(( مشب اخو شاهه....!!

[عبدالله الفهد]

ابو عبدالله مساك الله بالخير


مجلسك عامر بالعلوم الغانمة


ماشاء الله عليك مرجع تراثي ولاتقتني الا جواهر التراث


عطنا فنجال وانا اخوك

[صالح العرجان]

عبدالله الفهد


حي والله هالراس وانا اخوك ابشر بفنجال وبدلال بغداد بعد !


ابيات للشاعره جاذبيه



مـدام كفّـي بالعطـايـا محـنّـا
ماآخون معطيني ولاآخون حنّـاي

واللي عطانـي بـس مـرّه وثنّـا
أعطيه ماآحسّب لكثـرة عطايـاي

كثر العطـا لا جـاه منّـا ومنّـا
يحتار في رد الجمايـل لشـرواي

وأنا عطيتـك مـن قبـل لا اتّمنّـا
لين ازعلت يسراي من طيب يمناي

الجـود فـنٍ فيـه طبعـي تغنّـا
ولا طربت لعازف العود والنـاي

أقصر خطاوي من عشانـي تعنّـا
من قبل يمشي لي تسابق له اخطاي

لو هو بعيـدٍ عـن معالـم وطنّـا
احسّه اقرب لي من دماي لأعضاي

أرتاح في قـرب الوفـي وآتهنّـا
ولاآدوّر الاّ ارضاه من بعد مولاي


وسلامتك يا الذيب

[صالح العرجان]

الفنجال هذا لعضو كان من الموسسين الاوئل للمنتدى ولكن هي الظروف

من حدت به شوي عنا وعساه لا شرب فنجاله وساح باله يجوز له مقاعده ؟!



لا طار طيرك بالسمـا لا تفاخـر
والطير ما كـل الهبايـب تسـرّه

عمر البحر ما هاب كبر البواخـر
وابليس عمره ما كفى الناس شـرّه

إن كان بحرك بالجزيلات زاخـر
غيرك مَلَك بحره .. وجوّه .. وبرّه

وإن كان مجلاسك على بساط فاخر
لا بد مـا سـود الليالـي تجـرّه

يا الشاعراللي من هَكَالجيل ساخر
اللـي قصيـده بالمجـلاّت غـرّه

الجيل الأول (مدرسـه) للأواخـر
و وهُم موطن إبداع القصيد ومقرّه

لكن كلامك يكشف الوجه الآخَـر
للحاقد اللـي تشتعـل فيـه حـرّه

ما يستوي بالصف الأوّل والآخِـر
واللـي عَـرَف قـدره فللـه درّه

يا شاعرٍ بفراش وهمـه يشاخـر
أصحى .. ترى تفّاحة الوقت مُرّه

غيرك يجود بطيبته وانـت ذاخـر
ودرب التواضع خطوتك ما تمـرّه

تواضع .. اترك رافعين المناخـر
وثوبٍ يضيّـق منسمـك لا تـزرّه

روس المشايـخ تنحنـي للمباخـر
ولا انقصت من هيبة الشيـخ ذرّه

[عبدالله الفهد]

مساكم الله بالخير جميع


ابو عبدالله ولايهونن باقي الاعضاء عندي سالفة تدل على الوفاء والخوة الصادقة


وقد حدثت بين شمري ومجموعة من الدواسر




فعل الدواسر بخويهم الشمري


في فتره حرب اليمن في عهد الملك فيصل رحمه الله كان جماعة من الد واسر وأكثرهم من الو داعين وهذا يدل على كرم هذه القبيلة انه حدث عام 1962م –1383هـ اندلعت حرب اليمن وان قام كلآ من حمد بن هندي الودعاني وحمود أبو فاس الودعاني ومرضي بن محمد بن شماء الودعاني وابنة محمد بن مرضي الودعاني وفهيد بن راشوف الودعـاني وفرحان بن سفرالشــكره ودغــش بن محـمد ال شــاهرالصخابره وجــميعهم من الد واسر وقد كان برفقتهم خالد الشلقان الشمري واخوه حمود بنقل قوات عسكرية واعتاد العسكرية من نجران بأمر الأمير خالد السديري الدوسري رحمه الله وكانو جنوب الرمله اعلى بيحان وهو مكان خوف وخطر حيث أن طائرات العدو تلاحقهم وكانت ترميهم بالسلاح الثقيل وكانو يقاومونها بشده وفي الرجعة صادف وان تعطلت سيارة خويهم الشمري التي انفجرت ماكينتها ووقف وجميع الخويا و رما كل منهم بمفتاح سيارته عوض لخويهم الشمري فرفض الشمري وحلف ما ياخذ سيارةأ حد منهم وقال لهم باحرق السيارة حتى لايستفيد منها العدو ورفضو أخوياه وهم لا يستطيعون التفرغ بإصلاحها للخطر والخوف فقسمو السيارة عدة أجزاء بينهم وعندما قربو من نجران امنو من الخوف اعادو سيارة خويهم الشمري إلى حالتها وعندما علم الأمـير خالد السديري الدوسري بفعلهم قال لهم بيض الله وجيهكم فيما فعلتم بخويكم ثم التزم باصلاح سيارة الشمري وتركيب ماكينة لها وقام باعطائة مبلغ من المال وهي كعوض له في سـيارته وشـكر
الد واسر على فعلهم إلي يبيض وجيهم ؟



