سعد النفج يلبي دعوة عناد الأسمر العويفي لزواج ابنه - °~*¤®§(§ شبـــكة ويــلان العـربـيـه §)§®¤*~ˆ°

**فايز الفرحان** · 29/12/10, (10:30 AM)

بسم الله الرحمن الرحيم

هذه القصيدة تشرف بإلقائها الشاعر سعد النفج في حفل زواج خوالي العويفيات في حفل زواج الخال والداعي عناد الأسمر العويفي الجعفري العنزي
لحضور زواج ابنه ممدوح
في تاريخ 4/10/1431هـ

الشاب ممدوح بن عناد الاسمر العويفي الجعفري العنزي

يالله ياللي تغفر الذنب لو زاد

يا منزلٍ بالذكر سبع المثاني

تبارك لممدوح يا رب العباد

وتوفقه للخير وتحكم لساني

من جتني الدعوة من الداعي عناد

حقٍ ألبي دعوة اللي دعاني

عناد الأسمر من عريبين الاجداد

أبا صالة وأسوق جزل المعاني

والشعر له موقف وهاجس وميعاد

يومه وتاريخه بكرتٍ لفاني

يوم الاثنين ورابع أيام الأعياد

بقصر النجوم وهاجس الشعر جاني

يحق لي دام الفرح عند الاجواد

عز الخوي ومزبن اللي يعاني

عيال عودٍ للمواجيب سداد

عيال الأسمر المكرمين اليماني

قومٍ لهم بالعز طلعة وميلاد

أحرار ما يرضون درب الهواني

ما هي غريبة واسمع العلم الوكاد

عويفيات والنعمين بأول وثاني

منهم اخو عنقاء وللقصة إسناد

كتب لها التاريخ علم وبياني

طلع مع الجيش السعودي للجهاد

للقدس والقدس الشريفة تهاني

وصاروا بسجنٍ ضيق وكله أنكاد

وتضيق من ضيقه وسارع المحاني

وأعلن أخو عنقاء كسافه للأوغاد

وقال أبشرو بالعز والله عطاني

وما بين عزم وحيلة وضغط بزناد

طلع كتيبه جيش والعلم باني

سيرة أخو عنقاء لها صيت وأمجاد

يفخر بها الويلان قاصي وداني

حضرت أبارك والقي بيوتٍ جداد

وأشارك الأفراح واحجز مكاني

الشاعر :

سعد النفج

**غموض الشمال** · 29/12/10, (01:13 PM)

صح الله لسان الشاعر القدير سعد النفج

وتسلم يمينك على النقل اخوي فايز

تقديري لك

**عبدالمحسن الجلوي** · 29/12/10, (01:22 PM)

هذي ما يبيلها صح لسانك هذي يبيلها ثورة فشق وطنخة عز الله وسبعة انعام بالعويفيات وصح لسانك ملايين يالشاعر الرائع سعد النفج وما قلت الا الصحيح بالرجال اللي يستاهلون المديح ....

اخوي فايز الفرحان سلمت اياديك على نقل القصيدة ونعم فيك وبخوالك ...

**أبو غرام** · 29/12/10, (07:37 PM)

ونعم بالقاصد والمقصود
وألف الف شكر يابو فرحان
على هذا النقل الجميل

**محمد بن موسى** · 29/12/10, (08:09 PM)

صح الله لسان الشاعر القدير سعد النفج

وتسلم يمينك على النقل اخوي فايز

ودامت لكم المسرات

**فايز الفايز** · 29/12/10, (08:19 PM)

الله يوفقك العريس

ويكتب له الذريه الصالحه

وصح لسان ابن نفج على هذه القصيده

وتطرق الشاعر لخو عنقاء

وقصته المذكوره بالقصيده لايجعلها احد

وفعلا عمل جبار قام به رحمه الله

اشكرك ياعزيزي على هذا الطرح

دمت بخير

**صبيح العوض** · 31/12/10, (02:41 PM)

فايز الفرحان

مشكور على النقل المميز الف مبروك لممدوح

وصح الله السان الشاعر القدير / سعد النفج

عزالله انك حضرت وبدعت على صحيح سعد النفج دايم يبيض الوجه بحضوره الله يديمه ويديم هذا التميز

تحياتي وحترامي للجميع