سلام يا قروب له القلب مشتاق .. !! - °~*¤®§(§ شبـــكة ويــلان العـربـيـه §)§®¤*~ˆ°

**سعد النفج** · 13/08/13, (05:39 PM)

ابيات كتبتها لأحد قروبات الواتس ( قروب نادي سهما ) و تفاجأت بانتشارها , و يسعدني أن أضعها لأول مره في هذه الشبكة المميزة ..
و تقبل الله من الجميع العمل الصالح ..

سلام يا قروبٍ له القلب مشتاق = و تقبّل الله صومكم و القيامي
وهذي تحياتي على الواتس تنساق =سوق النيـاق مفهّقَـات السنامي
للي لهم قدر و معزه و ميثاق = و لهم مكانه و احترام و مقامي
ما جمّعتنا / لا مصالح ولا اوراق = و لا جمّعتنا / الدندنه بالكلامي
كل واحدٍ منّا به الطيب. توّاق = ما عندنا / لا سافل و لا حرامي
ايه اجتمعنا و الهدف فوق الآفاق =خوة رجالٍ تستحق احترامي
تميزوا بالعِرف مع طيب الاخلاق =و كل واحدٍ منهم احطه حزامي
الله لا يكتب لنا / بُعد و فراق =و لا ينكتب للغانمين انقسامي
و المر من بعد الحلا صعب ينذاق =و الله يخلي لي رجالٍ تحامي
اهل المراجل و المكارم و الاوفاق =و اللي زبنهم بالزمن ما يضامي
سوقي واعرفه وابخصه بين الاسواق =تاقف له عيوني و تاقف عظامي
و انا ادري ان الناس مخلوقه اذواق =لكن هنا تلقى الصفات العظامي
و سلام يا قروبٍ له القلب مشتاق =يا ( قروب سهما ) يالرجال الكرامي

**قاسم عبدالله المفوز** · 13/08/13, (05:58 PM)

صح لسانك لاهنت

**حمد الضوّي** · 13/08/13, (06:08 PM)

شاعرنا ومشرفنا المميز/ سعد النفج

عوداً حميدا وعيداً سعيداً

وكل عام وانت بخير وعافيه

صح لسانك ملايين نشمي ولاترافق إلا نشاما
وهذا هو ديدن الطيبين . الف شكر ع إتحافنا بهذه الدرر .
أكرر صح لسانك ..

انقى تحيه

**masha3el ** · 14/08/13, (03:09 AM)

شاعرنا الرائع

صح لسانك وكلك
محظوظين بمشاركه النص الرائع. معك

تحياتي ومودتي

**سعد النفج** · 14/08/13, (12:54 PM)

قاسم المفوز ..

صح بدنك يالغالي ..

**سعد النفج** · 14/08/13, (12:54 PM)

حمد الضوي ..

صح بدنك استاذي حمد ..
و لا هنت على الإشادة و مصافحتك للابيات تشرفني ..

الله يحفظك يا بعد راسي ..

**سعد النفج** · 14/08/13, (12:55 PM)

أختي مشاعل ..

صح بدنك و أنا سعيد بحضورك و مصافحتك للابيات ..

لا هنتي و ألف ألف ألف شكر يا راقية ..

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري