** طــــــير البـــــــــعـاد **

[سالم صالح]

الشاعر الرائع والاخ العزيز



سعد النفج


صح الله بدنك ومرور له طابع خاص في نفسي لاعدمتك يالذيب


وشهادة من شاعر يعرف طريق الابداع ويعتلي قمته


تقبل تقديري وودي

[سالم صالح]

المشاركة الأصلية كتبت بواسطة بدر صالح الخلاوي

اسوج رجلي للفضاء ودي اطير=وابعد عن عيون البشر والشماته
اضيق والضيقة تجي حزة عصير=الين مايومي تقوبع عبــــاته


اول شي كل عام وانت بخير ثانيا صح لسااااااااااااااانك وبيض الله وجهك شاااااااعر مبدع ولا انت بحاجة شهاااااادتي لكن يعلم الله انك اطربتني شهادتي فيك مجرووووووحه تقبل مروري ،،

الشاعر المبدع


بدر الخلاوي

صح بدنك وبيض الله وجهك على هذا المرور والاطراء الرائع من شاعر راائع و تاكد ان شهادتك تهمني بكل تاكيد


لانك شاعر راائع ولك نظره وهذا مايهمني



تقبل تقديري عزيزي وجل احترامي

[الخاطر]

المشاركة الأصلية كتبت بواسطة سالم صالح

كل عام وانتم بصحة وعافية


ابيات متواضعة اضعها بين ايديكم وكلي امل ان تحوز على رضاكم وترتقي الى ذائقتكم الراقية

ياشينها لاشفت حبك مع الغير=وردة حياتك ساكنه في حياته
يقطف من ازهار الحديقة نواوير=ويشم عطرٍ باقيٍ في سباته
وانتَ على حر الجمر والتفاكير=مابين اهات الزمان وعصاته
تعزف على لحن الالم بالمزامير=ويردد الاحساس فيكم عزاته
هذا انا والقلب والثالث يذير=طير البعاد اللي يرفرف شتاته
كني غريقٍ في وسط جمة البير=يرجي السلامة مير قرب مماته
ياشينها واجد على قلبي تغير=غارت رماح البعد هزت ثباته
ينزف وجع مع ويل واصوات تزفير=وتسمع شراييني تردد نعاته
مالي على نفسي جلادة وتفسير=سلمتها مابين دورة رحاته
اسوج رجلي للفضاء ودي اطير=وابعد عن عيون البشر والشماته
اضيق والضيقة تجي حزة عصير=الين مايومي تقوبع عباته
يوم الخميس اللي على القلب تعزير=قطع عروق الجسم بيّن خفاته
كله غلا لعيون شيخ الغنادير=اللي خذا قلبي وثبت غلاته
حتى نهب عقلي وانا اشوفه يسير=اتبع خطى وده واتابع خطاته
يومه مشى حكم القدر لازم يصير=والدمع وادع مع دموعي وصاته
مبروك ياحبي عسى ايامك بخير=وجعل السعادة ضحكتك هي نباته
باقي على عهد الوفاء خذ تقارير=من قلبي اللي مايغير صفاته
واذا بغيت اثار حبك بتصوير=هذا ترى جسمي وباقي رفاته

وسلالالالالامتكم

الله الله الله.
الله ياسالم.
وربي انك مبدع.
ياسلام ياسلام على هذا النص.
ياهو موجع جدا الى حد الجنون من الالم.
فراق رغم المحبه ومااصعب هذا الفراق.
لكن رغم كل هذا الالم كم هو جميل هذا الوفاء وتمني السعاده لمن تحب وانت على ماكنت عليه من المحبه فهي باقيه كذلك.
ياسلام ياسالم ياسلام.
مبدع وسجل اعجابي بهذا القلم.
اخوك محمد العنزي.

[مشاري بن فالح]

ياشينها لاشفت حبـك مـع الغيـر
..................... وردة حياتك ساكنـه فـي حياتـه
بس هالبيت له زلزال ...

صح الله لسانك
واعتلا شانك
لاهنت على الجزاله

شكرا لك

:

:

[خلف الغريب]

اخي العزيز سالم صالح

الف صح لسانك وسلمت ايها العذب..

اضيق والضيقة تجي حزة عصيـر
اليـن مايومـي تقوبـع عبـاتـه

صح لسانك يا ابو دانة وحلو هالتعبير ( يومي تقوبع عباته )


مبروك ياحبي عسى ايامك بخيـر
وجعل السعادة ضحكتك هي نباتـه
باقي على عهد الوفاء خذ تقاريـر
من قلبـي اللـي مايغيـر صفاتـه
واذا بغيت اثـار حبـك بتصويـر
هذا ترى جسمـي وباقـي رفاتـه





صح لسانك عموما وابيات جميلة رغم ألمها الواضح ..

تحياتي وودي ..

[سالم صالح]

المشاركة الأصلية كتبت بواسطة **masha3el **

يوم الخميس اللي على القلب تعزير
قطع عروق الجسـم بيّـن خفاتـه
كله غـلا لعيـون شيـخ الغناديـر
اللـي خـذا قلبـي وثبـت غلاتـه
حتى نهب عقلي وانا اشوفه يسيـر
اتبع خطـى وده واتابـع خطاتـه


الشاعر الرائع والمبدع
سالم صالح
كل عام وانت بخير وبصحه وسلامه
وصح لسانك الى ان ترضى على النص العذب

ابداع ... قصيده قمه ..
شاعريه وعذوووبه جميله وراقيه ..
ابيات تحمل الكثير من العاطفه
كلمات لامست القلب والمشاعر
بصمه رائعه لشاعر مقتدر
ابيات تنطق بالاسرار ولا املك سوى الاعجاب بحرفك الراقي
واتمنى تسجيلها صوتيا
تحياتي لنقاء حرفك العذب
اتمنى لك التوفيق
تحياتي ومودتي

الكاتبة المميزة


مشاعل



شكرا على هذا الاطراء والمرور المميز وصح الله بدنك



كل التقدير والاحترام

[سالم صالح]

الشاعرة / فاطمة الجعفري


صح بدنك والله لايهينك على هذا المرور الراائع والاطراء المميز


تقديري