× عـــ آلمجنون ـــالمي [] و آنا بكيفي {}

[مازن الفهد]

مشآعر شامخه ..
شكر كتير كتير على مرورك و رسالتك الرائعه ..
و ياهلا بك و حياك الله بأي وقت ..
و ان شالله تعجبكم شخابيطي ع طول ..
.
.

[مازن الفهد]

جلست مع مجموعه من شلتي المعروفين بـ ( شادو قروب ) و كان بيننا واحد ما يفتح فمه إلا يطلع سؤال .. ودي أشوفه مره بس يسولف زي الرجال ههه و الله انه حبيب .. و فجأه و انا قاعد اسولف نط بوجهي قال : يا أخي أنت ما عمرك بكيت قلت : لا و حتى طلعت على هالدنيا و أمي تقول إني فاطس من الضحك .. وش فيك يا متعب قاطع سالفتي ع شان هالسؤال اللي مدري كيف طرا عليك .. قال : اتكلم جدّ .. قلت ....
.
مو معناها إذا ضحكت و فرفشت ان الدنيا صافيه لي .. و ان ظروفي تمام .. و ان حياتي كلها من صالحي .. بالعكس تمر علي ظروف لكن .. اتحداها و انا استمتع اذا تحديت الظروف لأن الحياه وحده وحرام نحرم ارواحنا لذتها .. و ضحكت ..
قال و هو يعدّل نظارته اللي كنها دربيل ( و الله مدري كيف خشمه متحمل هالنظاره ) إجابه صحيحه .. قلت : الله أكبر يا جورج قرداحي ..
المهم كملت سالفتي للشباب ..

[مازن الفهد]

.
تابعت أمسيه بقصر و الله مدري وش اسمه .. مو مضيّع الأسم بس اسمه غريب شوي .. ( و الله مدري وش هالتعقيد بأسماء القصور حتى الواحد يستحي لا يحجز القصر من اسمه ) المهم ... قعدت مع ابو مشاري قدام الشعّار حقين الأمسيه .. و طبعاً ابو مشاري شاعر من الدرجه الثانيه و ما يمدح قصيده إلا أم مشاري .. و الشيخ استانس ( الله يهاديك يا خالتي طيرتيه بالعجه .. ما صدق ع الله أحد يمدح قصيده ) المهم .. قاعد أبو مشاري ينقد ع الشعّار .. هذا بيته ضعيف و هذا بيت مكسور و هذا مدري وش فيه .. و أنا يا مازن اكتب بويتات بس متواضعه جداً و ما أشوف في قصيدهم شي إلا شاعر غص بحرف و كسر البيت غصب عليه .. و الباقي تمام .. و ابو مشاري من بداية الأمسيه إلى نهايتها و هو ينتقد حتى عريف الأمسيه ما سلم من شرّه ( يقول عنده كسر ) .. يا بو مشاري اهجد خلنا نسمع .. و انتهت الأمسيه و قلطنا ع العشاء .. و قعد ينتقد بالرز و اللحم .. لا و الكارثه يقول ليه ما حطوا المفاطيح بالجهه اليمنى و إلى آخر انتقاداته .. و قلت يا ابو مشاري فشلتنا مع العيال اللي معنا بالصحن .. آخر شي طلع اللي معنا بالصحن أخو العريس ( ماشفتوا وجه ابو مشاري ) .. طلعت انا وياه و كان يرقع السالفه و يقول أنا أدري انه يقرب له و انا ما قلت الا الصحيح .. قلت .. أوخص يا رجل خالتي منت بسيط ..
و جيت ام مشاري قلت الليله عدت ع خير و بكرا يرجع لك ابو مشاري بسيارة اسعاف .. بس ارحميه و لا تمدحين قصيده بالحيل ..
.
و هذي آخر حفله اتواجه فيها مع ابو مشاري ..

[مازن الفهد]