فقال خالد الشمري هذه القصيدة



ياحمود هات الفرت واكمل زهابـه
كمـل زتاتـه يازبـون المشافيـق
اسرح عليـه ولاتحـن الوطـا بـه
اجنب عسى دربك ودربـه توافيـق
صلهم ترى الممشى يبي من هقابـه
خص الى زانت دروب الطواريـق
انص السديري زبن من هو لجابـه
سعد الركاب وسعد اهلها من الضيق
سلم عليـه اعـداد منشـي سحابـه
وما ورقت لشجار من الوبل توريق
قله ترى فعله فخـر مـن حكابـه
فعل على عـزم الردييـن ماطيـق
ثم ثنهـا ياحمـود فهـل الحزابـه
دواسـر قامـت بفعـل المطاليـق
سلـم عليهـم كـل منهـم بنـابـه
سلام احلى مـن غبـوق المفاهيـق
ياويش اقول بمـدح سربـة اذيابـه
يوم استناخ الفرت ثم نشف الريـق
تعصبـوا والكـل يضحـك بنابـه
وقالوا لي ابشر بالفرج ساعة الضيق
الفـرت حطـوه الذيابـة انهـابـه
كـل يعلـق نبلتـه فـوق تعلـيـق
شالـوه ربـع للخطـر ماتهـابـه
حتى الكرد شالـوه ماواحـد عيـق
كل يقـول الفـرت عنـدي وانابـه
خويـنـا مايلحـقـه دوم تعـويـق
يالبيـض ياللـي تنقـش الخضابـه
بالله عليكـن للنشامـا عشاشـيـق
ياكيـف ممدحهـم وازيـد الثنابـه
من حد,,حايل,, لين حـد العواليـق
مدح علـى فعـل ينومـس جوابـه
ماهوب حكـي مايعـزز بتصديـق
يستاهلونـه بالثنـا والـوفـا بــه
مدح الى جا الصدق ماهوب تلفيـق




********وبهذه المناسبة قال منديل بن محمد منديل الفهيد*********




من يريد المجد يرث له فعايـل
مثل ما قال القريفه في لحونـه
بالحلال وعند لقـوات الدبايـل
كل ما جالـه مجـال يمدحونـه
ندري ان المال والعمـر زايـل
والفعايـل بالتوالـى يذكرونـه
غير هذا واجد فعـل الجمايـل
يدركون الطيب نـاس يفعلونـه
للدواسـر قصـة مالـه مثايـل
الخوي وموتره جـوا ينقلونـه
ذا وهم في خوف من شر القبايل
وطايرات في سماهم ينظرونـه
ذي عوايدهم عزيزين الحمايـل
كل حزه ضيق زايـد يندبونـه



هذه القصة بقصيدة رائعة..الشاعر المرحوم بأذن الله شلعان بن ظافر الودعاني طيب الله ثراه واسكنه فسيح جناته






