ياكثر مارافقت خلان وأحباب..
وياكثر مافي شدتي هملوني..
على كثر ماعدهم ستر وحجاب..
على كثر ماحتجتهم وتركوني..
من صارت الخوه ثمن حفنة تراب..
نفس الوجيه الي نصوني..نسوني..
من غير ذكر عروق..وفروق..وأنساب..
كانوا ثلاثه..والثلاثه جفوني..
علمتهم وشلون الأهداف تنصاب..
ولما سواعدهم قوت..صوبوني..
عشاني اصغرهم عمر..صاروا احزاب..
عشاني اصدقهم قصيد..اظلموني..
الي نجح اسمي زرع فيهم انياب..
حتى النصيحه مابغوا ينصحوني..
دام العطايا عندهم دين واتعاب..
والله لو اطلب ذنبهم ماعطوني..
طالب نصيحه كني مطالب رقاب..
وهي نصيحه..كيف لو زوجوني..
كنت اكتب لنفسي مشاريه وعتاب..
ولاادري ان اللي قروني..قروني..
تضاربت من دوني عقول والباب..
واجد بغوا غيري..وواجد بغوني..
اقبل هدب تسهر على شعري اهداب..
كني حبست رقادهم..في جفوني..
لو شفتهم واحد..يشوفوني اسراب..
من وين مالدوا نظرهم..لقوني..
اثري وجودي بينهم محرق اعصاب..
ومزعل بعضهم من بعض..لو طروني..
ياكبري بعيني..وانا توني شاب..
وأهم كتاب الشعر حاربوني..
حتى ولو يهوي على نجمي شهاب..
يكفيني ان اسمي كبير بعيوني..
كد قال ابوي..ان هبتهم..قول..ماهاب..
لو يقدرونك.. قول..ماتقدروني..
ومدام قبري محتضن راس مرقاب..
على كثر ماتقدرون ادفنوني..
لو ماني بذيب..انهشت عظمي ذياب..
لو ماقدرت اثبت وجودي..لغوني..
لو ماسكنت وجيههم..مت بغياب..
لو ماعرفت امحي ورقهم..محوني..
ماجيت ابدبل كبدهم شعر وخطاب..
لين ادبلو كبد الذي خلفوني..
ياويل وجهي كن للدمع مخلاب..
ماجف ماه
عسى الله يفتح بوجهي ابواب..
تتوسله بالشده يكون عوني..
من كثر ماخفاقها بالدعا ذاب..
صارت تحس ان زملاي كرهوني..
بشرتها..يمه معي ربع واصحاب..
ماني لحالي..واجد اللي يبوني..
من يوم ماحاز قلمي كل الألقاب..
قلطتهم في دفتري وحفظوني..
الله وهبنيهم بني عم...واجناب..
من يوم جيت اعجبتهم..واعجبوني..
واعجابهم فيني مهوب اية اعجاب..
باسلوبي..بشرحي..بطرحي..بلوني..
لو قلت عن نفسي بشر..صرت كذاب..
لو قلت دمي من ذهب..صدقوني..
لو بيدهم كان زرعوا دربي اعشاب..
لو كيفهم يتشبهون..شبهوني..
من كثر ماصاروا من طبوعي اقراب..
حتى بلبسة شمغهم..قلدوني..
واجد دعوني واغلقوا دوني الباب..
وكثار ناس ابكيلهم مابكوني..
لو طالوا الهدني مناسيب واطناب..
كانوا غلاتك من زمان هدموني..
مدام حطوا فيني عيوب وأسباب..
جنبت عنهم..مثل ماجنبوني..
اصلاً لو أن بخوتي شيء ينعاب..
ذبحت نفسي..قبل لايذبحوني..
انا يدي لو ماكست متني ثياب..
نذرٍ علي أقطع يدي من متوني..
مو عيب اجي مدعو..ولاأشوف ترحاب..
العيب لو اني رجعت ثم دعوني..
مادمت اجي..ولايحسبولي حساب..
حرمت اروح..إذا يبوني يجوني..
08/10/09, (05:47 PM)
حامد زيد والصداقة حينما تكون من ذهب ,,,
العرض العادي
