الشيخ برجس بن عرعر الضبيان

[سعد الدهمشي]

صوره للشيخ برجس بن عرعر الظبيان مع سيدي صاحب السمو الملكي الأمير نايف بن عبد العزيز آل سعود

برجس رجل المواقف رجل الوفاء رجل الصخاء رجل الكرم رجل المواقف الخيره من نصر للمظلوم وردع الظالم برجس ابن عرعر الضبيان شيخ يستاهل المدح والثناء أسال الله ان يمد في عمره ويمنحه الصحه والعافيه ويوفقه لكل خير..

برجس الشبل الشمالي هو زبون الكايدات=ليث غاب مايهاب وللمخاطر يدحمي
عز منهوا يلتجي به من ظروف جايرات=عقب غبنه عند برجس يعيش وينعمي
شيخ محنك وساطي والمراجل له سمات=نظرته لامن تدنت دوم فوق الأنجمي
لانصيته مايدور للأعذار الواهيات = وليا نخيته لو على الموت المحقق يقدمي
وارث طيبه وراثه من عصور فايتات= والشجاعه ورث ابوه واشهد انه مغنمي
والمراجل موهبه والصفات أهي الصفات=عسى عود جاب برجس يثاب ويرحمي
عرعر اللي لعتلا في ظهور الراجفات =يرغم العدوان تخضع له ولا يرغمي
شيخ قوم لعتلوا فوق قب مكرمات= العدوا يرجع ذليل ويهان ويهزمي
الأسود الضاريه طايلين الطايلات = والفعايل شهاده مهو هرج يزعمي
محلف ربعه رجال كالحصون الراسيات=من لفاهم زال همه يعز ويكرمي
عقب خوفه تهتني عينه بلذ السبات=وخصمه عيونه شقيه من منامه تحرمي
كسبهم جل المراجل ماانزلو يم الفتات=الدخيل ليا وصلهم بعز ويسلمي

زعال بن جهيم المضياني العنزي

من شيوخنا يعرف اللوازم وقانون =شبل لعرعر من سلايل ضبيان
شيوخ بحزات اللوازم يبينون =بافعالهم يوم الحرايب والاكوان
برجس زبون الطيب بالعسر والهون=يسلم جنابه من صواديف الازمان
اللي دعا شيوخ لبيته يسيرون =ومعهم دعا رجال الحمايل والاعيان
برجس يحيي والجماعه يحيون=بضيوفهم كلن مكيف وطربان
وقدم لهم جزل البعارين بصحون=زود على جزل الذبائح من الضان
شيوخ لصعبات المواجيب يمشون =ياما افتحوا بيبان رزق لجيعان
وياما اطلقوا من غيهب السجن مسجون= وياما أصلحوا بين القرايب والاخوان
وياما زبنهم من وزاء الوقت مديون=وفكوه من سلطة غضب كل ديان
شيوخ العرب عن كل هيف يذرون =حرز القلوب اللي بهم خوف واحزان
يومالقبايل للمشايخ يراعون = متحفظين بالفضائل والإحسان
عن الشجاعه والكرم مايتخلون=وشان الحيا ماقل وزنه ولا هان
وعن الرذايل والمناكير ينهون=ولاداج بين بيوتهم كل سكران
وشبابهم في منهج الطيب يمشون=ماقحصوا بين المدينه والأسكان
وعلى الشرف عن كل عيب يخافون=شباب لكن فطنة قلوب شيبان