طاب كيفي ورجلي زان ممشاهـا
والمعاني وزنها عـدل ميزانـي
مـا نبـي ناقـد بالنقـد يقفاهـا
خايف من بعض الاشخاص يقفاني
مـن شواذيبهاعليّـت مرقـاهـا
نازله في منـازل كـل ديقانـي
ياحـرار رفعهاطيـب مجنـاهـا
من كرمها لها بالطيـب عنوانـي
تشبع اضعوفها من ظرب يمناهـا
تكسب المـدح شيبانـن وشبانـي
مرحبـا عـد ماهلـت رفاياهـا
اوالتراحيب للقاصي مع الدانـي
من بني عمنـا واللـي توحاهـا
وكل قرم إلي من جيت له جانـي
ليلة مـن ليـال العمـر فدناهـا
وقفتي بين ربعي تبعـد أحزانـي
لابة للمراجـل تشقـح أخطاهـا
تكرم الضيف والجيران والعانـي
لابتي مايـدوس الضـد بحماهـا
من على عصر زايد وبن بدراني
لابتـي زايـد الملطـوم منشاهـا
ممنة جارهامـن كـل عدوانـي
ترتفع روسنـا لامـن ذكرناهـا
ذا كلامي ونا مـن لاد ودعانـي
لاد ودعان راس الرجم مرقاهـا
كاسبين المراجل سـر وعلانـي
لابتي من يريـد العـز ينصاهـا
يستريح بـذرا ذربيـن الايمانـي
قــــــصــــــت الشمري ياناس محلاها
يوم ثور عسـام الجـو دخانـي
فوق سيارتـه والقـوم تشعاهـا
اجنبـي وحيـد مامعـه ثـانـي
قل عزم المكينـه ونقطـع ماهـا
قال هـذا قعـد مافيـه عقلانـي
ياوداعيـن بحرقهـا وبنسـاهـا
والعوض عند ربي عالي الشانـي
عودولـه ولا واحــد تعـداهـا
حذفو بالهدوم طيـور حورانـي
شلحوهـا بنـي عمـي وشلاهـا
لابـة فاللقـا مـاهـم بـذلانـي
والقنابـل تخطفهـم شظايـاهـا
ماختلف واحد مـن لاد ودعانـي
حملوها ونار الحـرب تصلاهـا
اشهد انهـم مناعيـر وشجعانـي
عقب يومين في نجـران ملفاهـا
وشترو نقصها من سوق نجراني
ماتعـدو مكانـه ليـن شـداهـا
وشتغل صافين ماهوب خربانـي
ذي سوالف بني عمي شرحناهـا
ماضياتـن لهـا فعـل وبرهانـي



وهذي قصة الدواسر مع الشمري
واسماء الدواسر الذين مع الشمري
واسمه خالد الشلقان الشمري

[نايف الفدعاني]

خليف والشيخ ساجر

أعتقد أن هذه الحكاية محزنه أكثر مما هي طريفة ، وربما تنطبق عليها مقولة شر البرية ما يضحك ، فالشيخ ساجر الرفدي ـ الفارس المعروف ـ حل عليه شاب أسمه خليف ، شاكياً من تقصير جماعته وتركه بعد أن رحلوا عنه، فواساه الشيخ بأن أنزله عنده ، وأعطاه ما يحتاجه ، وكان مع خليف هذا أمه . ومن صفات خليف أنه كان متسرعا في تصرفاته .
وفي أحد الأيام ، ذهب الشيخ ساجر للقنص، فأخذ خليف معه ، وأثناء الرحلة ظهرت أرنب فأرسل خلفها كلبه المدرب (سلوقي ) .. وبينما الكلب يطاردها أراد خليف أن يقتل الأرنب فأخطاها وأصاب الكلب فقتله .
فقفزت أرنب ثانية ، فأرسل الشيخ ساجر صقره ، لكن خليف تعجل وأراد أن يصلح غلطته الأولى فرمى فأخطأ الأرنب وأصاب الصقر فقتله أيضاً .
فكظم الشيخ غيظه، ورجع صامتا في حال من الضيق ، وكان الوقت قبيل الغروب، وهم في شهر رمضان ، فأراد أن يجهز القهوة فلم يجد إلا القليل الذي يكفي أصغر دلاله ، وفتش التتن ( الدخان ) وما لقى إلا ما يكفي لتعميره وحده، حط الدخان بالسبيل ( الغليون ) وجهز القهوة وحطها بجانب النار وجلس ينتظر موعد الفطور .

