ديوان الشاعر الكبير : متعب المطلق الركابي

[فهد السلقاوي]

بسم الله الرحمن الرحيم

السلام عليكم ورحمة الله وبركاته

اتشرف بتقدير مجموعه

من قصائد الشاعر :

متعب المطلق الركابي

ارجو ان تنال اعجابكم

مثلما نالت اعجابي

[فهد السلقاوي]

(((الفرقى بليا تلاقي)))

يامصعب الفرقا بليا تلاقي

لاغاب عنك اللي تعزه وتغليه

يا شينها لا من نحاه الفراقي

ثم ابعدت سود الليالي محاريه

لاميت(ن)ينسى ولاحي باقي

عندك قريب وكل يوم تراعيه

البعد مثل الموت يحرق احراقي

والميت اهون لكن الحي ترجيه

متعب المطلق الركابي

______________________________________________

((حزة الضيق))

الله يذكر حزة الضيق بالخير

اللي تبين صاحبي من عدوي

كم واحدن قبل اصطفاق المقاير

اقول ذا جوه مطابق لجوي

واليا رماني الحبل في قاعة البير

قفا وولى مع صحاصيح دوي

وكم واحدن ماظن به غير تقصير

ويبين بالشده جزيل مروي

الباز هو والبوم كل اسمهم طير

والكلب ينبح والذيابه تعوي

بان الصحيح وفات وقت المعاذير

توي عرفت الناس يا ناس توي

[فهد السلقاوي]

((الضحكه الصفرا))

راح الكثير وما بقا الا القليلين

النقص حاصل والبدايه نهايه

ياقلهم لو هم بعيني كثيرين

ياقلهم ياكثرهم من ورايه

لو الليالي علمني هاك الحين

رفعت في وجه الشماته عصابه

اروي عطش واظمأ فرح بس من وين

والبخل من طبع السحاب وسمايه

اخفي الحزن تفضح معاناتي العين

الظحكه الصفرا تبيح الكمايه

جرح وصبر والحظ هو ثالث اثنين

ابطال في قصة مسلسل شقايه

(متعب المطلق الركابي)

________________________________________________

(( اسولف على نفسي))

انا لا نعست وجيت لنوم تالـي الليـــل

غدا النوم في عيني ثم ضاق بي واسع الفرجه

طرى ما طرالي من همومن تهد الحيل

اسولف على نفسي ونوب اغدي الهرجه

تواما الظلوع وكن بالصدر رجد الخيل

من الهاجس اللي ينعرج بي مية عرجه

ادور حلول لعقدة مالها تحليل

طويله عريضه والبخت مايلن سرجه

دورت بالابراج فزعه وهي تمثيل

اثر برجي اقشر يوم كلن قرا برجه

عسى الله يسويها عقب منجفت بالميل

ويحل العقد في حزة اللحظه الحرجه

متعب المطلق الركابي

[بدرفهد الجعفري]

شكرا شكرا شكرا اخوي فهد السلقاوي

من يكتب هذه القصائد حتما هو شاعر كبير ونادر

بصراحه نتمنى ان نجد له المزيد من القصائد

[سالم العنزي]

الله يشفيه ان شاء الله ويعافيه

عزالله انه شاعر من النوع النادر وقصائده مميزه جدا

شكرا يافهد والله يعطيك العافيه عزالله انه موضوع مميز جدا وتستاهل مني احلى تقييم ++

[هيـاا العـازمـي]

.
.

إنتقاء بديع للشاعر الكبير .. متعب المطلق الركابي

ولاشك بأن هذا المتصفح سيكون خالدا في الأذهان

سلمت يداك مشرفنا الفاضل

تقديري

هيــــااااا

[فهد السلقاوي]

مرحبا بكم


وانتظرو بقية الديوان