بسم الله الرحمن الرحيم
هذي أول قصيده أشارك فيها في ساحه الشعراء واتمنى أن تنال إعجـــــــابكم
والقصيده كتبتها وانا في طريقي لأحد الديار الشقيقه وشفت في طريقي النياق يمينك ويسارك
والربيع اللي يشرح الصدر والامطار والخير فهاضت نفسي بهذهالقصيده
الحرب خدعه وأول الحرب شيطان = والعشق بلــوه وأول العشق شـــوفه
ونا عشقــت الصيد في كل الاوطـان = لكان طرد الصيد مابه كلوفه
بجيبن جديد ٍ محملن فيه غرضان = والجيب الآخر تاركه للسفوفه
جيوب شاص مطربله فيه شرعان = مصممه للصيد وضرب الجروفه
لخطيت في ممشاي نفد وشعبان = يقطع بليا لاتهزز كتــوفه
وخوة نشامى مابهم شخص طفشان = ولاحتى فيهم من علينا كسوفه
عيال وايل مشبعة كل جيعان = من حد واشنطن الى حد جوفه
شجعان خلقه والشجاعه لها شان = وكلن على ماقيل قضى ظروفه
نمر راع الذود ونشرب من البان = البان نوقن تطرب اللي يشوفه
منها مجاهيمن ووضح وشعلان = وتشوف حتى الصفر زولن يحوفه
وتشوف راع الشاص من فوق جيلان = يرقب على نوقه ويصفق كفوفه
فرحان بشوفتها ولاهوب زهقان = مبعد عن الديره بليا حسوفه
وياحظ منهو مالك اليوم رعيان = ويملك مع الرعيان ذود معروفه
ويبعد عن الديره ويبعد عن فلان = ويبعد عن اللي كل نفس تعوفه
ويطق طنب البيت في رووس جيلان = بيتن مسوبع كل شخص يروفه
ودلالن تمركى على شف نيران = مبهره بالعود وهيــــــل ٍ بجوفه
وتشرب من الفنجال من كف بطران = بطران منهو حاكره من كفوفه
تسلم يمينك ياذرى كل شفقان = شفقان في دله تمخمخ كيوفه
في جلسه قمرا بها الجو فتان = والضيف جانا معلقينن خروفه
وبعد العشاء كلن تجهز بقيفان = وكلن من الشعار يجمع حروفه
وبعد القوافي ثارت أصوات شجعان = وكلن من الشجعان يضبط صفوفه
في دحه يعرف بها كل ويلان = يوم الملاقى ويوم رد المخطوفه
وبعد القوافي والوناسه والالحان = كلن فرش فرشه ونامن طروفه
والديك صوت في تغاريد واشجان = ينبه الراقد في فرض يطوفه
وقاموا وصلوا والسفر مابعد بان = وشربوا صبوح الصبح من ضرع نوفه
وبعد الفطور كلن تمسك بحوران = طيور حر ٍ مشتهينن جزوفه
وركبوا مواترهم مع صقور جِدعان = يبون طرد الصيد وصيد الخشوفه
وحتى الحباري شوفها يسر الاذهان = لقام حورانن يباري طيوفه
وتشوف خرب ٍ دارجن بين ريضان = ولاشاف زول الطير أخمر بخوفه
في ساعة ٍ ترسل صقور وشيهان = وتشوف منهو يجدعه من سيوفه
هذي حياه العز من غير برهان = أهل الكرم والجود يسعدك شوفه
وإعدادها صلوا على خير إنسان = المبتعث للخلق هادي حلوفه
وسلامتكم
أخوكم / عبداللـــــــــه الصقـــــــري
01/05/06, (05:38 PM)
اول هبوط لي في ساحه الشعــــــــــراء
العرض العادي