.
.
أنا : الووووو
هو : الو
أنا : السلام عليكم
هو : و عليكم السلام .. من معي ..
أنا : معك اللي خثع بالكافتيريا قبل كم يوم
هو : هههههههههههه هلا مازن .. وش صار على كراعك ..
أنا : لا الحمدلله .. مافيها شي .. أنت وش اخبارك ؟
هو : و الله أنا بخير .. و أنت ..
أنا : أبشرك بخير و ما ناقصني غير اشوف خشتك ..
هو : ان شالله دوم بخير و على شوفت خشتي أبشرك هاليومين بتشوفها ..
أنا : ايوالله تكفى حدد لي بالضبط على شان الصغار ما يشوفونك وربي ما يرقدون من الخرعه ..
هو : وش قصدك ..
أنا : لا و لاشي .. إلا وش صار على دراستك ..
هو : الحمدلله دراستي تمام بس احتمال أشيل خمس كورسات معي و انحرم من ثلاث بس الأوضاع تمام ..
أنا : ماشالله ..الله يوفقك و تستاهل ..
هو : الله يسلمك ..
أنا : وش اخبار وليدوه؟
هو : ما عليه .. وليد ماشالله بشركه و يستلم راتب مدير ..
أنا : ماشالله .. كم راتبه ؟
هو : راتبه 1500 ريال .. بس 500 حسومات و 500 يسدد قيمة صابون و 200 قطة الفطور مع اخوياه و 200 قطة الشاهي و القهوه و 100 قطة راتب العامل و يتسلف من ابوي مصاريف السياره ..
أنا : ماشالله و الباقي وين يوديه أخوك ..
هو : و الله مدري بس شكله ناوي على مشروع فخم ..
أنا : لا تنساني .. اذا تخرجت بجي عنده ..
هو : ان شالله ..
أنا : طيّب .. ماودي أطول علي .. لأن توي شحنت 10 ريال و ما ودي تروح كلها على صوتك ..
هو : لا تتمنن علينا .. 10 ريال أنا اشحن لك و لا تطوّلها ..
أنا : لو فيك خير ما أرسلت ( كول مي ) يالله .. اشوفك على خير ..
هو : هيّن يا مازنوه .. أوريك ..
أنا : أمزح يا ابن الحلال .. خلاص أرسل بطاقة الشحن الحين ..
هو : خلاص فاتت ..
أنا : اقول .. مع السلامه ..
هو : مع السلامه..

.

[مازن الفهد]

اهني الجميع بالشهر الفضيل أعاده الله علينا و عليكم سنوات و سنوات و اقول كل عام و انتم بخير ..
.
و انتظروا مفاجآتي الرمضانيه ..
.
أوخص يا قناة mbc >>

[مازن الفهد]

قصيدة اعجبتني ..

فـجـأه عـلـى الـجــوال ؟ جــانـــــي إتـصـالـي
ـــــــــــــــــــــــ مــن رقـم والـلـه فـيـه خـمـسـة ثـــــلاثـــــات

قـالـت مـسـاء الـخـيـرات ! يــــــــاكـل غــالـي
ـــــــــــــــــــــــ تــسـمــح ادردش معـك ؟ لو بـضع لـحـظـات

ابــا اتــونــس ؟ دام لـلــيــل ! تـــــــــــــالـــي
ـــــــــــــــــــــــ ومـعــك بــدردش ؟ دردشــه فــالـثـقـــافــــات

