سجل دخولك للمنتدى ببيت شعر اعجبك

[صالح العرجان]

ضويت الشمعة الحمـرا .. مثـل فكـرة
ولاعبهـا النسيـم .. ولعبـه يسـلـي !

يخليهـا .. وترفـع راسهـا .. كبـرة !
ويلفحها .. وتحني راسهـا .. تصلـي !

وقام الضي يرقص .. داخـل الحجـرة
يفز وينحني .. ليـن ارتبـك ظلـي !!

كأن الضـي .. طفـل بسكتـه عثـرة!
أو ان الضي .. حيـن يحـط ويعلـي :

فراشة من ضيا .. ما صادفت زهـرة !
وانا صادفت غربة .. مثلهـا مثلـي !!

فراشة ضي .. لا لا .. شرشف القمرة !
يهفهف .. والنسيـم يغيـر .. ويولـي !

ويشتب الفتيـل اكثـر .. مثـل جمـرة
واشوف الشمعة الحمـرا تناظـر لـي !

وتذرف دمعها .. قطرة .. ورى .. قطرة
وانا ادري مابكت مـن همـي وغلـي !

ولو تبكي .. على مابـي مـن الحسـرة
تناثر دمعها .. مثل المطر .. لاجلـي !

الا يـا حيرتـي .. والليـل ياكثـره !
علام الشمعة الحمرا .. بكـت قبلـي ؟!

أنا مبطي جريح .. وبنجـرح بكـرة !!
أنا عفت الزمـان .. وعافنـي خلـي !!

أنا كلـي حزيـن .. ولا قـوت عبـرة
.. توادع ناظري .. تبكي على كلـي !؟

ياليت ابكي .. ياليـت اعـود للفطـرة !
وانا ادري جفنـي بدمـع القهـر مملـي

ولكن حيلتي .. من عزتـي .. زفـرة !
أنـا مـا اريدهـا .. لكنهـا تسـلـي !

لو احبسهـا .. تقيـد الشمعـة بكبـرة !
لو اعتقها .. تعـود الشمعـة تصلـي !!

/
/
/

[صالح العرجان]

تحلـم بـوردة تحضـن عيونـك فـجـر
واحلـم بـوردة كـل صبـح تقبـلـك !

وردة .. نداها .. يستحي منـه المطـر !
وردة .. شذاها .. مثـل حبـي يشملـك !

دورت عنهـا .. واسـأل دروب القمـر !
إسأل صباح الارض والمـا .. واسألـك !

كـل الـورود استاهلـن كـل البـشـر
أما انـت مـا مـن وردة ٍ تستاهلـك !!

من قبل لا انسى .. كنت ابحكي لـك خبـر
عصفور له مشـوار مـع ورد الفلـك !

قال : المدينة .. تسرد احلامـك حجـر !
سافر إلى الغيب .. انتفض مـن منزلـك

قلت : الطريق ؟ .. ومد لي صمت وسهر !
فكرت اعود .. وقال : من عـود هلـك !

سافـرت .. لكـن بيـن رغبـات وحـذر
صاحبت خوفي .. كنت خايـف يشغلـك !

للغيب كنت امشـي .. ولكـن مـا خطـر
.. في بالي اني عند ما آصلـه آصلـك !

أثرك حبيبـي تحضـن عيونـك فجـر ؟!
واثـر المرايـا كـل صبـح تقبـلـك !؟

وتريـد منـي أجـمـل ورود البـشـر ؟
وشلون .. ياتاج الورود اهديـك لـك ؟!!

/
/
/

[صالح العرجان]

حين كبـر غريـب الطيـف شـوق وسجـد
شفت طفل ٍ بحضن الغيـم . . يحضـن مـداه

شفت طفل ٍ . . تلاعـب فـي حجـار البـرد
والنجـوم القريبـه منّـه تلـعـب مـعـاه

ان رمى الأرض . . يرمن . . وان تمادن زهد
لين تركد سماهـن . . ثـم يرمـي حصـاه

خلف حد الزمان . . وخلـف سـور الجهـد
لاع صمت النجـوم ولا شكـن مـن جفـاه

راضيـات بغـروره لـو خـذاهـن كـمـد
خوف يطفي . . سناهن حيـن يمطـر بكـاه

طفل مـن روح / أو هـو روح تـدرا جسـد
طفل من بوح / أوهـو : بـوح يقـرا سـواه

عـن سرابـه لمحـت الغيـم الأزرق عقـد
حلـف: بيـن الرحيـل . . بغيبتـه والنجـاه

وفـكتابه . . لمحتـه ومـض خلـد ٍ جحـد
منبعـه واستمـال اطـلال قبـر وحـيـاه !

مكتفي . . وان تعثـر فـي سكونـه صعـد
لـالسّنـا. وان تذمـر مـس نجـم وطـواه

وان سمع بنت غيمـه . . تندهـه : ياولـد
عـد لحضنـي , تجاهـل صوتهـا ماخـذاه

غـارق ٍ فـي بحـور ٍ موجـهـا يحتـشـد
عن ثمانين . . غي . . وألف نور . . وصلاه

يزرع بتربة امسـه . . مـن حنينـه وعـد
يقطف بكـف حدسـه مـن سنينـه صبـاه

ياخـذ الليـل : حفنـة ثــم ينـثـر بـلـد
وان لمح عتـم غربـه مـد ضـي ومحـاه

طفـل لاهـي يتـيـم ولا بحلـمـه جـلـد
طفل ساهي . . وانا أجهل ليه جرحـي نسـاه

ماادري الارض: تبعـد . . والنـدم: يبتعـد‍؟
أو هـو العتـق يولـد عنـد بـاب الإ لَــه

حين كبـر غريـب الطيـف شـوق وسجـد
شفت طفـل ٍ بحضـن الغيـم يحضـن مـداه

شفـت طفـل ٍ مـلا الدنيـا هديـل وبــرد
لين ضمت كفوف الأرض شرفـة سمـاه !!

