بسم الله الرحمن الرحيم
السلام عليكم ورحمة الله وبركاته
وصباحكم سعيد ان شاء الله
وكل عام وأنتم بألف خير
أبيات متواضعه وليدة اللحظة علّها تشفع
عن الغياب ..
نقول خيره بس وين الخيره
وهمومنا من ديره لياديره
//
نضحك وحنا ضحكنا يذبحنا
ونجوع ونصبّر بها تصبيره
//
العالم الواشي بطول حدوده
عايش مريض وواقف ٍ في حيره
//
مستسلم لأمر ٍحصل من ظالم
ويقول ياخي فضها من سيره
//
مدري متى ندري اذا ماندري
وقلوبنا الغام ٍ بدت تفجيره
//
نقطع حدود ونرجع لنقطتنا
ونحتاج للعوده بعد تأشيره
//
صفّق وصفّق وازهم ويامعلم
نبغى سفن والا قزازة بيره
//
أحوالنا جدًا نبي نقلبها
وأعمارنا لو هي تطول قصيره
//
دوم نتفاخر بالكلام الماضي
والحاضر القااسي نبي تشفيره
//
وحنا وقفنا وقفة المتفرج
لا جاب علم ولا نشد من غيره
//
نبدا الصلاة وننتهي ماندري
هي ركعتين أو فوقها تكبيره
//
عقولنا وأوضاعنا بالمره
مقبّله .. ومدبّره .. ومغيره
//
الله يعين أجيالنا ويرحمنا
الكسر يبطي مالقى تجبيره
//
أقول خلوني أغير مووودي
وادخل بجو ٍ ماأبي تغييره
//
بنادي لخلي ولو يسمعني
يمرر اسماعه كذا تمريره
//
انا ادري انه لو سمعني ينصت
والصوت يرفض لو سمع تزويره
//
يسمعني ويقرا نداي وصوتي
ويموت لامني طنشته غِيره
//
هذاك خلي جعلني له فدوه
هو معجمي وانا بعد تفسيره
//
عشق ٍ نزيه وصافي ٍ يجمعنا
أمثل حقوقه معي بالجيره
//
ماخون فيه ولا أجيه بسوّه
قدره كبير وعارف ٍ تقديره
//
اسمه زهر قلبي وكل وروده
واسمه هنا وسط الحشا تأثيره
//
يتلّني فرقاه تلّ الظامي
لاتلّ دلوه ظامي ٍ من بيره
//
اذكره واذكر ماضيّه والحاضر
والله عمره مابدا تقصيره
//
حبه بقلبي سيد ٍ متسيد
سيرة عطر زاد الوفا تعطيره
//
قربه محال وبعده أكبر صدمه
وتفكيري أصلا ً يقلقه تفكيره
//
الحزن سطرني وقلت أحاول
أسطره بس البلا تسطيره
//
أقول نرجع للكلام الأول
الفكر يجرح والامل تصبيره
تركي فلاح
31/12/10, (05:39 AM)
قزازة بيرة
العرض العادي
