× عـــ آلمجنون ـــالمي [] و آنا بكيفي {}

[مازن الفهد]

يااااه .. ايش هذا ...
يؤيؤيؤيؤ
.
ياربي ..
.
الناس هذي ليش كذا .. الواحد احس انه مو انسان .. بصراحه .. الناس احس قلوبها قاسيه .. و اذا قالوا الخير موجود .. أقول ايه موجود بس قليل اللي يقدر الانسانيه ( تذكرت مسلسل بابا فرحان .. قولي يابابا و قول ع الخير ..و تجيك سمّوره بعد ام الخير .. قولي يابابا و قول ع الخير .. ثم جاك بابا فرحان من أقصاه .. الخير عايش جوا الناس .. بس ساعات الخير ينداس )
المهم ..
قبل فتره اسولف مع جدتي الله يعطيها الصحه و العافيه .. و عزوبي لازم اسأل عن فلانه بنت فلان .. ( يمكن الله يكتب نصيب و اتزوج )
المهم قالت و الله فلانه عمرها 30 سنه و لا تزوجت.. يؤيؤ ثلاثين سنه و لا تزوجت .. قلت : هي مزيونه .. قالت : ماشالله عليها لو شاف (فاندام) خلاها تمثل معه .. قلت : طيب وش المشكله .. قالت : لا و عندها ثلاث خوات غيرها و كلهن مجاويز .. يااااااه .. طيب ياجده وش المشكله .. تقول : ابوهن يقول اذا زوجتهن يطير علي الشون .. و ابيهن عندي استفيد من فلوسهن .. معقوله ياجده فيه ناس بهالحقاره هذي .. قالت : ياوليدي الطمع آكلن الناس و انت ما تدري .. قلت : بس ما أحرق قلب بنتي على شان كم ريال ..
قالت : الناس ماهي سوا .. قلت : لا يا جده يمكن موبايلي خخخخ و ما دريت الا جدتي تعطيني ذاك البوقس على خشتي .. على فكره جدتي تتابع ( جاكي شان ) و ( جت لي ) و افلام هنديه .. أحياناً ..ألقاها ماسك يد جدي و تغني .. و من الطناخه حاطه شخطه خضراء على جبهتها .. على بالها هنديه .. يا حليلك يا جدتي ..
المهم نرجع لمحور حديثنا .. الدوله تدفع مبالغ للبنات اللي ما تزوجن إعانه للشايب على بناته .. و ما قصرت الدوله و آخر شي أكتشف إن هذا يحرم البنات الزواج .. و الله لو تقطع الدوله عنهم الشون كان ؟؟؟؟؟ . ..

[مازن الفهد]

رح فوق .. لا انزل و تلقاه ..
شف اللي جنبه ..
لا ما هو انا انزل و اسأل عن فلان,,
انا فلان وش بغيت .. لا اطلع فوق و شوف اللي جنب جنبه ..
لا لا ما هي عندي ..
انزل و خله يحولك للي جنبه تحت ..
.
.
مراجعات المواطنين ..
لا و لو تجيب واسطه كان ضبطت امورك بدقيقه .. يا موظفين يا أكارم .. احترموا المراجعين .. مدام فيه مجال انك تخلص المعامله ليش قاعد تمغط بنا فوق و تحت .. و الله تصير عندك لياقه من كثر ما تراجع الدوائر الحكوميه .. و اذا جبت واسطه .. قال ابشر و بدقيقه و هي خالصه ... طيب و ليش التعقيد من اول .. و الله احس احيانا . انها لازم توصل اوباما على شان يوافق عليها .. و هي كلها ما تستاهل .. و الله انك تطلع من الدائره الحكوميه و انت عندهم من الفجريه و لا تطلع بنتيجه ..
مره قعدت اراجع بأوراق الجامعه .. و سألت عن القسم اللي مختص بقضيتي .. قالولي اطلع فوق .. و جيت المكتب .. إلا فاضي ما به إلا واحد يتقهوى شاهي و يقرا جريده .. قلت سالفتي كيت و كيت و كيت .. قال : عند المكتب اللي قدامي ..قلت طيب و ينه ؟؟ .. قال يمكن يجيب عياله من المدرسه .. قلت الله اكبر .. عياله يطلعهم الساعه 8 .. و الله لو انهم بالشرقيه ما يروح لهم هالوقت .. قال : استرح لين يجي .. و قعدت الى الساعه 1 و مليت و مشيت .. و الله العظيم 3 ايام على هالحاله .. و آخر شي .. أشفق علي الموظف اللي دايم ألقاه موجود .. و قال استرح .. و جلست .. و راح يتصل عليه .. قال : فيه واحد يبيك بالمكتب و له 3 ايام يتردد عليك .. و الموظف تدرون وينه ؟؟ و الله العظيم انه قاعد يتقهوى تحت عند موظف بمكتب ثاني .. و مخلي مكتبه و اشغاله و المراجعين .. بالله هذا يستحق المكانه هذي .. و لو عندي واسطه .. وانا بالبيت أخلص أشغالي .. بس آآآآه يالقهر ..