/
/
/

[صالح العرجان]

أحـــــاول
أحطب شجر ليلي بفاس ٍ من البرق
........ وانخى عجاج الضي في كل ديرة

واسرج من الجن المغيرين من شرق
........ مـهـرة .. قوايمها تـنـير الجزيرة

مركاضها فوق العشية تقل طرق ..
........ حـداد يصنع لـلحيارى ، بصيرة

&

.............
.............
أحاول القى في يدين العبث فرق
........ يكـسر رتابة حـبـنا .. يا منيرة !


/
/
/

[صالح العرجان]

الهنوف اللي خذت قلبـي وحطـت لـي بدالـه
....... جنح ٍ طير في الظلوع العوج له روحـة وجيـة


كنها من حـور جنـات السمـا حسـت ملالـه
....... وارتمت للارض .. مشتاقة .. وضمتهـا يديـه


في محبتهـا يجـوز العقـل وتجـوز الجهالـة
....... لحظة ٍ قبل انبعاث الديـن .. عقـب الجاهليـة


وادري اني غارق ٍ فـي عشقهـا حـد الثمالـة
.......واترنح ! والخفوق من الغوى .. له الـف نيـة


خافـق ٍ بيـن انحنائـه فـي هواهـا واعتدالـه
.......كنه اللي مـال طربـان ٍ بصـف السامريـة !


كيف ابحكي للورق عنها وهي شي استحالة !؟
.....كيف ابوصف نهر من فتنة على متن برديـة؟!


كن ضحكتهـا مـلاك ٍ يطـرد الغيمـة لحالـه
.......لابس ٍ ثـوب ٍ ردونـه بيـض واطرافـه نديـة


وابتسامتها .. صباح ٍ يعبـر المـا مـن خلالـه
.......وارتباكتها .. صباح ٍ جت علـى بالـه عشيـة


عنجهيـة فـي سوالفهـا .. وتلحقهـا عجـالـة
.......آآآآه يـا زيـن امتـزاج انفاسهـا بالعنجهيـة !


شي مثل الطهر في الشدة على لفـظ الجلالـة
....... شي مثل القبلـة الأولـى .. ولذتهـا الخفيـة !


كن ربي يوم سـوى الخلـق ..سواهـم جمالـه
.......لاجل تمطر غيمة التاريخ من حول الصبيـة


ماتعارفنـا مثـل بعـض المحبيـن برسـالـة
....... لا .. و .. لا هاديتـهـا وردة وردتـهـا عـلـيـه !


التقينـا لان رب الـكـون قــدر لامحـالـه
...أن يرى التاريخ عشق اطهرمن اطراف الخطيـة

[صالح العرجان]

شجر حي الحبيبة .. مـا يبـي مـا
.......... يمـر ابـنـا الخـريـف ومــا يـمـره


وشارعهم .. لـو ان الكـون ظلمـا
..........كــأن الشـمـس حـولــه مسـتـقـرة


ومنزلـهـا .. كـأنـه غـصـن ينـمـا
..........أو ان الغـيـم مــن سقـفـه يـجــره


تموت الروح من دونـه / ومهمـا
..........رقــــت مــــا تـاصـلــه لله دره !


وفي حي الحبيبة .. شيخ ٍ اعمـى
..........سألتـه عـن مـلاك الحـسـن مــرة


تبسّـم .. قـال : تملـك عـدة اسمـا
..........وملبسـهـا خفـيـف ومــا تــزره !


يا إن الشيخ يكذب ما هو اعمى !
..........يا إن الحسن خـلا العيـن حـرة !


/
/
/

[صالح العرجان]

حكايات هيفـا مثـل الايـام كـر وفـر
............. وضحكـات هيفـا كنهـا الجـود والمنـه

وفي منتصف ليلـة أحـد عاشـقٍ مغتـر
............. اظنـه أنـا وبنـيـةٍ تـنـزع الـونـه

سهارى نغني ساحل الشـرق .. والمرمـر
............. على الشط يرقص مع سواليفنـا .. كنـه :

سحاب السمـوات العلـى طـاح واتكسـر
............. على الأرض يبغى طفلتـي تقتنـي منـه

هكا الطفله المستمسكه فـي زمـان ٍ غـر
............. إلى مست المـوج ازبـد المـوج بالحنـه

والى مر في سلسالها ومـض نجمـه مـر
............. تقـل روح مسلـم شالهـا البـرق للجنـه

حنونه .. ولا انسى لحظةٍ .. لا ذهب لا در
............. عصافير واقـداح ومسـا ضاحـكٍ سنـه

ولا انسى ودمعي في يديهـا كأنـه سـر
............. نويت اكتمه .. لكـن بكيـت ودرت عنـه

تضمه .. ويغسل عنّها كل طـاري شـر
............. اليـن امعنـت فـي قبلـةٍ حيـل منجنـه

كأن الدمـوع اسقـت يديهـا نبيـذٍ حـر
............. سرى في جسدها واربك الفرض والسنـه

كذا حب هيفا .. لو بـدى للأغانـي مـر
............. يجي فيـه سكّـر .. ليتهـا كثـرت منـه !