فضفضــــــــــــه 1 ـ 2 ـ 3 !!!

[سعود العواجي]

فضفضه 1 :

الوقت هذا عكس تحقيق آمانيك = نظامه : اسكت وابلع لسانك وعش !

أما تعيش آمير او شيخ أو بيك = والا تصير انسان ماتهش وتنش

كل ماتدور رزق خابت هقاويك = يامدوّر "الابره" وسط "كومة القش"!!

صحيح بان الرزق من عند واليك = لاكن ماقال الزم ذرى البيت او خش

هذا زمن يحتاج لشوي تكتيك = أصلا ً ولايحتاج للكذب والحش

يالادمي لو شلت حملك بيديك = ماينفعك دمك ولا عظمك الهش !

الفقر لو حبله محكم علابيك = آخير من عيشة غنا كلها غش

ودم الكرامه امسكه واحفظه فيك = وش ينفعك لاساح من عرقك ونش

وبعض السكوت أحيان لو طال يغنيك = أبلغ ليا سولفت ثم قيل لك : اشششششش !!

فضفضه 2 :

لاجيت ابرق بالزمان اللي عثرت بدربه = لقيت لي وقت ٍ يشيب بالعيون أهواله

مزيج بين الكذب وجنون الجشع والغربه = والمصلحه بقلوب ناس ٍ بالزمن محتاله

وقت ٍ به الرجال مابلل ضماه بشربه = ولا لقى له لقمة ٍ تسد فم عياله !

لا لد وجهه في شمال الدار والا غربه = ماشاف ياكود الهبوب اللي تصفّق جاله

اهب ياوجه الغدر في عالم ٍ مضطربه = حتى على ظروف الفقير تباشطه برياله

تبذخ ولا في يوم ذاقت جوع والا كربه = والكل منهم ينثر بوجه الحرام .. امواله !

مصيرهم مهما يطول الوقت تحت التربه = في وقت مايشفع خطايا العبد غير اعماله

ياكثر مانبغى السنع والعود شق القربه = ويديه في حلق الخبيث وللأسف ماغاله !!

من بعد ماشكّل فريق وصار راس الحربه = اليوم غاب وغيّب الله هيبته وافعاله

لايرتخي راسه وفيه من الخصال الذربه = طبع الشمالي يحترم قوله وميل عقاله

المشكله دايم يصلّح حالنا ويخربه = والا بلاش من الكلام .. الله يصلح حاله

يفرد حجاجه بس تبقى نفيسته مكتربه = ومن البذخ " ..." يسوى دخل حي لحاله

يكفي "حمام العز " طيّر من يدينا سربه = حتى غدينا نشرب الشاهي بدون بياله

عليك والله في ذرى شيخ ٍ ينومس قربه = اللي ليا ضاقت عليك بديرتك تلجى له

يكفي ليا منك طلبته شي قال : ابشر به = يمشي بوصية جده وعمه وابوه وخاله !!

فضفضه 3 :

مابين "مطرقة الظروف" وبين "سندان الحياه" = في مجتمع ثالث تفشّى فيه قل المقدره

حالة فقر بالوازع الديني تثير الانتباه = فيها الفساد اقدم على طعن الضمير بخنجره

الغزو فكري والشباب اهداف بعيون الطغاه = اللي تجره في دهاليز الخطا وتحدره

واذا التشبه انتشر في مجتمع بأول نماه = لاتندهش لاشفت لك رجال في هيئة مره

مسدل عيونه وصابغ خده ونافخ شفاه = ومحدد حواجبه بالكحل ومطيل شعره

واليا حكى من الغنج عاجز يوصل لك نباه = ومن خف خطواته كأن الارض ماتطيق آثره

ضايع طموح وحلمه الاغبر مايتعدى خطاه = ومي الحيا ماسال في وجهه واذا سال انثره

مفروض لو يحط له شيله ويلبس له عباه = اكرم لو ان الحالتين تعد اكبر مسخره !!

وش موقفه لادقت اجراس المنيه في فضاه = ثم اعلنت روحه بدون انذار في فج نحره

وش موقف امه أو ابوه اللي تهكع في عصاه = كل مالمح نظرة معزي جاه وسط المقبره

الجرح غاير في جسد لازال يبحث عن دواه = وكثر المشاكل ماتعيق اذا الحلول مدبره

الحل باللي يعصي الشيطان ويطيع الآله = ويعفر ذنوبه في ثرى التوبه ويرجوا المغفره

الذنب مثل البحر وايمان البشر قارب نجاه = والدين كل ماينكسر فكر الاوادم يجبره

كل شي بالدنيا يهووون إلا التشبه بالفتاه = الى هنا فكر ٍ يمس أخلاقنا مانعذره !

[هندي المقبل]

اهلا بهذا الهطول الشعري

اهلا بهذا البوح الصادق والمؤثر

شاعرنا القدير سعود العواجي انها فضفضه لايستطيع ان يكتبها الا سعود

وانا امامها لا استطيع الا ان اقول صح لسانك ...

[خالد نزال الجعفري]

صح لسانك يا شاعرنا والله يعجز السان عن الوصف امام هذا الابداع الشعري

تقبل مروري

[بدر الخلاوي]

صح لسااااااااااااااااااااااااااااااااااااااااااااااان ك ياسعود
وبيض الله وجهك ورحم الله والديك
وتقبل مروري المتواضع

[البدر]

سعود العواجي والحضور دائما مختلف بتميزه عن الكل

سعود لله درك وصح الله لسانك على هذه الفضفضه

تقبل مروري واعجابي الشديد

[بدرفهد الجعفري]

صح لسانك وبيض الله وجهك ياسعود

عزالله انك امتعتنا بهذا القصائد المميزه جدا

صح لسانك صح لسانك صح لسانك

[ماجد الغانم]

الأخ الغاالي

والشاعر الرائع

سعود العواجي



صح لساانك ..ولاهنت

هنا حكم ومدرسه شعريه....وتجارب للشاعر متمكن ومحنك

لله درك ولافظ فوك


ماذا عسى أن أقول امام هذا الأبداع

الا صح لساانك واعتلا شانك


سجل اعجااابي

ودمت بكل خير ,..ودام هذا التميز

تقبل خالص تحياااتي وتقديري