قـلـت اعــذريـنـي ؟ مـــــارتـخــي لـلـهــزالـي

ــــــــــــــــــــــــ طـبـعـي كــذا ؟ مــــاحــــب اكـــلــم بـنــيـات

قـالـت مـصـــــيـبـه ؟ وي ! يــــــــاهـمـلالـي

ــــــــــــــــــــــــ غـــريــب هـــــــاذا مــايـكـلــم ؟ جـمـيــــلات

قـلــت اقـفـلــي ؟ قـالـت تـرى مـن حـــــــلالـي

ـــــــــــــــــــــــ شــكـلـك بـخـيــلاً ؟ مـاتـحــب الـكـــــــلافــات

قــالـت عـزوبـي ؟ قــــــلـت راضـي بـحـالـي

ــــــــــــــــــــــــ افـضـل مـن إنـي اعـتـنـق ؟ قــصـر الاهــات

قــالـت هـذا ؟ قـصــراً مـهـو قـصـر خــــــالـي

ــــــــــــــــــــــــ قـصــراً بـه الــراحــه ؟ وكــل الـمـســـــرات

قـلـت (( شسمــه )) ؟ الـلــــــــــي ابـيـهـا حــلالـي

ــــــــــــــــــــــــ لـلـحـيـن ادورهــا ؟ ولـلــحـيـن مـاجــــــــات

قــالــت انــا ؟ يـمــكــن يــهـــزك جــــــمــالـي

ــــــــــــــــــــــــ جــرب ؟ وربـي مـاتـشـــوف الــــحـسـوفــات

قـلـت الـجـمـال ؟ الـلـي احـتـواه الــــــــدلالـي

ـــــــــــــــــــــــــ ضــمــيــه ؟ لايـصـبـح مـــع الـريــــح ذرات

قـالــت عـن الـغـلـطــات ؟ خـلـك مــــــثــالـي

ـــــــــــــــــــــــــ تـرى سـلـوبـك ؟ يـرفـــع الـضـغـط سـاعـات

ضـحـكـت مـنـهـا ؟ ضـحـكـه بـصـوت عـالـي

ـــــــــــــــــــــــــ ومـع ضـحـكـتـي زودت ؟ بـعـض الـتـنـهـات

قــالـت غـبـي ؟ قـلـت الـغـبـاء شـي خـيــالـي

ـــــــــــــــــــــــ خـصـوص لـلــي ؟ مـثـل نـوعــك ؟ غــبــيـات

قـالـت خـبـل ؟ قـلـت افـتـخـر ؟ فـي خـبـــالـي

ـــــــــــــــــــــــ احـب اكـون الـخـبـل ؟ لاشـفـــــــــت خــبـلات

وقــبــل مـهـبــول ؟ اقـول مـاحـلـى هـبــــالـي

ــــــــــــــــــــــــ ترى الـهـبال يـطـيـب لي ؟ فـبـعـض الاوقـات

قـالـت احـسـك ؟ مـــاتـــحــمــل جــــــــــدالـي

ــــــــــــــــــــــــ وراك مـتــذمــر ؟ وداخــــــلـك حــــــســرات

قـالـت بـجــد ؟ ابــي تـجــاوب ســــــــــؤالـي

ــــــــــــــــــــــــ ارجـوك جـاوبـنـي ؟ وقـــــــول الـصـراحــات

هـل لـك حـبـيـبـه ؟ قـدرهـا بـجـد غـــــــالــي

ــــــــــــــــــــــــ والا تـــونــس خــاطــرك ؟ بـالـصـــــــداقـات

قـلـت احـتـفـظ ؟ فـي هـالاجـابـه لــحــــــالـي

ــــــــــــــــــــــــ وصــكــي تــرى مـاحـب بـعـض الـتـفـاهــات

قــالــت قـهـر ؟ لـيـتـك مـن اعـيـال خـــــالـي

ــــــــــــــــــــــــ والا امــي وامـــــــــك ! خـــواتً شـقـيـقـات

والـلـه لـحـبـك ؟ لـيـنـه إيـبـيـد حــــــــــالـي

ــــــــــــــــــــــــ ووالـلـه لـسـوي فـي غـلاك الـمـصـيــــــبـات

لاكن ؟ تـبـي الـمـنـتـوج ؟ يـابـــــــن الـحـلالـي

ـــــــــــــــــــــــ لـقـيـت رقـمــك ؟ عــنـد اعـز الـــصـــديـقـات

قـالـت هـذا شـاعـر ؟ وصــوتـه خــيــــــــالـي

ـــــــــــــــــــــــ شــوفــي عـنــه ؟ يـمـكـن يـســـوي عـلاقـات

وهــزيــت راســي ؟ مــــن جـنـــونً بــحــالـي

ـــــــــــــــــــــــ جــنـــون مـن يــونـس مـن الـوقـت طـعـنـات

لـيـه الــورود الـيــــــــوم ؟ مـــن غـيـر والـي

ـــــــــــــــــــــــ وشــلـون تـرمــى ؟ فـالخـطر ! والـمـتـاهـات

[مازن الفهد]

واحد راح يبي يشتري تذاكر، قال الموظف: تبي ذهاب وإياب والا ذهاب فقط؟

قال ذهاب واياب ...وهوطالع ..يضحك ويقول لعبت عليهم ابي اروح ولا انيب راجع
.
.
قديمه .. دور غيرها يا فهد ..

.
.
عجوز في محو الأمية.... سألتها المدرسة: أعطينا جملة فيها إدغام بغنة ؟ قالت: عمن يعميك..
.
خخخخخخخ
.
يعني ... بس من وين جبتها يا حمدان ..
.
واحد قصير...... اهله مايخلونه يدخن في البيت ؟؟؟ يخافون يحرق الفرشة

.
ههههه .. يا أخي انتظر لين أخلص الكاسه و بعدين قول النكته ..
.
واحد معاه أرنب ومحتار فيه ،، مر عليه واحد محشش قاله ويش فيك محتار قال: ياأخي ما أدري هذا الأرنب ذكر وإلا أنثى رد عيه المحشش ... إطلقه ،، إذا إنحاش ذكر وإذا إنحاشت إنثى ..
.
ههههههه حلوووه ..
.
واحد اسمه نادر تزوج وحدة اسمها نادرة جابو ولد سموه مهدد بالانقراض
.
.

الله يقطع بليسك يا محمد ..
.

( جلسة شلة شادو قروب ) ..