$$هذا الزمن ماهو زمن صدق واحساس --ولا زمان اللي يبون العداله$$

[سالم صالح]

في زمن تغيرت فيه اشياء كثيرة لان المال والمصالح اصبح الفيصل وهو الميزة الوحيدة لتحديد الناس والتفريق بينهم

ولذلك احببت ان اشارك في هذه القصيدة التي تعبر عن معاناه لشريحة كبيرة في مجتمعنا مع تاكيدي ان في كل

زمان رجاله الذين لن يغيرهم الزمن وتقلباته رغم انهم قله في زمن كثر فيه الغثاء

اتمنى ان تنال استحسانكم وكل خوفي من ذائقتكم التي لاترضى الا بالجميل والرائع

هذا الزمن ماهو زمن صدق واحساس=ولا زمان اللي يبون العداله
وماهو زمن قولت ترى الناس لناس=الاّ زمن حقد ونفاق وجهاله
سمعت انا في موقفي دقت اجراس=تنبي عن وقوع الخطر واحتماله
انفاس لكن مابها روح الانفاس=تمشي هلع من شوفت اللي جراله
غول الطمع والظلم شيئين في راس=تعمي عيون اللي عن الحق داله
يبطش غضب من خلف تصوير الانجاس=حتى يدين الضعف قصر مجاله
طبطب عليه وقال لاباس لاباس=وين العمل يامحاربين البطاله
وين التعامل وسط حارس وحراس=ضاعت حقوق الناس باسم العماله
حتى الشعور انباع في سوق دواس=لجل المصالح كل شيءٍ فداله
ناس غريبة منها فكري احتاس=باعت مبادئها بسوق الثماله
تزرع خداع الناس والاسم غراس=يجني ثمار الفاس لاطاح زاله
تغيرت ناسٍ وكانت على ساس=لان الريال اليوم غير خصاله
وين الذي كانوا على الفعل نبراس=صاروا ضياع وناسيينٍ فعاله
بالله كافي لاتزيدون الاتعاس=هذا الشعور اللي من العام قاله
ماهو تذمر لكن الواقع الياس=ان الزمن هذا زمان الحثاله