ياسعود تكفى لايفكون الاطناب....... - °~*¤®§(§ شبـــكة ويــلان العـربـيـه §)§®¤*~ˆ°

**احمد العريفي** · 02/09/10, (12:11 AM)

المناسبه:
اثناء رحلتنا في اجازة الربيع1431هـ الى فياض شعيب الخشيبيه (50 كم شرق لينه) ورغم التوسلات للاستاذ / سعود بن عبدالرحمن الكردي (قائد الرحله) الا انه رفض تمديد الرحلـه . وانا بدوري رفضت المساعده في طي الخيام والتجهيز للرحيل علما بأنني وشقيقي عبدالله وبندر القحطاني-من لينه- الذين جهزنا المخيم حيث وصلنا قبلهم بيوم كامل(من حبنا للبر) قادمين من المنطقه الشرقيه(865كم) وسعود ومجموعته قادمين من عرعر(470كم).
ذهبت إلى احد الرجوم المطله على الفيضه اشاهدهم وهم يطوون الخيام والفرش فهاجت قريحتي بهذه الابيات التي آمـل ان تنـال استحسانكـم :

ياسـعــود تكـفى لايـفـكـون الاطــنــاب=ياسعـود تكـفى قلهـم بس لـيـلـه
نـفـسي تـشـلع كـل ماشـلع مـنـســـاب=طـواري الـفـرقا عـلـيـنا ثـقـيـلـه
يـومٍ طـويـتـوا فـرشـكــم خـافـقي ذاب=كـن الضماير وسط حـر الملـيلـه
ياسعـود شفي من هـوى البر ماطــاب=خلوا حـبـيـس الـدار يبرد غـليله
يكـفـيه من طـول السنه صكـت الـبـاب=ويكفيه من طول السنين المحيله
خـلوه يسـلى عـن هـمـومه والاتـعـاب=ويسج رجله بالفياض الـظـلـيـلـه
والصبح يشرف له على راس مرقـاب=ويشم ريح الشيح وسط الخميلـه
خـمـيـلــةٍ خـضـرا تـقـل مابهــا تــراب=فيها الزبـيـدي مثل روس النثيله
وريح البختري والنفل مثل الاطـيـــاب=تـنعـش قـلوبٍ بالحـنايا عـلـيـلـه
وباللـيـل حـول الـنـار تلـتـم الاصحـاب=وتبدا السوالف والعلوم الجميلـه
وكـن الكـواكـب فوقـنا والقـمـر غــاب=جمرٍ تـنـثـر في مهـب المـسيلــه
وماحلى الصبا لجـت مع الصبح تنسـاب=يحوشها ضوح الفجر في شليلـه
بالـبـر نـسـلى عن هـوى تلع الارقــاب=اللي عـلى شـوفه نسوق الجليلـه
ونسلى عن هـمـوم المدينه والانـشـاب=ونرتاح من بعض النفوس الرزيله
يالله طـلـبـتـك يالــولـي رب الاربـــــاب=تـديـم انـعــامٍ عـلـيـنـا جــزيـلــــه
وتغفر ذنـوب اللي من الـذنب قـد تــاب=يارب وفـقـنا لـدرب الـفــضـيــلــه
والخاتمه صلوا عـلى سـيد الاحـبــاب=رسول رب البيت راعي الـوسـيـلـه

احمد بن عبدالرحمن العريفي
(نديم المجره)

**محمد بن موسى** · 02/09/10, (01:48 AM)

الشاعر / احمد العريفي

صح السانك مدد بلا عدد

قصيدة رائعه وابيات معبره

دمت بود

**احمد العريفي** · 02/09/10, (03:09 AM)

اقتباس:

المشاركة الأصلية كتبت بواسطة محمد بن موسى

الشاعر / احمد العريفي

صح السانك مدد بلا عدد

قصيدة رائعه وابيات معبره

دمت بود

صح قلبك لاهنت
الله يسعدك
تحياتي

**صبيح العوض** · 02/09/10, (03:22 AM)

الشاعر القدير احمد عبدالرحمن العريفي

صح السانك وعتلا شانك قصيده متميزه ولاغرابه

اخوي احمد بشرني عسى سعود وافق على البقاء

دامت ايامك بالمسرات

**سليمان الجعفري** · 02/09/10, (03:26 AM)

ياسعـود تكفـى لايفكـون الاطنـاب = ياسعـود تكفـى قلهـم بـس ليلـه

نفسي تشلـع كـل ماشلـع منسـاب = طـواري الفرقـا عليـنـا ثقيـلـه

يومٍ طويتـوا فرشكـم خافقـي ذاب = كن الضمايـر وسـط حـر المليلـه

الشاعرالرااااائع / احمد العريفي

صح السانك حتى ترضى قصيدة رائعه وابيات معبره

الله يعطيك الف عافيه ..لاهنت يالغالي

تقبل اجمل التحايا والاحترام

**سالم صالح** · 02/09/10, (04:11 AM)

الراقي والمميز دائما

احمد العريفي

صح الساانك وكلك على هذا الجمال والابداع والله يلوم اللي يلومك خصوصاً اذا ربعت لينه واللي حولها الله اكبر

الله يعطيك العافية امتعتنا وجعلتنا نعيش جو جميل بجمال نصك

تقبل تقديري وودي

**عبدالله عشوي** · 02/09/10, (04:26 AM)

الشاعر العزيز

احمد عبدالرحمن العريفي

صح السانك وعتلا شانك قصيده مميزه

دامت ايامك بالمسرات