السلام عليكم ورحمة الله وبركاته,,
يحكى أن....
شاب حفراوي ...اسمه مصلح ....عمره...25 عــاش مصلح فترة الطفولة مثل باقي الأطفال بس يختلف عنهم في شيء واحد بـــس انه راعي شطحات
كبر مصلح وزادت شطحاته
كان من ابرز واهم وأحب هواية لمصلح هي الدوجة في سوق الخبول
مرت الأيام عاديه,,,نفس الروتين اليومي...نفس الشطحات نفس الدجة
كبر عقل مصلح وبدأت ملامح النمو تظهر علي فرته .....
ألين مافكر الولد انه يتزوج ...
راح عند أهله في البيت وقالهم السالفة...
مصلح بيتزوج يالاالهول …
"طبعاً من غير المتوقع أو من المستحيلات ابو الشطحات يبغي يتزوج "
فهمّهم مصلح انه بيعقل وبيترك عنه الشطحات والدجة<<<..اشك في ذلك ...
راح مصلح عند أمه,,,وقالها يا يمه إنا والله أني معزم أتزوج..وابيتس تدورين لي بنت أخلاق...وست بيت..وحلوه…
قالت ام مصلح ..ابشر يا وليدي مالك الا البنت اللي يحبها قلبك وانا ببدأ جهودي الاستخباراتية والتجسسية وقد اطلب الامداد والمساعدة من ام البياعي للبحث عن الزوجة الصالحة………
والله وتبدأ ام مصلح في عملياتها على ماقالت...
الخطه الأولى: عرس خلفه بنت عفاش بنت خال والد عم جارهم
راحت العرس..وتشغل الرادار ولا لقت البنت الزينه..والمناسبه لطلبات العميل ولدها
الخطه الثانيه:عرس اسير ولد عم حزن اللي يقرب لزيير بالرضاعه
راحت للعرس ولا لقت..
الخطه الثالثه: عرس جريدة بنت ما كلين ……
والله وتنبّش بين ذا الخشوف الين طلحت عينها على وحدتن عجبتها...وتروح ام مصلح وتنقز عليها..وتنقول(كفشتك ياسارقة القلوب)
حطت ام مصلح البنت هذي في بالها...(البنت اسمها..مغيضة..
طبعاًبعد مشاورات مع ام البياعي بحكم الخبرة السابقة لها بتوريط البياعي .... وهنا تم الاتفاق بين المخابرات النشمية والبياعية علي تحديد الهدف وافضل الطرق للوصل ليه وجس النبض
وتروح ام مصلح للبيت وهي فرحانه...وتقول لابو مصلح ترا لقينا لولدك بنت الحلال..ان شاء الله تكون شاغره ..
قالها روحي لبيتهم وجسي النبض..والله ذا الام ماصدقت خبر..وتروح لبيت اهل مغيضة وتسلم عليهم وهي تبي شيء معين وبتتوكل على الله
دخلت مغيضة عند ام مصلح...
وقالت ام مصلح في
ماشاء الله هذي مغيضة <<<والله مهيب سهله ذا العجيز كانه ماتعرفه
الله يهنيها بزوجها..ويرزقها العيال<<<تجس النبض ...
قالت ام مغيضة..لا بنيتي توها ماتزوجت
ام مصلح: وفي نظرات مليئه بالانتصار والقوة
: هـــــــــــــــــــع,,لقد نجحنا
وتقمز وتطلع من بيتهم من بعد ماسوت دمار شامل في البيت<<<اخذت اللي تبيه وانحاشت
وتروح ام مصلح لبيتهم..وتبشر ولدها مصلح وابوه..مصلح طبعاً فرح واستانس..والدمعه تفقع مقلتيه
وقال لابوه يبه يبه متى بنروح لمهم ابيها يبه ابيها<<<هذا وهو ماشافها مطفوق
قال ابوه خلاص جهز نفسك بنروح في اليوم الفلاني....
راحو لم بيت اهل مغيضة..وقالو لابوها ترانا ياطويل العمر..طالبين القرب منكم
قال ابو مغيضة..اي وحده ..
قال مصلح ..مغيضة ابيها والله ابيها واحبها ….
ابو مصلح :اسكت فشلتنا الله يفشلك...لاعاد تحتسي لايخذ منك موقف .
قال ابومغيضة..o.k<<<اقعد يالشايب مثقف الشايب .
