هـمـس الـعـتـب،،،؟!

[صالح العرجان]

عيوف


العتب على النظر ؟!



يبادلني غلاي بنار هجرٍ جمرها وقاد
.................كثر ما أعطيه حب يزيد في بعده ويجفاني


بمقياس الغلا صرنا أنا وصويحبي أضداد
.................تناسب بيننا عكسي.. ليا من جيت خلاني


أجيه وكلي أشواق وحنان مكتسية وْداد
..................بقلبٍ ذابت عروقه بعد ما طال حرماني


من اللهفة على شوفه اجيه أسابق الميعاد
............تسابق خطوتي نبضة فؤادي ورعشة أجفاني


و أحاول بالكلام ارسم صور وارسم لها أبعاد
..................وقبل أقولها تنطق عيوني وتسبق لساني


اسولف له عن الحب ويسولف عن فرس وشداد
.................يقول : الحرب كانت بين جدانك وجداني


و أقول أرجوك يا عمري شتاي بداخلي يزداد
...............أبي ليلة غلا تنعش حشاي و تدفي أركاني


أبي ساعة دفا ودين الوله له خافقي سداد
......................طلبتك يابعد عمري علشاني علشاني


أنا أترجاه ويكرر أنا لي لابةٍ أسياد
...................غزوكم ثم سبوكم واسالي فلتان وفلاني


عساهم مانسوا جيشٍ عليهم عاديٍ منقاد
.....................ويستطرد أنا لي لابةٍ شجعان فرساني


واقول ونعم يا عمري تراكم كلكم قياد
......................قرومٍ كلكم يا سيدي فرسان شجعاني


وركز نظرته فيني .. يناظر والعيون حداد
................بعد تستهزئين بهرجتك تشنين عرباني ؟!


نسى أني بنت عمه و ألتقيه بخامس الأجداد
...............يبي يغضب علي بأي صيغه لو هو الجاني


سكتْ .. وهو سكت مثلي يحسب السالفة بعناد
............وقال أنتي بديتي الهجر ... وقلبي منّك يعاني


تركني تنزف جروحي ولبسني طعون جداد
.................شكيت ونقض جروحي ولوعني وبكاني


وسبقني يشتكي مني مثل ما هو على المعتاد
............أجل لو كنت جارحته أنا وش كان سماني؟!!