بشير محمد الحجر

وان دعانا الشيخ برجس كل شي ضايل =قلت من يمناي غير اجيه في ديوانه
ناحر الجيب النفود وخطها المتايل = وحط نجم الجدي شاريه على حجانه
حفلة لمت بني شمر مع ابناء وايل =كل واحد يعتبر غالي وبين اخوانه
شوفهم شي تبيه اعيوننا وتخايل =والدليل انفوسنا واقلوبنا فرحانه
كل منهم للمعزه والمراجل نايل =ياخذ اللي يعجبه من طيب في ذرعانه
اهل الفعل المشرف والعقال المايل=وارث كل المفاخر ورث من جدانه
يومهي مابين صايل بالزمان وجايل=فعلهم يروي كبود طولت عطشانه
وسلم الله برجس للمهمه شايل =شيخ واصله شيخ من خاله ومن عمانه
يستحق إنا نجيه اللي ذراعه طايل =من قرارة نجد جيت وجيتي من شانه

كريم بن رحيل عوض العنزي

الشيخ برجس للكرامه دعاهـم=من العاصمه للجوف لحدود حايل
لبوله الدعوه وجوا من قراهم=من ديرة الشملي وبيضا نثايــــــل
فرحوا اهل عرعر ونور سكاهم=والدور يضوي نورها له شعايــــل
وتباشروا بقدومهم من غلاهــم=اهل الشهامه والعلوم الجزايـــل
واهدافهم يدري بها كل فاهـــــم=غير التعارف مالهم من وسايــل
سلايل الاجواد نطلب عساهــــــم=دايم بعز ويدركون النــــفـــايـــل
اللي على العادات ربوا ضناهــم=عبر الزمن ماسلم الاجواد زايل
رب العباد من الفضيله عطاهــم=عاداتهم بالطيب فعل الجمايـــــل
افرادهم وشخوصهم وأوموراهم=الكل باعه بالمواجيب طايـــــــل
عز الغريب الليا نزل في حماهــم=ريف الهواشل مكرمين النزايــل
صانوا شرف جيرانهم وقصراهـم=الجار يمدحهم ليا شد شايـــــــل
زبن الدخيل وضيفهـــــم ما شناهم=لهم بجزلات المعاني عمـــايـل

عبدالله بن دهيمش بن عبار العنزي

مرحبا ياشيخنا راع الجمايل=ابوزياد اللي على الطولات رايد
مرحبا به عد هطال المخايل=وعد ماصوت سحاب بالرعايد
وعد نبت بالفروع وبالمسايل=وعد ورد مثل صفات القلايد
برجس اللي بالكرم جاب القبايل=ابن عرعر شيخنا بالطيب زايد
من جنوب المملكه لحدود حايل=وغرب العزام بالدعوه وكايد
أرسل المرسال وكد بالرسايل=من شمال وشرق لا نواع البدايد
حر من ماكر حرارِِِِ له فعايل=زاهي يزهاه منظوم القصايد
القطامي ياهواء يصيد الجزايل=صيدت الجزلات له طبع وعوايد
شيخنا يتعب على كسب النفايل=مايهاب الطايله للطيب قايد
ماكره طيب وساسه من حمايل=مايبي شرح المعلم والشهايد
ذاع صيته وانتشر عبر الوسايل=وانتشر ثم انتشر عبر الجرايد
من فعل يمناه كسبه للخصايل=وافي بالعرف رمعاته بعايد
جده ضبيان لفعاله دلايل=كم عدو شاف من فعله زهايد
والأبو عرعر على القب الأصايل=ياصل الجمعه وعنها مايحايد
طامع للمرجله للطيب نايل=ماتذوق للكرى فوق الوسايد
يطربه صوت المشوك بالفتايل=في نهار بالحشاء عقب لاهايد
راعي البلها ثنى عند الرحايل =من يطب حماه مال جمعه شرايد
عقب شيوخ هدفهم كل طايل=حاصدين المرجله حصد الحصايد
ماوضعوا لسلومهم حد وبدايل=جاهزين للصعايب والشدايد

