الشـذْب بالمقفين اثِم والطق بالميّت حرام=والأجر يبغى له عمل والعبد يُجزى بالعمل
والشعْر وهْبه والحظيظ اللي معاه الحظ قام=وأحْدٍ يقدِّيه العقل واحْدٍ خليّ مْن العقل
وأنا معَ الواقع وَلا اقبل فيه ترديد الكلام=الصدق يبقى لو يطول الوقت والباطل بطل
حيث النقي لو مالقى روسٍ تلقـِّيه اهتمام=ضاع النقى والأمر عند الغالبيه مُحْتمل
ما يُحــشم الا كلّ رجـــــــْلِ يستحق الاحترام=والاّ الـــــربادي مـــــا حسَبنا له رضى والاّ زعل
ياكــــثر ما نغْضـــــي عن الجهّال قدْرِ للحشام=نغْضي عن الهرْج الرخيص الْيا وصَل وانْ ما وصل
وانْ كبْرت الدعوى وَلا فاد التشرّه والملام=نرفع يَدَينا وانْ تقاضيـــــنا ما نقـــــنع بالعـدل
المشكله عند البنادم تنتهي لوّ استقام=بسّ المصيبـه والبلا مُخّ البنـــــــــادم لا قـفل
لاقـام يستقبل خطا وأصبح خطاه الاتهام=هنا نعَرف ونجزم انْ ما عاد فالرجّال امل
ما يــــــــدري انّ الجَد الاوّل جَدّ وافين المقام=سلايل الظفران واحفاد الصحابه والرسل
أصْل العرَب واهْل الحَسَب والمنسب اللي ما يضام=رغم اعتراض الحاقدين مْن الضغينه والجهل
ماينكر امجاد المناعير الكريم ابن الكرام=(وَلا يغـط الصدق رجّالٍ على بيت وأصل)
الهَمّ هَمّ المبتلي والناس في برْد وسلام=والحظ حظ اهْل الكبينه كلّ ما زاد الهلل
تريّحوا واخْذوا معَ الراحه سماحه وانسجام=الحبر والقرطاس مــــــا عمره جرَح والاّ قتل
العلم والله بالمكان اللي عليه الطير حام=واليوم لا والله طمان وأمْن ولله الفـضل
ما عاد من بين العرب ثارٍ وَلا فيه انتقام=الوضع طيّب واكثر العالم على سمْن وعسل
السيف الاملح والبنادق والذخيره والحزام=أتلى عَهَدها معْ وفاة اللي نقل حِمْل الجمل
ولْيا رجَعنا للسلوم وعلم اهَل سُود الجهام=اصبح عَليَّ الصبح اسجّل شيّ من شيٍّ حصل
ما ناخذ المعْسر وَلا نترك لنا شفّ ومرام =انصُول ونْجُول وعَلى عز وعلى قول وفعل
نقْدم على الجمْع المقابل مانعَرف الانهزام=والْيا جدعْنا نجدع النادر من شيوخ الشمل
21/06/07, (02:54 AM)
من اروع القصائد التي برأيي
العرض العادي