قال ابو مصلح :ياابو مغيضة نبي النظره الشرعيه..نبي ولدنا يشوف بنتكم وبنتكم تشوف ولدنا.. الله يعين مغيضة علي هالشوفه.
قال ابو مغيضه ...حقكم ماطلبتوا الا حقكم...
راح مصلح وابو البنت في غرفه..ودخلت عليهم مغيضة..
البنت دخلت وهي مستحيه...ومصلح كان منزل راسه تحت من الحيا لي بقطع بعضه عندك يا مصلح ...حس فيها داخله ورفع راسه ويبس مكانه..خشب
مصلح شوي وعيونه تطلع من مكانها وهو يبحر عليها وفاغر فمه .
ابو البنت طبعاً غار شوي وحبتين...ويجره ويرميه عند ابوه..
والله ويروح عند ابوه...وقال لابوه قسمن بالله ان مازوجتوني مغيضة اخر مابيني وبينك …
قال ابوه اقعد بس فشلتنا قدام الرجال...خلاص اهجد بــس
قام ابو البنت يشرط..
ومصلح ماسكن جواله ويحسب
مهر............ 100000 (مائة الف ريال)
شبكه......... 20000 (عشرون الف ريال)
بيت خاص فيها........(خل نقول اجار وعلى حسب السعر)
صالة افراح........(ان خربتها 40000 ريال)
العشاء في العرس.....100000(عشرة الاف ريال)
طيب خل نقول..اذا انا موضف وراتبي 5 الاف ريال...واطلق بنك بيعطين قسط " ميه وثلاثين الف ريال "
واذا خربتها مع ابوي بيعطيني " ثلاثين الف ريال" ومصلحه مع اخواني " خمسه وعشرين الف ريال"
اكيد كذا يبي يبقالي واجد عشان تكمل فلوسي ….
دبر مصلح نفسه الين الله فرج كربته..ولقى من يدينه...فلوسه الحين جاهزه...
ملك على البنت..وبدا شغل التلفونات والو حبيبي واهلاً حياتي...
قالت مغيضه:: حبيبي صلوووووحه...انت وش سيارتك...
قال ددسن..موديل85 غماره
قالت وعــــ انا اركب ددسن ولا موديلها 85 من بعد الشبحات والفكس ارارت والجيوب
قال وش المطلوب بالظبط......؟
قالت غيرها ياحبيبي..واشتر لي وحده بدالها...
راح مصلح يلف المعارض معرض معرض...على امل انه يلاقي سياره حلوه ومعقول سعرها...
لقاله ذيك الشبح موديل 98 وبسعر حليو... وتدين.. ددسن اقساط وباعها واشتري الشبح
وكلم حبيبة القلب...
مصلح: الو اهلاً حياتي... وشلونتس غضوضي ...
غضوضته: هلا هلا صلصل ... اقول صلصولي وين بنروح شهر العسل...؟
صلصولها: ابد بنروح لمكه ونعتمر ونديور على عرعر وندحدر على الكويت ….
مغيضة :انااااااااااااااا اروح عرعرولكويت من عقب باريس وروما وجنيف ...انا دبي وهي دبي اذا بغيت اروح لها افكر...
مصلح : يعني...؟
مغيضة:يعني نروح لدبي..
سكر السماعه وراح من بكره لمكاتب السفريات يدور له..سفره على دبي...لمدة اسبوع...والله وصارت تكلفه" اربع طعش الف ريال....
تدين مصلح من البياعي ..وقاله ابردها لك بعد يومين ….صار العرس..وزف العروسه يالشبح الجديده …
والحين صار موعد شهر العسل ..
راحو لدبي..وقعدوا الاسبوع..وحللو الفلوس... ...
رجعوا لبيتهم..وانبسطوا وعاشوا يومين بالضبط...الا والحقوق المدنيه..تدق الباب وجروا مصلح من خشمه....
وتهمته " ادفع اللي عليك من ديون يالاثول"
والمسيكين يقاوم ويتحدى الصعاب...ويقول من اجل خاطر مغيضة ..كل شي يهون ...
وومغيضة تخلت عن مصلح وقالت...
لي موقد الدح لايقول اح .....وضاع مصلح من اجل عيون مغيضة
عزيزي القاري
هل مصلح علي صواب؟
هل مغيضة قصمت ضهر مصلح؟
ام مصلح وام البياعي غير مسولين عن النهاية المولمة
من ملفات الاستخبارات النشمية والبياعية
27/04/05, (11:45 AM)
مصلح ومغيضة قصة نهاية مولمة
العرض العادي