عقيل بن طلاع اللميع

برجس ابن عرعر لزوم انتنـصاه= وان ماحضرنا نعتبرها فشيـله
طيب وفيه الطيب من ساس مجناه= كحيلان شيال الحمول الثقيله
عاشت يمين الشيخ والعفن يفداه= مثل الحصان لاتعلى صهيـله
من ماكرن فيه الشجاعه من اقصاه=من عهد غازي يكسبون النفيله
مثل الشعيب لاتحدرمن اقصاه=يروي ويغرق من تعرض مسيله
شيخن لسبع جموع مابه مراواه= عيال المحلفي كلها تنتميله
وان حل بعض الحال بالروح نفداه= مثل الجبال الراسيه نرتكيـله

-----الى ان قال

تقدير لك ياصاحب القدر والجاه=برجس برز مثل القمر وسط ليله
الله يفكه من صواديف دنياه= خضره بوجهه مثل مجراء المسيله

غاالي الذايدي

اللقا عسير القاف لـصرت محتس=الشعر من الله ولفكـر ماشريته
من واهسي اعروق قلبي تمسس=مس الشعر على العمد لا متيته
مشيت انا لهدلان كوكب ماهو رس=انهى المشاكل كلها يوم جيته
يفوز بالناموس والطيب برجس=أبوزيــاد الهيلعي لا نخيته
مثل البحر لازام جاريه يرجس=خلايف لضبيان ماهو نبيته
الـلي اطـلق المسـجـون يـومـنه احـبـس=لـولا الله ثـم لـولاه حـياه مـيـتـه
ابوه شب النار فعله ماهو دس=جاءت الجرود ونوخت عند بيته
جاب القضاء كحيلان ضدا للي هس= عند الحكومه فاز صوته وصيته
اللي تكلم بالغلط قيله بس=وفعله نضى على العقول الهتيته

شايم عيد اللميع

يامرحبا باللي حضر ياهلابه=مبدأ كلامي ياهلا حاضراً كاش
أهلاً وسهلاً عد وبل السحابه=واعداد مايفرش على الأرض بفراش
خوينا والجار مثل القرابه=سلم قديماً مانساويه بالاش
برجس جمع للطيب زود الحبابه=يوم الردي عده مع الناس ماعاش
ا شيوخ محلف عز وايضاً مهابه=ماصابهم عند اللقاء ذل وارباش
ما يلحق الجيران منهم طلابه = ولا راح جار للضبيان بهواش
فزعتهم تجيك مثل الذيابه=مايمدي اللي ناوياً كسب ينحاش

مفرح بن قيران الدهمشي العنزي

سلام ياراعي الوفا والجمايـل=برجـس جميلـك مانسينـاه لله
اقولها للنـاس والشـك زايـل=من لاشكر هالناس ما يشكر الله
طيبك غمرنا ياحلي الخصايـل=دين علينا كيف نقضيـه كلّـه
برجس ليا صارت علينا قوايل=هاك الجبل كلـن تفيـا بظلّـه
جمع شيوخ ٍ من جميع القبايـل=حل الذي كل ٍ عجـز لايحلّـه
انا اشهد انـه للتناعيـم نايـل=من طيب فعله كلنا فـدوة ٍ لّـه
ماهي غريبه ياعريب السلايـل=وانت الكرم والطيب فيكم جبلّة
ماهي غريبه دهمشي وبن وايل=اللابة اللي يرفضـون المذلّـة
ماهي غريبه من كبار الحمايل=عياش والعياش للمجـد سلّـة
ماهي غريبه من خيار العوايل=لا هنتو ضبيان سيـف ٍ ودلّـه
ابوك قبلـك كاسبـن للنفايـل=عرعر وعرعر صفحة ٍ مستقلّة
مجد ٍ عريض موثقن بالدلايـل=درب ٍ سماح وكل ابونا ندلّـه
الطيب كايد مايجـي بالسهايـل=وابو زياد الطيب دقـة وجلّـه

