راح رمضان وراح من عقبه العيد

[سلامة الجعفري]

كل عام وانتم بخير

وهذه ابيات طلعت معي كذا في ساعة جلسة روحانية وماهي قصيدة بقدر ماهي كلمات وعظية ربما يسودها التشاؤم واهم شي تعجبكم

راح رمضان وراح من عقبه العيد=وايامنـا تجـري بنـا مادريـنـا
لن الأمل فاعمارنـا دايـم يزيـد=نركض ورى الدنيا وفيهـا لهينـا
واخر هدف نبغاه من غير تحديـد=ان الله المعبـود يرضـى عليـنـا
غرت بنا الدنيا وضعنا عن السيـد=وصارت هي اللي في رضاها سعينا
نسعى عشان المال ونـدور الفيـد=واذا اغتنينـا كنـنـا مااغتنيـنـا
تلقى الرجل منا سـواة المقاريـد=يقـول باقـي للهدف ماحويـنـا
قبل يتوظف ملغي الشـرط والقيـد=يقول قضـب المـال منـوة يدينـا
واليا خذا له وقت مع زيد وعبيـد=قال الله أكبر فالزمـن وش لقينـا
الناس تبني بنـي وتزيـد وتعيـد=وحنا وش اللي فـي زمنـا بنينـا
ماغيـر سيـارة ثمنهـا تقاصيـد=وبعد الجهـد للبيـت يالله شرينـا
قالوا يكفـي لكـن نريـد ونريـد=قلـت اكتفينـا واثرنـا مااكتفينـا
نريد نطلع فـوق فـوق الاجاويـد=عن الأكابر ويش ينقـص حدينـا
هو ليه عاشو بالغنـا والتغاريـد=وحنا من احزان الزمـن ماسلينـا
اسواق للجملـه وأسـواق تفريـد=وفي ملكهم كم بيـت حنـا رأينـا
وعلى كذا الافكـار ترديـد ترديـد=اليا انتهينـا شـي شـي ابتدينـا
وقول القناعة كنز ماعـاده مفيـد=ثقافـة ٍ راحـت ومنهـا انتهينـا
والمال مابالسعـي لجلـه مناقيـد=لكن ماهـو غايـة ٍ لـه غوينـا
وقول اعمل لدنياك كنـك بتخليـد=قول وعنى شـي ٍ لغيـره عنينـا
معنـاه لاتجعـل حياتـك بتنكيـد=تقـول ذي تفنـى مثـل مافنينـا
اعمل بها مرتاح من غيـر تهديـد=ماهو لها نعمـل وفيهـا انعمينـا
دنيـاً متوبعهـا دروبـه سراميـد=ماننتهي مـن حبهـا لـو هوينـا
وحنا حسب مااشوف وانتم شواهيد=نـاس ٍ رمانـا حبهـا وابتليـنـا
حتى اصبح رضاها هو نهاية الميد=فيها نتنافـس ليـن حنـا غدينـا
تمرنا الايام فـي سرعـة الصيـد=ولساع للدرب السـوي مااهتدينـا
حكاية ان المـوت مالـه مواعيـد=نحكي بهـا لكـن مهمـا حكينـا
مانعتبرهـا شـي عبـره بتاكيـد=لـو نعتبـر للمعصيـة مامشينـا
مااقول ماللخيـر نـاس ٍ صناديـد=لاشك كـمّ اعدادهـم لـو وعينـا
ولاني مسددها على الخلق تسديـد=ربي رحيم ويستجيـب ان دعينـا
لاشك نَّدد بااهـل الاهـواء تنديـد=حنا بخطـر كـان انـا ماانثنينـا
لازم مع انفسنـا نوقـف بتشديـد=ونقـول يكفـي فالحيـاة اشتقينـا
التذكرة تنفع بعـض حيـن وتفيـد=ولولا المواعظ كـان حنـا نسينـا
ومن لاعطاه الوقت فكره وتنهيـد=قلبه بليـد وغاشـي ٍ فيـه رينـا
ناظرت وال ينّا صـدور ومواريـد=واليا سرحنـا فالوناسـه ضوينـا
مبددين الوقـت فالضحـك تبديـد=ولآخر نهـار بعمرنـا مااحتسينـا
صح الفرح فالشرع ماعنه تقييـد=ولا الله معذبنـا إذا انـا اهتنيـنـا
لكن بغمـرات الفـرح ياالاواليـد=مخطيـن كنـا للزمـن ماصحينـا
العمر مهما كان نزلـه وتصعيـد=اليا ضحكنـا اليـوم بكـره بكينـا
علم معه سجيـت سجـة بتعويـد=طـرى لبالـي يـوم حنـا قرينـا
واقع نهار العيد من غيـر تزويـد=والواقع اللي عن وصوفـه روينـا
والشعر دايـم للهواجيـس تاييـد=جعله على هقواتنـا اللـي هقينـا
جاني وعايدني بقاف ٍ علـى إيـد=والحمـد لله يـوم حنـا التقيـنـا
من شان اذكر كـل نـاس مباليـد=انـا لغيـر عبـادتـه ماحييـنـا
رب السما رب البحر خالـق البيـد=اللـي لجـوده صوبنـا ماحصينـا
شوفو ه معطينا بالاعمـار تمديـد=بالرغم ان ماهـو بحاجـه إلينـا
لكـن ياللـي تطلبـون التماجيـد=يوم ٍ يجـي للـي زرعنـا جنينـا
حذرا رمضان يمر والعيـد والعيـد=وايامنـا تجـري بنـا مادريـنـا

وسلامتكم

[سالم صالح]

الرائع والمميز


سلامة الجعفري


الله اكبر عليك وماشاء الله قصيدة في غاية الروعة والجمال وبيض الله وجهك غبت وجبت الجزل الوافي


قصيدة تتكلم عن اشياء تمر علينا ونحن في غفلة والموعظة والحكمة ضالت المؤمن

جزاك الله خير وصح الله لسانك على هذا الجمال


تقبل ودي وتقديري

[نوف العبدالله]

الشاعر المبدع سلامه الجعفري

صح لسانك على هالقصيده المعبره

ابدعت اخوي كلمات من صلب الواقع

[علي السابل]

شاعرنا الكبير سلامه الجعفري

صح لسانك على هذه الشامخه

قدره شعريه فائق تجسدت من خلال هذا الفيض الشعري


تقبل الود والتقدير

[ماجد الغانم]

الغالي

سلامة الجعفري

صح لساانك ..,ولاهنت

حضور رائع ونص يزخم بالجزالة لله درك

دمت بكل خير ..ودام هذا التميز

[سالم العنزي]

الشاعر الكبير سلامه الجعفري

صح لسانك على هذه القصيده التي حوت الحكمه والجزاله والجمال

ابدعت ياسلامه

[سلامة الجعفري]

المشاركة الأصلية كتبت بواسطة سالم صالح

الرائع والمميز


سلامة الجعفري


الله اكبر عليك وماشاء الله قصيدة في غاية الروعة والجمال وبيض الله وجهك غبت وجبت الجزل الوافي


قصيدة تتكلم عن اشياء تمر علينا ونحن في غفلة والموعظة والحكمة ضالت المؤمن

جزاك الله خير وصح الله لسانك على هذا الجمال


تقبل ودي وتقديري

سالم صالح
الروعة والتميز انك مررت هنا وشرفتني


شكرا لك على اطرائك وصح بدنك والجمال بحضورك


ومرورك محل تقديري