سجل دخولك للمنتدى ببيت شعر اعجبك

[سعود المسعودي]

المشاركة الأصلية كتبت بواسطة محمد بن موسى

بين الفضاء والأرض موجات الأقمار =داخل نطاق الذبذبة والتصاوير
هون على نفسك مسافات الأسفار =وأطلق عنانك مع فحول المشاهير
ثم طير فالعجه تجول بالأقطار =وألزم حدود الكيمرا وأدهن السير
وأفهم قواعد فلسفة وزن الأشعار =وألا أشتر الجزلة وسوق المغاتير
أصعد قمم وأركز علم وألفت أنظار =ثم دسم الشارب بمدح المناعير
عوض خسارة فآيتك وأمدح كبار =تلقى لمشروعك توسع وتطوير
مثلك تربع فالقمم وأصبح ستار =وغيرك تربع يا ذكي جمة البير !
نجمك سطع في قمته والرحى دار =وأخفى نجومٍ ترتجي بالزمن خير
مير إنتبة يا صاحبي قدمك إنذار =فاتورة الكهرب تنص التحاذير
سدد فواتيرك وسير على البار =ولا يرصدك ساهر يزيد المخاسير
يأهل المنابر جايد العلم وش صار =كلٍ يحسب اللي على كيفه يصير
أنبح على المنبر وتلقى لك إثمار =ثم رز وجهك فالفضاء بالدنانير
شريت لك بيتٍ وحطمت الأسعار =وجريت صوتٍ لك على نغمة الزير
رصيدك البنكي يرزك وتحتار =فالمبتغى مابين وارد وتصدير
يلو تبي بالمال نشفت الأنهار =ذليت نفسك يا الذكي بالتزاوير
وألا أنت بالميقاف خاين وبوار =مالك مع الأحرار كلمة وتعبير
أبعد عليك من السماء درب الأخيار =اللي رقوا للنايفه دون تقصير
ذولا لهم بالمجد قيمة ومقدار =ماقدموا مثلك من الجهل تقرير
بينك وبين أهل القمم تفرق أعمار =تب يا ضعيف النفس وأذكر زمهرير
يلي مكاسبكم تفاهات الأفكار =أنتم حرار وبالمواجه عصافير
أفكارنا تعرض على كف تجار =تبرز رخومٍ بالخفاء تنفخ الكير
ويلي على درب الهوى تشعل النار =أرفق على نفسك وكب الغنادير
الراس شاب وعادة الوقت غدار =وطير السعد ياقع على الغصن ويطير
وحنا على طرق الهواجيس شعار =نصور الأفكار من باب تصوير
مابين صدر وعجز وآهات وأفكار =ننسج خيالٍ جودته التعابير
الله يكافينا صواديف الأقدار =العمر يجري بين هرجٍ وتفكير
ويامل قلبٍ ناشه الهم وإنهار =وأصبح بقايا قلب ذاق التعازير
والعين هلت وبلها مثل الأمطار =ترجي رفيقٍ باعدته المقادير
أسوق رجلي بين الأوطان دوار =وأقف على درب التهاويل وأسير
يا شوق رد الروح من واهجٍ جار =وأشفق على اللي لوعته المشاوير
وألا أعطني من صافي الحب تذكار =يطرد عن المجروح كثر التفاكير
يا أبو عيون وساع والطرف سحار =منتك يالسابي ولا منة الغير
تمون وتهون المصايب والأخطار =ولجلك وقعنا فالخطر دون تبرير
القدر يبقى بالصدر رمز وشعار =وتبقى ونبقى في غرامك مباهير
يبو رموشٍ رشها الكحل محتار ! =بالوصف والمبسم عسل خير تدبير
أرجع ورد الروح لا ناشك الضار =وحرر خفوقي من عنى الهم تحرير
طالت سنين العمر والحب جبار =وكتاب عمري ما ورد فيه تبشير
ما من رفيق اجيه واشكيه الامرار =يا كثرهم قبل أمس وقت التياسير
فالعسر صدوا واتركوني على نار =و فاليسر جوك ويم بيتك مسايير
وقتٍ يميل بلحظه يمين ويسار =والناس في كفيه ورد و مصادير
وأختامها يا لله وأنا عبدك البار =ألطف بحالي يا ولي التدابير

صح الله لسانك جزله يالجزل

[هيـاا العـازمـي]

.
.

جزلة من راس جزل يا بن موسى

عسى الله يعينك .. ويعين الجميع على هالدنيا

صح الله كلك

.
.
.

أنا في داخلي حاجه ولا أدري وش هي بالضبط
ولاني قـادر أكتمهـا ولانـي قـادر أبديهـا

متاهه داخل أعماقي بحـر حيـره بليـا شـط
خذاني موجها العاتي خذانـي عـن موانيهـا

أبهرب من غموضي مير ماباليد حـل وربـط
ضياعي كلن يشوفه حقيقـه مقـدر أخفيهـا

[هيـاا العـازمـي]

.
.
.

إنتظرت إنك تحِس بْحاجتي للّي اقولـه
وُدّي إنّك لو بكلمه تلمس اللي بالخفايا

[عبدالله المعيوف الدهمشي]

ودنا بالطيب بس الزمن جحاد طيب
،،،،، كلما تخلص مع الناس كنك تغشها

يدك لا مدت وفا لا تحرى وش تجيب
،،،،، كان جاتك سالمه حب يدك وخشها

[عبدالله المعيوف الدهمشي]

تلبس المرجلة ثوب الحداد
،،،،، لا تردى رجل ما هو ردي

[محمد بن موسى]

’,
وين الطريق اللي يودي لقيـاك
طالت خطاوي البعد بينك وبيني

والله لأشيل الحمل ضعفين لأرضاك
عسى يمينك مـا تفارق يمينـي
’,

[عبدالله المعيوف الدهمشي]

أحد ٍ ينام وحط راسه بكمه
،،،،، وأحد ٍ تخم النوم عينه وتخطيه