ديوان الشاعر ::: متعب مطلق الركابي:::

[فهد السلقاوي]

ليا غبت

ليا غبت يجذبني هوا القلب قدام = ياليت شوف عيونكم منكتب لي

ماهو جفا لكن مقادير واحكام = هذا زمانن كم بلا الناس قبلي

يا زين وا قلبي تصرم تصرام = يا حيلة الله ويش ربي جلب لي

متولين عيني سهرها من العام = يومن داع البعد عنكم وجب لي

مال الغياب ومرمسه عنك الاعلام = وارخيت لك قفي سكت الود حبلي

اليا ذكر لي نظرتك بالتسلهام = بهاك العيون اللي شركهن نصب لي

تقول يزهم لك من الروح زهام = على معاطيش الضماير قضب لي

-------

يامال فرقا العين

يمال فرقا العين وينك وانا وين = ويني وينك ونت وينك وويني

من عام الاول ونت ياقرة العين = حتى وانا نايم بنومي تجيني

وشلون ابسلا ونت غايب زمانين = يرثا لحالي عقبك الشامتيني

مابين غار ونار اقاسي عذابين = بعدك علي وقاسيات السنيني

صابر وجاحد لي مع الوقت جرحين = وارجي عسا موعد لقانا يحيني

ياشين هالايام لوانها اتزين = الزين لا بده يعود لشيني

(انشعر راس ماطوره)

يالجتي لجة خلوج تجر الصوت = لها فوق خمس اشهور بالشبك مقهوره

على نواظرها بدي ليلها المكبوت = على ديارن بول الوسم ممطوره

ويا حن قلبي حن مورن طلع منحوت = قبل يطلع الطلعه خرب فيه ماسوره

ولهيب الحراره طيرت بوية الكبوت = الجو حامي وانشعر راس ماطوره

على الصاحب اللي شاتني بالموده شوت = مثل شوتة المهزوم لا شات له كوره

يبي يكسب الفرصه قبل لا يفوت الفوت = وجاب التعادل وهتفو كل جمهوره

عليه الله اكبر وسط عينه سحر هاروت = غمرني هواه وصارت النفس ماموره

خذا قلبي المزيون كني على ريموت = امسيرني برده ردايم على شوره

انا اشهد شهادة حق ماطاب لي قوت = وحالي رديه من هالايام مضروره

والفرق واجد ياعرب بين موت وموت = موتن غدر والثاني اسباب غندوره

انا انتل قلبي وانصرم عرقه المبتوت = معاليقي اللي تمسك القلب مبتوره

ان كان ذا طبعك

هاتي علومك قولي اللي تقولين = ما عاد للفرحه بعيني مواري

يا حسرة الماضي ولوعات بعدين = الويل صبري والجروح اعتذاري

ضاع العمر وانا احترق بين نارين = بحلان تايه بين ناري وناري


بين العذاب اللي مطاولني اسنين = وما بين صد تعلنينه اجهاري

يا قاسيه متى عليه تحنين= جيبي ولو مره للافراح طاري

ليتك مثل ماذقت مثلي تذوقين = المر والفرقى واهل العباري

مثل الحلوم ليا طرا وقتي الزين = ماله رجا ماهوب حول المحاري

وقت الوناسه والسعاده هاك الحين = ولا الشقى توه جديد الاثاري

الله خلقني من حساب الشقيين = زانتي خلق الله شقاي ودماري

رحتي جفا ماطرى لك تعودين = وجيتي وانا متمسكن في قراري

ان كان ذا طبعك تجين وتروحين = يبي يسير الياس شين اجباري

الرفيق

ترى الرفيق ليا تغير مع الوقت = ان ابرك الحزات حزت فراقه

ياصار ما ياقف بصفك ليا ضقت = عده عدو لوهو من ادنا الرفاقه

كم واحدن لا غاب عني تضايقت = وكم واحدن مليت كثر اختفاقه

يابو محمد يوم بالناس برقت = لقيت ضحك السن ماهو صداقه

ورتني الدنيا وشفت وتحققت = وقطعت مع بعض الكثير العلاقه

يرغبون التعاليل

انا من اللي يرغبون التعاليل = وكيف اتونس حالتي مستضره

واحظ عينن كل ما روح الليل = تنام مرتاحه بلين ومسره

طاف الرجا وتنا الليال المقابيل = والصبر راح ولا بقا منه ذره

انا زماني شفت منه الغرابيل = عيا البخت يجود لو كان مره

((جروح ظاميه))

مديت دربيلي على ماضي اطلال = جناح الوقت مضت وولت

حلمن حقيقي لكن ايامه اسمال = عدت لو عاودت ثم حلت

بقت رماد رسوم مضمونها زال = ترسبت في خاطري واضمحلت

ارجع لها بالذاكره عدة اميال =وزمت بي ابحور الخيال وتعلت

وتطاردت خيل القوافي والامثال = واجتاحت المكنون حتى استحلت

شربت من كيف الهواجيس فنجال = وسحابة شجوني نشت واستهلت

تهشمت وبروقها تشعل اشعال = وريضان صدري من مطرها تملت

هملولها لامن ضرب ناظري سال = ياليتها من قبل تمطر تجلت

نباتها ونه وترديد موال = وهموم تصرخ صابره لين كلت


وخريف نسياني رجيته ولا زال = يتلي جروحن ضاميه لين علت

الطريق الطايل

ممشا الطريق الطايل السمهدي = عجزت اعرف بدايته من مناهيه

وجنبت عن هاك الطريق المودي = تركت سيراته لناسن تماشيه

انا من الايام وش عاد ندي = الا اني افهم كل شي بمعانيه

هذا الزمن فيه العنا والتحدي = وكلن يشوف امن القرايب معاديه

مادام لي عينن نضرها يقدي = الله كفيل وكل شين يسويه

والضد يوجد له مع الضد ضدي = مافيه ضد الاوضده يباريه

وعسى الحسود اللي يسد ويلدي = دايم تعيس وبسط رزقه ينافيه

يانفس لوميني وانا مستعدي = لومي وانا قابل للومك وهاتيه

اعطيك عن بعض الممخاليق صدي = اجنب الدرب المحايدواخليه

متعب المطلق الركابي....