خباري عروس.......

[احمد العريفي]

ياموتري والمطـر هتـان=والنفـس بالبـر مبلـيـه
شد العزم تنطوي الريضان=وقت السحر طـي زوليـه
يازين مشيٍ مـع الوديـان=باقصى الحـدود الشماليـه
وطعوس لينه تقـل جيـلان=حمرٍ مـن الخيـر مرويـه
ياماحـلا بـاذره لـحـان=وصارت به الارض مكسيه
بس البـلا قايـد الغـزلان=ونفسـي لشوفـه هواويـه
احـن لصخيـف الذرعـان=حلو النبـا صافـي النيـه
ياني على شوفتـه شفقـان=اشفـق مـن الام لصبيـه
عذب السوالف شجي الحان=اغليـه واغلـي حكاويـه
له بسمـةٍ تبعـد الاحـزان=تسعـد قلـوب الشقاويـه
مافادنـي البـر بالنسيـان=ماينسـي واحــدٍ زيــه
اذكـره لمالـت الاغصـان=ولغـردت كــل قمـريـه
ولشق نور الصباح وبـان=ولهبـت الريـح شرقـيـه
والفجـر يذكـرنـي الاذان=لجـا يسحـب مواطـيـه
ونادى بصوته وهو نعسان=ياحـي صوتـه وياحـيـه
لـولاه ماخلـي الـبـران=وماخلـي ارضٍ خـلاويـه
واعيش عمري مع البدوان=وانسى المدينـه وبلاويـه
اهل الكرم ذابحين الضـان=وابوسعد* خـوش ماريـه
انا اشهد ان الكريم امعـان=ربـك يقـدي خطـاويـه
وين انت ياراعي النيسان*=ترى الوعد جـال زعبيـه
سلم على ربعك القصمـان=وقل من هو اللي يبي الجيه
نبي خباري عروس ان كان=تسمح ظـروف الشقرديـه
العام جيتـه وانـا تعبـان=وكتفي تقـل فيـه شبريـه
صابن حزامٍ مـن النيـران=ناره على الكتـف مطويـه
حتى الطبيب قال لي حيران=ماله شفـى بكـل صحيـه
مالـه عـلاجٍ لـحـد الان=غيـر المهـدي لراعـيـه
جينا الخباري بـلا عنـوان=نمشي على غيـر ردميـه
يسوقنـا يمهـا الرحمـان=نمشـي والاقـدار مخفيـه
وطبيت في طينها فسقـان=وتعلـق الطيـن بيـديـه
وحطيت منه على الامتـان=والكتـف واللـي حواليـه
والصبح اصبحت ماكن كان=بالكتف امراض مـو ليـه
شفيـت واشفانـي المنـان=وعـادت حياتـي طبيعيـه
الحمـد لله عظيـم الشـان=منشي عـروس وخباريـه
ياعزتي لكاشـت الصمـان=ارضه من النـاس ممليـه
تلقى البشر بالفياض الوان=بدوان وحضـر وحساويـه
وتلقى من اهل اليمن وعمان=ومن مصر تلقى وسوريـه
وهنود تلقى بهـا وافغـان=ورعيان مـن دون جنسيـه
والناس فيها تقـل ديـدان=مابيـن راكـب ورجلـيـه
حتى فياضه غـدة ريغـان=غبـرا تقـل خـد بوذيـه
وبالليل كنك علـى بركـان=كلٍ قبس بالمسـاء ضيـه
والبعض ناقص حيا وايمان=يرحـل ويتـرك قواطـيـه
خلوا الزبايل على القيعـان=في كـل الارجـاء مرميـه
وان جيتهم ناصحٍ باحسـان=ردوا بالـفـاظ سوقـيـه
وامنين ماتلتفـت جيـران=صكـوا عليـك الزقرتيـه
محشور في وسطهم بلشان=مالك مـع النـاس حريـه
لكثروا النـاس بالخليـان=خل الخـلا وخـل اهاليـه
وارجع لدارك قرير اعيـان=على الاقل بـه خصوصيـه
مر الحقيقـه ولا البهتـان=قولـي ولا اقـول مرويـه

احمد بن عبدالرحمن العريفي
(نديم المجره)

* الاستاذ / بندر بن سعد القحطاني - لينه
* النقيب / محمد بن عبدالله الجمعه - الدمام

[بروق الشمال]

صح لسانك اخوي
قصيده جزله من شاعر كبير
تقبل احترامي لذاتك

[سعود المسعودي]

صح لسانك يالعريفي مدد بلا عدد


تقبل تحياتي وتقديري ومروري المتواضع





دمت بخير

[حمد الضوّي]

الشاعر المميز/أحمد العريفي


صح لسانك وإعتلا شانك أمتعتنا وشوقتنا للبر بطاروق الهجيني المميز . وكل ماتطرقت له عين الصواب ,,,,,دمت بصحه وعافيه

[صبيح العوض]

هاهو الشاعر الكبير احمد العريفي

كل ماغاب جاب صح السانك على جزالة مفرداتك الراقيه
اتمنى لك التوفيق الدايم
تحياتي

[محمد بن موسى]

احمد العريفي


صح السانك مدد بلا عدد يالغالي

قصيدة رائعه بكل ماتحمل الكلمه من معنى

لله درك

كن بخير

[عبدالمحسن الجلوي]

الله الله يانديم المجرة صح لسانك وتدري ابي ارد على الهجيني لأنه يستثيرني واحن معه للشيبان والايام الحلوة... صح لسانك والله ...