[مازن الفهد]

و انا طالع للسوق ألاحظ حاجات غريبه ..
و استغفر الله ما هو تشكيك بالحريم اللي أشوفهن بس .. بصراحه احتار ..
تدخل السوق و الحرمه من تلمح خشتك تغطي عيونه بعشرين لفه من الغطوه ..
و اذا تعدتك طلعت عيونها ..
و مره من المرات .. لا والله العديد من المرات .. أدخل محل و ألقى وحده تبحلق بعيونها لأغراض المحل .. و قدامها خمسين عامل ..
و اذا دخلت و شافتني يا ساتر ..
مدري لو ان البنقاليه ما عنهم غطوه ..
.
ما علينا ..
لأن الموضوع هذا سبب لي حكه بالراس من كثر ما ابحث عن اجابته .. و سبب شد عضلي بلساني من كثر ما اسأل ..
.
.
من ناحيه ثانيه ..
اوشك الثلث الأول من الشهر الفضيل على النهايه .. و أبناءنا الله يصلحهم ما غبر على خشومهم إلا كراع الثور .. و ما بروسهم غير ابو شهاب و معتز و طاش ما طاش و الكارثه يتهاوشون بينهم على بالهم باب الحاره ..
امس و بعد مغارش و مقارش .. اتصلت على عبدالله الربيعه على شان يفصل بين اثنين قدام المسجد متهاوشين .. و المشكله كل واحد يقول أنا معتز .. آآآه يالقهر معتز .. طيّب واحد منكم يكون ابو شهاب .. لأن شخصيته تعجبني خخخ و الله ما تابعتها .. و لا أدري وش سبب ولع الناس بها .. و المشكله صلاة التراويح تلقى هالشيبان .. و اذا سألت عن الشباب .. قالوا بالإستراحه و الا مهجولين و الا بقلعت وادرين ... و الصغار يتابعون باب الحاره و الا ليلة العيد و الا عايزه اتجوز و الا ...... ..
.
الله يعين على هالقنوات اللي من ينتهي مسلسل من mbc ينطق لك مسلسل مع ابو ظبي .. و اذا انتهي مسكت الريموت و حصلت مسلسل على فنون و الا الساحل .. حتى اهل البيت يتطالقون من كثر القنوات .. كل واحد له مسلسل ..
.
و المصيبه مسابقة شوجي .. و الله مدري شوجي هي ولد و الا بنت .. اسمحولي .. بتعدا الخطوط الحمراء . او اقول .. اعوذبالله من الشيطان ..
.
و الله ان الكلام متزاحم بصدر مثل مزاحم العالم على باب الأمانات .. كلن يبي له ارض و المصيبه يموت و يموتون عياله و هي ما جت ..
.
و على طاري الأمانه ..
أو أقول .. بالقصه الجايه ...

