد

بيض الله وجهك على ايراد هذه المساجله في صفحات هذا المنتدى

احيانا عندما يحاول الشاعر التكلف في القافيه يأتي ذلك على حساب المعني وجودة القصيده

الا مع الكبار فأن ذلك يزيدها جمالا وقوه

صح لسانك ولسان الشاعر والراوي فواز الغسلان

دمت بود

[عبدالله الحجيلان]

خلف الغريب



صح لسانك ولسان الراوي فواز الغسلان


اتمنى ان لاينقطع هذا الابداع


تحياتي

[محمد الدلماني]

الشاعر خلف الغريب


ابيات جزله ومجارة رائعه


صح لسانك

شيوخ افعال , نسل ابطال , ماهي شيخة اهل بشوت

يهـدون الصعايـب والصعايـب هـم صعايبـهـا ........



وصح لسان الشاعر والراوي المعروف فواز الغسلان

[ماجد الغانم]

خلف الغريب
صح لسااان الشاعر القدير فواز الغسلان .........

وصح لسااانك انت اخوي خلف على هذا لصدى الجميل

لله دركما ....امتعتونا بهذه المساجلة الرااااااائعة

تقبلا خالص تحياااااااتي