جمال بن خليف اللميع

انا الذي مدحت برجس بالامثال=قوله وفعله ومنطقه جايزلّي
هو الذي يافي كلامه ليا قال=وافي صدوق وكلمته ماتزلّي
والله يالولا عندنا بعض الاشغال=ونوب تمنعنا اظروفنا مايحصلّي
مسيار يمه يشرح الصدر والبال=ياجيت يمه في محله يهلّي
في مجلسه تلقى معاميل وادلال =ونفسه خفيفه وخاطره مسفهلّي
والمدح يزهى بالنوادر والابطال=والاّ الردي يالقرم خله يولّي
لوهو ولد عمِ وإلّا ولد خال=ودك يولي عنك ورى حولي

زعل محمد الجعفري

عـنـد مـن يعجــبك فـعلـه بـالمـهـــــاش=يـعـتلا قــب الاصـأيـــل يسـتهـــيــــش
عـادتـه ذبـح الـجزيــل مــــن الكبـــاش=مـن فـعــوله دايـمٍ خصـمه غـشـيـــــش
ومـن يجـيـله يلقــى في بيـته معـــــاش=كم ضـعيـفٍ عنـد بـرجـس يستعـيــــش
نـسل عــودٍ ياعـتلا البلها وشـــــــــاش=يــسـقي العـدوان مـن سـم الحــنيـــــش
وكـل دربٍ يسـلكه لــوهــوعكــــــاش=نـســلـكـه وراه مــانــسـال ولــيـــــــش
ربــعـي العيـاش خــلـفه يسـتهــــــــاش=ولا نـخـانا بـالمـلاقــا نســتهيـــــــــش
مــثل مـزنٍ عـقبه البـــيـداء هشــــــاش=وكـل قـاسي عـقـبنآ يـرجـع هشـيـــــش
مجــدنا ماجاء عـلى جلســة فــــــراش=غــيرفي ضرب المصقل فـوق جيـــش
والعدومعــنا تــــرى مالـــــه مهـــــــاش=ان كـســبـنــا العـــزوالا مانعــيـــــــش

محمد مونس اللميع

ابوزياد الطيب بالفعل زاهيه=طبع الكرم والجود للشيخ عادات
حرا تربا في عوالي مجانيه=يسمع بفعله من يعرف العمــــارات
لايابعد غمدن كبار علا بيه=تشوف سياته ولا منه حسنــــــات

بشير محمد الحجر

سميت بسم المنفرد بقتداره= الخالق اللي يبدل العسر بيسار
علَام ما بليله واضح نهاره=رب السما رب الملا مدير الادوار
اللي حجب فرعون عن لمس ساره=مرسل هداه لصفوت الخلق بالغار
ويوم اقدم النمرود لاشعال ناره=بقدرته عن الخليل اثلج النار
امجير من يلجى لقداسة جواره=اللي رفع راية نبيه والانصار
سميت بسم الله قبل العباره=ومليت موضوع على وزن واعيار
اوجزت نص مثل نقح الحجاره=وطعمت ما وجزت بزمرد ومحار
اترك هزيل القول واملي خياره =وليه يلين الملتوي لين دهدار
في رحلة ماهي سياحه ازياره=من غرب حايل لـبن ضبيان زوار
الشيخ برجس تلبيته تجاره=شيخٍ طلب منا المبادر بمسيار
ماردنا طول المسير ومساره=بمواتر تطوي طويل اسود القار
زرنا لشيخٍ مايهاب الخساره=من شيوخنا لويلان وافين الاشبار

