{{{ قصيده للشاعر : عايد بن ضافي الجلوي }}}

[حمد الضوّي]

هذه القصيده للشاعر / عايد بن ضافي الجلوي الضوي الجعفري العنزي( رحمه الله )

وهو يمتدح بها بعض جماعته أرجو أن تنال إستحسانكم

البارحه يوم انجضع كـل مرتـاح=ناموا وطاب النـوم للـي حذاهـم
ما نمت اخيّل بالدجى بـارق ٍلاح=يبرق على ربع ٍ بقلبـي غلاهـم
يبرق لياما بهّج الصبح وانبـاح=مزنن تحدّر غيبة الشمس جاهـم
روّح عليهم كفة المـال مـرواح=فيّض على بطيمان سيله غشاهـم
وتباشروا بالسيل يوم المطر طـاح=رحمة كريم ٍمن فضولـه عطاهـم
سيل ٍغرق ما هو تناقيع ضحضاح=ينبت لهم قمح ٍ يجيـب الدراهـم
ديرة عطاالله هو والأركع وصياح=وساع الصدور اللي بعيد ٍمداهـم
حامينها للي يجي عقب مـا راح=وبغيابهم ما يطمعـون احدداهـم
ياليت لو ما الشيب بوجيهـم لاح=ياليت لو يرجع عليهـم اصباهـم
علي بعيد الصيت كسّاب الأمـداح=ليا جوه ربعه ما تغالـى إقراهـم
نبّه عليهم غيبة الشمس بمـراح=حرّم وطلّق غير عنـده عشاهـم
بديوان ابو مطلق تعاليل وأمـزاح=وناسة ٍعقب السفر هـي مناهـم
وناموا على فرش ٍعذيـات الارياح=في وسط ديوان ٍ دفـيّ ٍ إغطاهـم
ووسم التعب والبرد بوجيهـم راح=صبح المقـام معلقين ٍ افراهـم
ومساعد الكسّـار للحيـل ذبّـاح=زكّن عليهـم بالغـدا واحتساهـم
صميدان قطّاع الفيافـي ليـا راح=من الرجال اللـي بعيـد ٍ مداهـم
ما هو من اللي يانفسق راح سـوّاح=ينهج لنـاس ٍمـا لغاتـه لغاهـم
أبو خلف يا الفاء على الربع يرتاح=وهم يفرحون بجيّته يـوم جاهـم
عسى لياليهم مسـرات وافـراح=ريف الضيوف مشيّمين اقصراهم
وبيوتهم عن طقّـة البـاب فتّـاح=ما غيّروا عاداتهم مـن صخاهـم
ليا مر من عقب العِشا رمي وصياح=والخيل لاجت بالمرابـط تراهـم
تحيزموا باللـي يسلّـن الأرواح=وتنادبـوا بالجعفريـه نـداهـم
جت اول الفزعه على الخيل طفّاح=تحت ظلام الليل تسمـع احداهـم
يعرف وحيهم بين رعوي وفلاح=ما ينتخـي بالجعفريـه سواهـم
والله يعز ربوعنا صدق وانصاح=كم واحد ٍيبي الذرا مـن ذراهـم

{{ وسلامة الجميع }}

((( منقوله )))