أما خليف، رجع لأمه وأخبرها بقتله السلوقي والصقر، وعرفت أمه فداحة ما فعل، وخاصه أن السلوقي والصقر في ذلك الوقت مصدرمن مصادر الرزق ، طلبت أم خليف أنه يروح للشيخ ويعتذر منه ويحب راسه ويطلب منه أنه يسامحه .
جاء خليف ... ويوم قرب من الشيخ أسرع بمشيه ليقبل راس الشيخ، فداس على الغليون وكسره ، ويوم أحس بذلك رجع فركل الدلة بقدمه وكفاه!
عندها صاح الشيخ ساجر وهو يكاد ينفجر من الغيظ :
ـ " وش سويت يا خليف ؟ .. قتلت الكلب والصقر .. وكسرت السبيل .. وكفيت الدله "؟!

فقصد الشيخ ساجر قصيدة يصف ما حدث من مواقف يقول :

البارحة بالليل ما تريد حالــــــــي
قضيت أنا ليلي حزين ومحتــــــار
مصيبة ما شفتها بالليالـــــــــــي
يا تقل يوقد بالضماير لهب نــــــار
من صرت أنا ما شفتها ولا جرالي
أربع مصايب لوعنّي من الجــــار
الأوله حطاب يعادل عيالـــــــــــي
أشقر عديم ولأبرق الريش نثــــار
والثانية خطاف ما له مثالـــــــــي
شره على تيس الجميلة ليا نــار
والثالثة عملت بأصغر دلالـــــــــي
وقصرتها وفاحت على بن وبهـــــار
والرابعة بالعظم تتن الشمالـــــي
وأفلست منها حين حزات الأفطـار
ياليت جتني قوم وأفنت حلالـــي
وأصبر على عسر الليالي والأعزار
من صرت أنا مهزابة للرجالــــــــي
وكم واحدٍ هدمت بيته على النــار
والعمر يفنى وآخره للزوالــــــــــي
والحظ يلقى عند حصات الأوبـــــار
ما شفت مثل خليف قليل والــي
من خلقة البدوان ما مثلها صـــــار


وسلامتكم

[صالح العرجان]

عبدالله الفهد


لا هنت على هالسالفه يا سنايدي والطيب موزع بين الناس

كلن وله قسمه ؟!

يقول بداح العنقري :

وترا الظفر ماهوب للظاعنينا
---------------------مقسم بين الوجيه المفاليح
البدو والي بالقري ساكنينا
---------------------كلن عطاه الله من هبة الريح

وسلامتك

[صالح العرجان]

نايف الفدعاني


هذا راعي البويضا شيخ السلقا خمس الجموع من العمارات ؟!


يقول الشيخ ساجر ؟!



عيني قزت عن نومها واسهرتنــــــي
،،،،،،،،،،،،،،،،،،،،،،،،،ماهي مريضة مار بالقلب ولـــــوال
واحسرتي من عشقتي عايفتنــــــــي
،،،،،،،،،،،،،،،،،،،،،،،وشامت ونسيت ما مضى لي بالافعال
تعطرت يوم انها باغيتنــــــــــي
،،،،،،،،،،،،،،،،،،،،،،،،،واليوم ماحطت علوم على البـــــال
وقرونها جرد السبايا تلتنـــــــي
،،،،،،،،،،،،،،،،،،،،،،،،،وعطورها دم النشاما ليا ســــــال
عاهدتها بالله وهي عاهدتنـــــــي
،،،،،،،،،،،،،،،،،،،،،،،،،واليوم اشوف افعولها اقفاي واقبال
دنياي بحمول العنا ضاهدتنـــــــي
،،،،،،،،،،،،،،،،،،،،،،،،،والكبر يرث بالرجل كل غربــــــال
من مدها بالجود ياما عطتنـــــــي
،،،،،،،،،،،،،،،،،،،،،،،،،وياما ركبنا فوق عجـــــلات الازوال
وياما على طيب الفعايل هدتنـــــي
،،،،،،،،،،،،،،،،،،،،،،،،،وخليت عيرات النضا تهذل اهــــذال
نمشي على ما كاد لو ساعفتنــــــي
،،،،،،،،،،،،،،،،،،،،،،،،،وان عاضبت نذكر بها زين الامثـــال
وكم سربةٍ نجرها تابعتنــــــــــي
،،،،،،،،،،،،،،،،،،،،،،،،،وخليت غارتها على القوم تنهــــال
والله لخوض بحورها لو عصتنــــــي
،،،،،،،،،،،،،،،،،،،،،،،،،ما دام جسمي باقي ما بعـــــد زال
مالي حسايف كانها خالفتنــــــــي
،،،،،،،،،،،،،،،،،،،،،،،،،للي يخلط الخير والشر عمـــــــال



وسلامتكم