حاولت ان اقتبس بيت كااجعله بيت للقصيده فلم اجد امامي سوى قصيده كامله
يالله يامحيي الجـذوع الهشيمـات
ياعالـم مـا بالخفـاء والسريـره
يا سامك سبع الشـداد السمـاوات
يارب تلطـف بالعيـون السهيـره
يالله سترك يوم الابصـار فـلات
ويارب تجعل لي من الامر خيـره
البارحه يوم اكهف النجم بسكـات
جتني جماهيـر المعانـي مغيـره
ماكنـي الا واقـف فـي عرفـات
او كن من حولي جمـوع غفيـره
قمت اتخير بالجمـل والعبـارات
الكـم هايـل والمشاعـر وفيـره
والشعر مثل الماء حدود ومسافات
شعر بحر والشعر الاخـر بحيـره
سبحان من يجمع بحور ومحيطات
داخل مغاليق الصـدور الصغيـره
من غاص غبات البحر جاب دانات
ومن غاص في زيره تعلق بزيـره
والقافيه مثل الوطـن والجماعـات
تبكي على فرقى الاهل والعشيـره
شاعر يسوس من الخيول العريبات
وشاعر ورى العربان يطرد حميره
والا المعاني واضحـه بالفروقـات
كاس عسل والكاس الاخر مريـره
وان ما لفتك بيوت شعري جنيهات
ياعلني ماكتب من الشعـر غيـره
هات القلم ياراعي الاولـه هـات
واترك علي بدع البيوت الشهيـره
ماهي بيوت مروجيـن التفاهـات
اللي على عمي البصر والبصيـره
لرسملهم من جيـد الشعرلوحـات
تشوفها حتـى العيـون الضريـره
ياغافل الدنيـا سـراب ومتاهـات
نمشي وراها مع حلـول الظهيـره
الحي داله والخبر عنـد الامـوات
ان الحياه اللـي نعيشـه قصيـره
وانـا سؤالـي للعقـول الفهيمـات
العبد بعد المـوت وشـو مصيـره
شتان بيـن المشئمـه والمسـرات
جنه هنـا وهنـاك نـار سعيـره
يانفس توبي قبـل يـوم الملمـات
طول الامل عوق النفوس الحسيره
هيهات يرجع ماضي العمر هيهات
الوقت يمضـي والليالـي تديـره
مامات من عقب صناديـد مامـات
علـى مسـاره تستمـر المسيـره
متكاتفيـن فـي جميـع المهمـات
على النقا مثل السيوف الشطيـره
واللي يمن الطيب من عقب مافات
ماعاد يبغى كـل شـره وخيـره
خله يولـي للقصـور الحقيـرات
مامن ورى راع الحسايف بريـره
عند الكبار اعتى الجمايل صغيرات
وعلى الصغار ادنى الجمايل كبيره
واللي يروج للفتـن والضـلالات
لابـد ماتجـري عليـه الجريـره
له يوم خزي وعار والام واهـات
ينـدم ولا يلقـى صديـق يجيـره
يالفهلوي يابو فلـوس ومحطـات
احذر تلاعب بالامـور الخطيـره
ان طعتني رح للفلل واالعمـارات
البورصه تبغـى عقـول خبيـره
والنجم لاخالف مسـار المجـرات
يضيـع بغبـار النجـوم المثيـره
ماتنفعك كثر الحيـل والمهـارات
للسيف غمـد وللبطـولات سيـره
والمرجله والمنزلـه والبطـولات
عليك يـاراع السوالـف عسيـره
الله اكبـر يازمـان لنـا فــات
قبل المجالـس والبيـوت الوثيـره
يوم الرجـال يقـدرون القرابـات
وايضا يصونون الخوي والقصيره
عصر لبس تاج الفخر والمـروات
طيب وشهامه واستقامـه وجيـره
يرجون مد اللي يديـر المـدارات
اليوم فـي ديـره وبكـره بديـره
وزمانـا هـذا زمـان العلاقـات
على المصالـح تستمـر الوتيـره
ان جات يم المصلحه والوساطـات
كل حسـب علاقتـه مـع مديـره
اما تجي لـه حاجتـه بالثمنيـات
ولا تجي كـل المساعـي كسيـره
حنا بلينا فـي جميـع المجـالات
تشوف بعيون الرجاجيـل حيـره
نرفع شعارات ونطمس شعـارات
من وين ماهب الهـوى نستجيـره
مع العجاجه طايريـن جماعـات
مافيه مـن ميـز بفكـره مطيـره
سادت حضارات وبادت حضارات
وحنـا نـذم الاولـه والاخـيـره
الفلسفـه والمهزلـه والاشاعـات
لامن تلاقـو فـي قنـاة الجزيـره
جونا بوسـط بيوتنـا بالمطمـات
احد مع الشيطان واحـد خشيـره
لو غيرو شكل النصايح ولاصوات
الداب تعرف شجرته من صفيـره
الغيظ بحلوق العدو لـه علامـات
ماغيـر تسمـع بالمنابـر زفيـره
خاضو نفاصيل الملـل والديانـات
والدين واحد مانبـي ديـن غيـره
ياربعنـا لازم نعيـد الحسـابـات
ونميز السلك الردي مـن حريـره
مافيه داعي للزعـل والحـزازات
كل علـى مجنـاه ياسـم بعيـره
العلم ماهو بالصـور والشهـادات
العلم بصـدور الرجـال لبصيـره
ويسعد جميع اوقاتكـم بالمسـرات
صلوا على بشرى العبـاد ونذيـره
ابداع ابداع ابداع بما تحمله الكلمه من معنى
لاهنت يامحمد لطيف ,, بعد هذه القصيده تأكد اني سوف اقرأ واتابع كل جديدك
صح لسانك
...
06/01/07, (08:54 PM)
رد: مامات من عقب صناديد مامات !!!!!!!!
العرض العادي
