جلــ الجلاعيط ـــعـطـته - °~*¤®§(§ شبـــكة ويــلان العـربـيـه §)§®¤*~ˆ°

**خلف بن فهد الراشد** · 12/09/11, (06:27 AM)

جلعوطي الي جلعطته الجلاعيط
متجلعطـ (ن) من كثر ماجلعطنه

هرجه مساخه دوم يجي بتمطيط
والبيض عن ملفاه مايسئلنه

دايم هروجه كل ابوها جلابيط
متجلبطات العلم سلمه وفنه

ياخذ ولايعطي يامال الشواحيط
الي على علاباه غدر شحطنه

الصدق عنده مد يجي بتنقيط
مايكتمل قوله هوى الكذب كنه

يرزح بمرزوح التمختر على الطيط
على الهبني ساق غنجه مثنه

ينسف سنام البخت لهو ورى الحيط
كنه يقد بمشرطه مايتونه

متحططـ (ن) لزور والبهت تحطيط
ماخوذ مسرود (ن) ظهر من مجنه

خلفكم

**ابو غريب العبدلي** · 12/09/11, (07:30 AM)

جلعوطي الي جلعطته الجلاعيط
متجلعطـ (ن) من كثر ماجلعطنه

الله الله صح لسانك ملياااااااااااااااااااااااار ياخوي الله يعين الجلاعيط ههههههههههههههه

لله درك ياخوي

**تركي علي الخالدي** · 12/09/11, (04:06 PM)

صح لسانك ياخلف

على الرغم من ان فيه كلمات كثيره مافهتها لكن صح لسانك

**خلف بن فهد الراشد** · 13/09/11, (02:49 AM)

العبدلي
حي فالك بناخي على الرحب والسعه

الخالدي
حي الصديق مرحبا مليار مع ان السبعة من عنزة وبني خالد رعو نفس المراعي
واللهجة فيها تشابه كبير بحكم الجوار والنسب والتعايش
حي فالك وعلى الهلا والمسهلا

خلفكم

**صالح الأسود الجعفري** · 13/09/11, (06:57 AM)

ملك البوح
صح السانك وسلمت يمينك
دمت بخير

**بدرفهد الجعفري** · 13/09/11, (01:47 PM)

خلف الراشد

صح لسانك .. لكن تكفى ابي اعرف معنى "الجلاعيط " و "جلابيط" !!

**ناجي الصقار** · 14/09/11, (03:48 AM)

.

خلف الراشد
هنا تجلت المقدره الشعريه على التلاعب بالكلمات
وتطويع المفردات كيف ما شاء الشاعر لخدمة النص
وبالرغم من أن النص فكاهي إلا أنه يحمل الكثير من المعاني
والدلالات والمغزى منها واضح للعيان فخيبة الأمل من هذا الجلعوط
أحدثت لدى الشاعر ماده دسمه للسخريه والهجاء
بأسلوب رائع وقافيه اختارها الشاعر بعنايه لتخدم النص والموضوع
دمت أخي خلف الراشد
ودام هذا االأبداع