كلك جروح وعادتك بس تجرح = قلبي وانا اللي فارشه لك بساتين
كم شلت عنك الهم واليوم تذبح = جازيت طيبي من يمينك سكاكين
ياللي غلاك من اولاً كان يفضح = يبين في وجهي خيوطه براهين
اضيع من وقتي على شان تفرح = مع السهر واحلام ضحك المحبين
واناجي احساسي مع الليل يشرح = عن حبك اللي في قصيدي دواوين
واقول ياقلبي ترى حبنا اصبح = نسمه على انفاس الصباح ورياحين
لكن خلاص الحين مع همك اكدح = ماعدت تعنيني ولا رفت العين
شبيت نار الغدر بالصدر تلفح = تحرق معاليقي وسوت بها الشين
واظلم نهاري من فعايلك واكلح = ونفسي تشوم وخاطري عارفه زين
انا بقلبي خيل والخيل تجمح = عن الردى وتعاف درب الغدورين
واسمع صهيلٍ بين الاضلاع يصدح = فحواه خيل العز تهوى العزيزين
والا انت حبك من غدير الغلا شح = شديت عنه وسقت هجني مصدين
تركت دارٍ عج الايام تسرح = فيها ومن حسرتك تصْفق بكفين
وحيد ناس ونازف الجرح يطفح = ماراح تلقى من يشيلك بيدين
ودمح الخطا سلمي وبالراس يقدح = بيتٍ ويعطي لك دروس وقوانين
طرد السراب يتعب اللي ابيطمح = والنجم يهدي من عن الدرب غادين
سكرت بابي دون جرحي ابصفح = وابطوي الماضي على هامش سنين