سلمان متروك العودان العنزي

يامرحبا ترحيبة مالها نـــد=من عد شعر فاق كل العدودي
عليه جزلات المثايل توارد=مايضطهدهن كايدات الورودي
ترحيبة من شاعر صادق الود=احلى من النسمه ليا هب نودي
باهل المواقف والحسام المجرد=صلبين الارياء طيبين الجدودي
سم اللذي من زود طيشه تمرد=يرسون في وجهة سوات السدودي
عز الصديق وللمقرد مقرد= ومابينهم نجس النواي شرودي
وليا اقبلو بضهور قبآ تلاكد=افعالهم للخصم دايم تكودي
وفعول اهلهم من قديم تردد=وفعالهم عن فعل اهلهم تزودي
مثل البحر مابين جزرة مع المد=لاهاج من طبه ابد مايعودي
وليا انتخت من تنقش الوشم بالخد=وثارت لهب نيرانها والزنودي
يردون حوض الموت علم موكد=صغيرهم عند الملاقا زهودي
يارد على الموت الحمر مايتردد=ستر العذارى ناقضات الجعودي
عند اللذي يعجبك طيبه ليا مد=اما كسب للعز اوما يعودي
شيخ كسب عزه من ابوه والجد=فهود خلفتهم نوادر فهودي
برجس كعام الخصم حرا ليا هد=ليث ليا دارت رحاها محمودي
ليا بانت الاضداد يظهر لها ضد=اعداه مكسبهم كثير اللهودي
هداج عد وبرجس الطيب له عد=عد على هداج تيماء يزودي
وهو مزبن اللي جاه ضايق ومحتد=سيل زما من فوق كل السدودي
مثل العلم فوق الميادين لا مد=شامخ ويشمخ ما لقيله ضدودي
وصلاة ربي عد مالورق غرد =على الرسول اعداد وبل الرعودي

محمد مونس اللميع

عليك برجس ليا ضاقت محايلك=مايعتذر لا جيت يمه بليهان
ماهو ولد عفن ليا جيته يفشلك=التجربه اكبر دليلاَ وبرهان
يالنادر اللي نادرات فعايلك=يدوم راسك ياسلايل كحيلان
وافي ومجمل وانت ربك مجملك=حليت لي وضعي وانا كنت بلشان
قدرك رفيع وعاليات منازلك=ترفعلك البيضا على راس مابان
والله ماني بالحقايق مجاملك=فعل على وضح النقا شوف الاعيان
ياشيخ نبي بالقصايد نمثلك=يالكامل الوافي ياطلق الايمان
ياشيخ محد ينكر وجودك ويجهلك=شيخ ولد شيخ سلايل الضبيان
اقولها ماهي سوالف هل السلك=تاريخكم معروف من ماضي الازمان

زعل محمد الجعفري

[أبو غرام]

الشيخ ابو زياد يستاهل الطيب والمدح والثناء

وهو من الطيبين المتواجدين بين ظهراني القبيله

نسأل الله لو التوفيق الدائم

ونشكر لك اخي هذا الابداع الموضوعي المتكامل

حول الشخصية الرائعه

ابو زياد

دمت بود يالبناخي

ولاحرمنا الله جديدك وتواصلك

اخوك

ابو غرام

[سليمان الجعفري]

والله مليارنعم بالشيخ/ برجس الظبيان

يستأهل المدح واكيد ان الشعار مامدحوه إلا وهو شخص كفو

والنعم بالمادح والممدوح ويحق لنا ان نفتخر بهم جميعاً

شكراً اخي العزيز/ سعد الدهمشي على المجهود الرااائع ..لاهنت يالغالي

للجميع اجمل التحايا والاحترام

[خلف الغريب]

الف نعم بالشيخ برجس بن ظبيان ولا يستغرب منه فعل الطيب والعلم الغانم ..
شكرا للعرض الجميل اخوي سعد ولا هنت..

[الــهــنــوف]

والله ومليون نعم

يستاهل الطيب

تسلم أخوي يعطيك العافيه يارب

[ساجر الحثربي]

ياحزامي ومسندي جعلكم ززززززززززززززززززززود
ولك مني كل الشكر

[عوض بن خميس]

ونعم بالشيخ برجس الضبيان
لاغرابة نجوم وكل ماافال نجم ظهر بمكانة نجم اخر
دام عزك ياقبيلتى العظيمة (عنزة) فانتى دائما منجم للشيوخ والابطال والمبدعين.
شكرا اخى سعد الدهمشى . تقبل تحياتى