[مازن الفهد]

هذا انا رجعت لكم و كنت ابتكلم عن الأمانه .. بس ما هي الأمانه العامه للشؤون القرويه .. و الله مدري اسمها كذا .. المهم ..
الأمانه إن الواحد يقدر الرجال اللي يقدرونه و أنا بداخلي اسماء و أسماء لشخصيات عديده .. أحترمهم و أقدرهم .. و أدري اني مقصر معهم .. بس ياليت يقدرون ظروفي و يسامحوني على أي شي جاء مني بغير قصد .. و الحمدلله ما عمري أخطيت متعمد خخخ واحد يحب يمدح نفسه ..
.
المهم بشوف لي موضوع اتكلم عنه .. وشو ياربي وشوي ياربي .. ايوه لقيتها ..
كنت أنا وواحد ثنين ثلاثه اربعه خخخخخخ
لا بجد ..
كنت أنا وواحد نتكلم عن الحب و ما أدراك مالحب .. قلت ..
الحب عذب قلوب البعارين ** حتى الحمير السود يلعن جدفها ..
.
و الرجال قال ايوالله ..
قلت ايه بس انت من البعارين و الا من الحمير السود .... ههههههه
.
و مره قاعد أصيد بقدونس و فجأه جاء و من يوم شفته و هو يجيب مركا .. و يجلس بعد السياره الأولى اللي كتبها بدولاب الملابس ههههههه
محشش يسولف على بنات أخوه ...
.
و الله اني رايق .. بس الروقان حلو .. خاصه اذا المنتدى ما فيه أحد .. تروح و تجي و ماعليك إلا ملابسك الداخليه .. خخخخخ ..
و الله لو يشوفني هندي المقبل و انا أمشي بدون شماغ .. الظاهر بيسوي مثل شيبانا.. اللي ما يلبس شماغ عندهم .. داشر و سرمادي و سربوتي و ما يقلطون له الفنجال .. وشلون لو ألبس جنز عندهم .. الظاهر بيعلقوني مع كراعيني قدام المسجد على شان ينكلون الشباب اللي بجيلي ( تخيلو شكلي و انا متدلي ههه) و أرجع لهندي المقبل ..إذا شافني .. لو قلت يلغي العضويه قليله بحقي .. شكله بيسوي اعلان عام بالمنتدى .. و يجلدني قدام الأعضاء .. و ادري .. احساسوه .. و مشاعروه .. و معيضوه .. بيتشمتون فيني ..
.
عندي قصيده بس أحس انه مو وقتها ..
ان شالله مره ثانيه ..
.
ايش ياربي
ايش ياربي ..
ايوه لقيتها ..
.
بس بخليها القصه الجايه ..
.
كيفي مو رايق الحين ..
.

[مازن الفهد]

توي روقت ..
ايه و ش وقفنا عليه .. اها القصيده ..
.

بعض المواقف تستفز الرجاجيل = لو حاول الرجال ما صدّ عنها
يديه عن شيل الحموله مكابيل = لو ايش وسع الصدر يستاء منها
و صدر الشمالي لو هو يشيل و يشيل = كم ضيقة ٍ بالصدر قام و لعنها
نضحك على انفسنا بسرد المواويل = و نسجّ عل النفس تنسى حزنها
لكن حقيقتنا على غير تأويل = ارواحنا ما ترحم اللي غبنها
لو شفت ضحك السن و تقلط الهيل = هذي عوايدنا و هذا و طنها
لكن يضج بداخلي شي ما قيل = ومهرة لساني ما تراخارسنها
واخاف من وقت ٍ به الظلم و الميل = يميل بالمهره و يجرح بدنها
في وقتها ما عاد لي حيله و حيل = اميّل الكفه على من وزنها

