قصيده للأمير المرحوم \ محمد احمد السديري في مدح ورثاء الشيخ اورنس الشعلان وربعه الروله ( هلا العليا )
يسقيك يا دار ٍ شمالي عنازه &&& غربي الولج يا علي شرق الطريبيل
سقاك نو ٍ ممطر ٍ من عيازه &&& على رغاب القاع فيض ٍ من النيل
عز الله انه راح فيها جنازه &&& صميدع ٍ توصف عليه الرجاجيل
له فيّ عازات ٍ ولي فيه عازه &&& بوقت اللزوم الى حصل بالدهر ميل
ما لوم قلبي لو يزيد اهتزازه &&& وجرّ الونين وشاف ضيم وغرابيل
عيني كما شن ٍ تفتق خرازه &&& عليه دمعات المحاجر هماليل
حر ٍ جزع وادمى بقلبه حزازه &&& وتفجرت شعبان قلبه مباهيل
تقصر يمين اللي بالايام هازه &&& يرجع ذليل ٍ فاقد العقل بهليل
اللي لمح ضده ثقيل ٍ مرازه &&& أخو محمد صافي الذهن حلحيل
من شبته يا ما قطع من مفازه &&& ويا ما ظهر من غرقة ٍ كنها الليل
رقى سنام المجد والطيب حازه &&& وبيته لعصمان الشوارب مداهيل
قلبه من البالود ما هو قزازه &&& والغيض قد فجر قلوب ٍ مغاليل
وان داخل الشردان رعب ونزازه &&& الذل ما يلقى عليه المداخيل
هزيم حطو حفرته بالعزازه &&& براس الطويله وارفع القبر بالحيل
ومن الذهب حطوا لقبره ركازه &&& ومن صافي الياقوت حطوا قناديل
حتى يجيه اللي بعيد ٍ منازه &&& ويلقى بقربه شمخ القود والحيل
اعتضت به ربع ٍ لقلبي لهازه &&& اعني هل العليا عصاة المشاكيل
علمي الى جاهم سريع ٍ نجازه &&& وانا لهم دايم على العدل والميل
هم فزعة المضيوم وهمه جهازه &&& وبالفعل للشعلان تشهد هل الخيل
شعلان فيهم بالحرايب فيازه &&& بجدع المدرع فوق قب ٍ مشاويل
ربع ٍ حماهم ما يقرب حجازه &&& وعدوهم أسقوه ويل ٍ بثر ويل
ان حل ضرب مخلص ٍ بالبرازه &&& ارووا حدود سيوف حدب ٍ مناحيل
احد ٍ يحوش الطيب غصب ٍ خزازه &&& وناس ٍ عن العليا ضعاف ٍ مهازيل
يبين لك فرق الذهب من بيازه &&& فرق ٍ بعيد ابعد من الجدي لسهيل
البيض ترضع لابن يابس عرازه &&& وبالالف يظهر واحد ٍ به تنافيل
تاخذ رفيعين المباني بزازه &&& يا ليتها تعتاض عنهم تباديل
ان قيل قلبك مصخر ٍ بانحيازه &&& قلت الوفا له وسط قلبي مناقيل
وانا احمد الله ما حضرني خزازه &&& واردون ثوبي ضافيات ٍ مظاليل
يسقيك يا دار ٍ شمالي عنازه &&& مزن ٍ من المنشا ركونه مخاييل