سلام الله على العذب الرقيـق الفاتـن الجـذاب
خوي الما وسط حلـم الحناجـر فـي بداياتـي
عدد ما ثارت امواج الحنيـن بقلبـي المرتـاب
وبانت في عيـون النـاس روحاتـي وجياتـي
سـلام الله عليـه ولا لحقنـي فالسـلام عتـاب
مدام انه رفـع راس الخفـوق وشـال راياتـي
تقـدم بالـدَلال ورقـة النسمـه ودق الـبـاب
وغنـى كـل عـرق لـه تحياتـي ؛تحيـاتـي
تفضل ياابيض القلب اسود العين احمر العنّـاب
وطنك وحرره واطلـق غرامـي وانتصاراتـي
تمكن واشهد انه ما تركني بين ضـرس ونـاب
عشقنـي واحتوانـي واحتـوى كـل انفعالاتـي
وقاني لفحة الرمضا وعدّانـي علـى المرقـاب
قراني صح واستولى علـى ذاتـي ومرضاتـي
غلبني بالهوى يااهل الهوى واثر الهوى غـلاب
الين اني كتبت اسمـه علـى غالـب سجلاتـي
ولكن حسبـي الله فالزمـان الصـادق الكـذاب
يدس السم فـي قلـب العسـل ويهـل عبراتـي
عطانـي ليلتيـن وقبلتيـن ودمعتيـن اغـراب
واخـذ منـي حياتـي واعتباراتـي وغاياتـي
حسبت انه حسب لي فالطريق الوعر الف حساب
ولكنه غدر بـي ليـن لخبـط لـي حساباتـي
وضيّعني من الجمّ القـراح الحالـي المنسـاب
وانا ضامـي وتشهـد نغمـة النـاي بعباراتـي
ويشهد لي هدير الدمع لا حوّل مـع المـرزاب
وتشهد لـي ليالـي خاشرتنـي فـي معاناتـي
وهو ما غاب عن عيني نظر عيني بدون اسباب
خذاه الواقـع اللـي حجّـم الفرحـه بنظراتـي
فقدته فـي دهاليـز الوجـع ومفـرّق الاحبـاب
فقدته؟لا فقـدت الشمـس واحلامـي ورغباتـي
فقدت عيونه الدعج وحنان الرمـش والاهـداب
فقدت انفاس ريحانـة غـلاه وسحـره الذاتـي
فقدت احضانه ومأمن ظلوعي من يـد الحطـاب
فقدت اللي رسم رغم الحـزن كـل ابتساماتـي
فقدته والله اني مـا لقيتـه مـن بعـد ماغـاب
ولا ادري حي ولا مات لو انه حي فـي ذاتـي
كما لو انه ابره فالبحر ضاعت وانـا الطـلاب
وانا غصت البحر حتى وجدتـه فـي كتاباتـي
ولو كان الحقايق مالها بارض الخيـال اطنـاب
ولكـن الامـل لازال يرقـص فـي مساحاتـي
ياربـي ياالـه الكـون يارحمـان يـا وهـاب
طلبتك بعـد غفـران الذنـوب ودمـح زلاتـي
تليّمني على العـذب الرقيـق الفاتـن الجـذاب
خوي الما وسط حلـم الحناجـر فـي بداياتـي
وتسكن ثورة امواج الحنيـن بقلبـي المرتـاب
وتكبر في عيـون النـاس روحاتـي وجياتـي
فيصل السواط
م ن ق و ل
08/12/07, (12:38 AM)
سلام الله على العذب الرقيق الفاتن الجذاب
العرض العادي
