السجين المظلوم........!!

[ام سعود العنزي]

قالو تبكين وربعك عيال وايل

قلت ايه ربعي صدق ماهم رديين

ربعي ذرايه عن سموم القوايل

ربعي هل الوقفات ماهم خفيين

ويلان كم حلّو صعاب الشكايل

يلبون للصايح لو هم بعيدين

وانخاكم يالحكام وكل القبايل

بالمملكه والكويت وقطر وبحرين

وانخاكم يالحكام وكل القبايل

حكام الأمارات وعمان السلاطين

سعود قصاصه حل ولكم نسايل

تكفون ياشيوخ الشرع والصلح والدين

وانخا هل الفزعات عيال الحمايل

تكفون يالاجواد ماباقياً شين

تكفون يالاجواد بشتى الوسايل

لاتتركون سعود له عشرة سنين

انا امه اللي دموع عينه همايل

من يوم طب السجن ماغمضت عين

ياما بكيت وذقت مر وهوايل

صابتني الجلطات والظغط والبين

الجسم حي ولا بقى به صمايل

وعلى سرير الموت شهراً وشهرين

متعـــذبه مابين برد وقــوايل

ذقت المرض والمر ياصعب الاثنين

ياليت اشوف سعود قبل اتهايل

وياليت مايجيه سيف ابو حدين

تكفون يشمر كاسبين النفايل

الطيب حي والسناعيس باقين

اجيهكم بالله ورسل ودلايل

لاتذبحون سعود جاهل ومسكين

واجيهكم بعموم كل القبايل

اهل الخليج وكل العرب والمسلمين



ام سعود العنزي