صورة وقصيدة

[سندريلا]

البارحه كني عـن النـوم ملـزوم
والنوم اشوفه بـس عيـا يجينـي
ناديت قلت اشفيك قال انت محـروم
حالك حزينه وانت شكلـك حزينـي
اشوف في خدك علامـات ووسـوم
ترى دموع الحـزن خلتـك شينـي
قلت المحبه صابت القلـب بسهـوم
ومن كثر تفكيري صنعت الونينـي
ابحرت في مركب من الحزن مثلـوم
وعلى محيطات الهـوى سابحينـي
وهبت على المركب معاصير وغيوم
وضاعت مجاديفي وتعبـت ايدينـي
واصبحت مثل اللي يتيم ومضيـوم
ما له عويـن وحالتـه بالمهينـي
والموج زاد وقلت يا موت معـزوم
والموت قبل إنـي عزمتـه يبينـي
قمت اتشهد كنـي اليـوم معـدوم
وش حالة المعـدوم يـا عارفينـي
والمشكله ما نـي بسبـاح واعـوم
حوت البحر يبغى الغداء يحترينـي
يا حوت جاك الرزق يا حوت مقسوم
تكفى طلبتـك روح خلـك عوينـي
ما بي عواذيلي يقولـون مرحـوم
اللي كلاه الحـوت ذيـك السنينـي
يا حوت نبغي فزعتك جاك مكلـوم
جرحه جديد وجـاب جـرحٍ دفينـي
نبي تودينـا علـى شاطـي القـوم
وإلا تـرى ليلـي معـك ليلتينـي