المهم .. هـ القصيده على شانكم جبتها .. و انا ما احب أقصد واجد ..
.
.
.
.
أحب دايم أطلع من موضوع و ادخل بموضوع شااااطح بدون مقدمات ..
تذكرت الشله و سوالفهم .. الله يقطع ابليسهم ..
واحد عند البنشري و متحمس يبي يقول غير زيت و سيفون .. قال غيّر سيف و زيتون ..
لا و الثاني المطمه .. و قدام الرجال و هذا ما هو من الشله .. هذا من الشيبان و شكله أول مره يحيي الرجال على الصحن .. يبي يقول سمّو الله يحييهم .. قال : حيو الله يسميهم خخخخ
.
واحد بعد .. من الشله الخاصه جدا و اللي لو اطلع من باب بيتي ألقاه قاعد على العتبه يتحراني هههه .. يبي يقول : ما شفت الاخبار .. قال : ما خبت الأشبار ..هههه
و هذا فيه موقف بيني و بينه .. فشلنا .. دخلت انا و ياه عند جلسة الحاره ( شيبان و شباب متجمعين ) المهم دخلت و قلت : السلام عليكم .. إلا الآدمي هذا و راي .. و يرد السلام علي .. : و عليكم السلام .. يا أخي أنا و انت داخلين و ليش ترد السلام يا غبي .. قال و الله مرتبك و ابقول السلام عليكم و مدري كيف طلعت : و عليكم السلام .. قلت هذي آخر مره نجي جلسات الحاره ..
.
اضحكني واحد من الشيبان و على باله يعرف مسلسلات رمضان .. و من الطناخه .. صبيت له قهوه .. و قام و تربع و اخذ الفنجال وقال : وش صار على عبدالله القصبي و ناصر السدحان خخخخخ وشف وجهي من الضحك .. بغى يكب الفنجال على وجهي ..
.
و الموقف الحلو .. كان واحد من الشباب يسولف عن الوظايف و قال : المدنه الخدميه .. حسيت فيه شي غلط .. أثاري المسكين يبي يقول الخدمه المدنيه .. هههههه
.

[مازن الفهد]

و أنا طالع من المسجد ..
و أنا واقف عند الصرافه ..
و أنا طالع من السوبرماركت ..
آخر شي ..
و أنا طالع من محل الصيانه للحاسبات ( واحد يعلمكم انه أضاف البرامج لجهازه .. ) المهم ..
و فجأه ..
تجي ذيك الحرمه اللي عباتها ياساتر .. كنها ساحبتها بمراغة حمير .. و حاكتها بالجدار .. و حاطتها سفره على سحورهم .. و معها بنتها .. حافيه .. و ملابسها مرقعه .. و على وجهها نظرة البراءة .. و عمرها تقريبا 5 سنوات .. والحرمه شايلها بزرها .. عمره تقريبا سنتين .. و البزر كراع فيها نعل و الثانيه بدوووون نعل .. ( طبعا ما تدرون من هذي .. ووش السالفه ) ..
هذي شحاذه ..
و البنت تسبق امها على السيارات و الرجال .. على شان تشحذ .. و البزر .. اصبر عليه سنتين و تلقاه حريف شحاذه ..
أستغرب .. على الرغم من كثر الخيريات و أهل الخير .. و الدوله ما قصرت .. مع هذا كل زاويه تلقا بها شحاذين ..
.
و الله نمد لهم على ريال و ريالين .. و انا ادري ان كل واحد بيعطيهم مثلي .. و باليوم راح تكسب على الأقل 500 ريال .. هذا اذا كانت شحاذتها نظام دوامات عاديه .. 8 ساعات و ماهي شاده حيلها بالشحاذه .. لو حسبنا بالشهر .. راح تكسب 15000 .. يالله يالله .. راتب مدير مع الخبره 30 سنه .. و هي بدون شهاده و لا مؤهلات ..
الله لا يبلانا .. وش هالناس اللي بايعين عزتهم و كرامتهم .. و يمدون يديهم ..
حنا السبب .. حنا اللي عطيناهم مجال .. يستمرون على هالشحاذه .. حتى صارت شركات .. و مجموعات .. كل منطقه لمجموعه ..
فيه الخيريات ... و ما ننكر وجود ناس ظروفهم صعبه .. و انا اعرف ناس شخصيا ما يلقون الأكل اللي ياكلونه .و مع ذلك .. يستحون لا يمدون يديهم .. حتى الخيريه .. بالظروف الصعبه يجونها ..
و انا ادري ان الخيريه ياخذ منها الغني و الفقير ..
و المصيبه لو تسأل واحد شبعان .. قال : حلال الدوله .. يا اخي فعلا من الدوله و الدوله ما قصرت .. بس فيه ناس أولى منك .. فيه ناس ما يلقون أكل و أنت متربع على مفطح .. فيه ناس ما عندهم شي يلبسونه .. و أنت تتفنن باللبس .. فيه ناس ما عندهم بيوت . . و أنت كل ساعه بغرفه من كبر بيتكم ..
وش السبب .. وش الحل ..
.
.
.
لا تعليق ..

