الله يرحم شايبٍ وصاني..!!

[عبدالعزيز السعود]

قال إنفعلت , وقلت روق وهدّي
لاتأخذ الموضوع مأخذ جِدي
إعرض عن الجاهل وخلك عاقل
فوّت كثير من الكلام وعدي
أنا مجرب خطةٍ مدروسه
إليا بليت بجاهلٍ متحدي
أقول يابن الناس ماني قدك
وانا ادري إنه صدق ماهو قدي
لكني ابعد عن جدال الجاهل
يغثني وإلا يبيّح سدي
وإلا بدر مني طوارف هرجه
يسمع بها العاقل وتحسب ضدي
وانا مع العاقل رصيدي عالي
اللي ليامديت قدّر مدي
ماودي أخسر من رصيدي عنده
لو إن ضَد الخصم غاية ودي
لكني اسمع هرجته وازهلها
وانا على دعواه جاهز ردي
خله يعوّد مقتنع بافكاره
واللي يجيب من الدروب يودي
وإليا زهمني قلت ماني فاضي
أمر وارد السلام معدي
بعض المجالس ماتناسب مثلي
أفضل من إقبالي عليها صدي
والله عن اصحاب الردى مغنيني
اجوع وآكل لقمتي من كدي
الله يرحم شايبٍ وصاني
ويقول هذي من وصايا جدي
من سار في درب الكرامه يكرم
ومن سار في درب الردى متردي
وصية الشايب وانا حافظها
من قبل مايبدي الشعر في خدي
واليوم أخذت من التجارب قسمي
واعرف حدود الناس واعرف حدي

[احساس قلم]

صح لسااااااااان شاعرها
قصيدة رائعه
واختيار رائع
اخي عبدالعزيز
دمت دوما بود

[عبدالعزيز السعود]

شكرا لك احساس ..وسعدت بمرورك العطر ..

[نافع عيد الجديد]

لاهنت على الاختيار الجميل

صح لسانك ولسان شاعرها

لك المعزه والتقدير

[بدرفهد الجعفري]

قصيده مليئه بالحكم والجزاله

صح لسان شاعرها وسلمت يمين ناقلها

[محمد الراجح]

استاذي ( عبدالعزيز )


الله يعطيك العافية على أختيارك الجميل وصح لسان شاعرها



محمد الراجح ,,

[سعد حجيوي]

صح لسانك ولسان شاعرها
مفردات ومعاني جزله