وش هقوتك باللي سرى تالي الليل.......؟

[احمد العريفي]

وش هقوتك باللي سرى تالي الليل = مـتـنـحـرٍ درب الـمهـالـك لحـالــه

يوم انها كـثـرة عـلـيـه الغـرابـيـــل = والصدر ضاق وخبث الوقت باله

وضاقت به الدنيا ولاعـاد به حـيــل = وزاد الحزن والقلب زاد اعـتـلاله

حـمل فـراشه والعـزب والمعامـيــل = واركى على جـيبٍ يسابق اظـلاله

يبي ديارٍ أمـس قـالـوا بهـا سـيـــل = يبي نـفــودٍ حـايـر الـمـاء بجـالـه

يبي يتعـلى عـلـه يـشاهــد سـهـيــل = يـبـي يـنـادم كـل نـجـــم بـدا لــــه

يبي يـولـع مـثـل نـار الـمحــافــيــل = في راس طعـسٍ يتعِب اللي رقاله

يبي يـبهـر دلـته باخـضـر الـهـيـــل = يـبي يـفـوح فـوق الارطـى دلالــه

يبي يغـنـي بالـلحـن والـمـواويــــل = يبـي يـبـدد بالـصـحـاري هـبـالـــه

وإلى صفى راسه بـدا بالـتهـالـيــل = وسبح بحـمد الله وخـلى الجهـالـه

ولا احدٍ معه يفك الاطـناب ويشيـل = ولاحـدٍ يـزود بالـرحيـل انـفـعـالــه

لطاب شفه من هـوى البر بالحيـل = يرحـل على كـيفه متـى ماطـرالـه

ياكـثـر مانـبغى ولامن محـاصـيـل = ماكـل مـن يـبـغـى لـشـيٍ يـنـالـــه

هـذي أمانـي والاماني تـعـالــيـــل = تـسـلى بهـا نـفـسٍ تعـثـر مـنـالـه

احمد بن عبدالرحمن العريفي
(نديم المجره)

[معيض بن عريفج]

الله الله صح السانك وبيض الله وجهك

ويبي يبدد بالصحاري هبااااااااااااااااااااااااااااااااااااااااااله

قصيدة جميله

حياتي

[ابو غريب العبدلي]

نديم المجره الله عليك صح لسااااااااااانك قصيدة رائعه من شاعر مميز ورائع لله درك

[حمد الضوّي]

احمد العريفي


صح لسانك شاعر جزل ولا يقدم إلا الجزل
لافض فوك يامبدع




ودي وتقيري

[صالح الأسود الجعفري]

احمد العريفي

صح السانك نص رااائع
دمت بخير

[احمد العريفي]

حياكم ربي
شرفني مروركم
واسعدني ثنائكم
الله يسعدكم
تحياتي

[هندي المقبل]

الشاعر القدير احمد العريفي

صح لسانك على هذه القصيده ..

سعيد جدا بهذا التواجد الممتع من شاعر كبير يشرفنا بوجوده

صح لسانك الي ان ترضى