[مازن الفهد]

أقول يا حرمه : وين الريموت حق الرسيفر
.
مدري وينه .. شف يمكن تحت هذي .. أو هذي ..
.
لا و الله ما تحت هذي شي ..
.
بسرعه مباراة الهلال تبي تبدا .. خليني اشوف التحليل ..
.
يا حبيبي مباراة الهلا ضد الحزم و أكيد الهلال بيفوز ..
.
و لو لازم اتابع المباراه .. و اشوف اللاعبين ..
.
يا قلبي .. اللي يشوفك يقول مدرب المنتخب و يبي ينقي اللاعبين ..
.
لا أنا أشجع الهلال .. لازم اتابع مبارياته ..
.
يالله .. عجلي دوري الريموت .. أو أروح للإستراحه ..
.
عادي روح للاستراحه .. خابره اخوياك نصراويين . و انت الهلالي الوحيد بينهم ..
.
يا حرمه . لا ترفعين ضغطي ..
.
لا يا حياتي .. ما أرفع ضغطك و لاشي .. هذي الحقيقه ..
.
حقيقه بعينك .. أقول و الله ان ما جبتي الريموت .. تشوفين شي ما شفتيه ..
.
وش بتسوي يعني .. و الريموت مدري عنه ..
.
الله اكبر .. و ترفعين صوتك علي .. و حنا ما عندنا ورعان على شان نقول آخذينه ..
.
يمكن طاح هنا و الا هنا .. ليش حاط دوبك و دوبي ..
.
أقول .. الحكي معك ضياع وقت ..
.
أفاااا يا عمري .. آخرتها صار الحكي معي ضياع وقت .. نسيت الحب اللي بيننا . و الحين تقول ضياع وقت ..
.
لا لا .. صايره .. نور عشيقة مهند على غفله . اهي اهي .. بكيتيني بهالنبره . . اقول بس جيبي الريموت ..
.
انت وش جايك علي ..
.
ما تخلون حركاتكم يالنصروايين . لازم تنغزون .. و انتي ما تدانين ريحة الهلال .. يكفي انك مسميه ولد اختك ماجد .. على اسم ماجد عبدالله و المسكين و لد خالتك .. سميتيه .. موسى .. يا بنت الحلال .. هذا موسى صايب .. و ترك النصر .. وش ذنب هالمسكين .. يمشي مع سامي و زياد و براء .. و اسمه موسى .. ارحمي يا مسلمه ..
.
و الله كيفي و على الأقل ذكريات موسى صايب .. و انت وش سويت .. سميت و لد أخوك .. دعيع .. لأنك احترت ما تدري تسميه عبدالله و الا محمد .. حرام عليك وش هالأسماء ..
.
على الأقل الدعيع ما ترك الهلال للحين .. و الله انه ناشف .. تقول انه عصير ربيع مشفوط حتى الهواء اللي داخله .. هذا الاخلاص .. و الا انتم يالنصراويين .. تسمون على اسامي نصراويين و بكره بالأحوال .. تبون تغيرون الأسم ..
.
اقول يالهلالي .. من زينكم عاد ..
.
اقول يا حرمه لا ترفعين ضغطي وين الريموت ..
.
و الله مدري وش فيك يووووه ..
.
لا والله انك تدرين بس مدام النفس طيبه عليك جيبيه ..
يووووه يووووه ..
نسيت .. البارح اخذته للاستراحه و نسيته بالسياره .. بروح اجيبه ..
.
بعد ما خليتني مهزله عندك .. قاعد تقول بالسياره .. حتى ما تعذرت و لا قلت آسف ..
.
اقول .. انتي تدرين انمي اخذته .. و ليه ما قلتي لي انه معي ..
.
اقووووول : طلقني يا هلالي ..
.
((( طيب يا أخي بدال ما تحط حيلك بهالمسكينه .. ليه ما قمت جعلك ما تقوم .. و طقيت الأزرار من عند الرسفر .. متقعطل .. هذا انتم يالرجال .. دايم الخطأ على الحرمه .. و اذا صار شي بسيط حط حيله بحرمته .. يا أخي زعق على الأشناب مثلك ما هو على الحرمه .. )))
.
.