للريح

[الجضيعي]

بسم الله الرحمن الرحيم

للريح وألا جعلها للتباريح =لليل وألا جعلها للذيابه
الصدر يكفيه العنا يا المساريح =والعقل يكفيه الذكاء وللبابه
وأن هجت الخاطر هجوس المجاريح =ودهتها بالصوت ويا الربابة
خيل القوافي تستفز المطاريح=مسروجةٍ بعذب أفنون الصبابة
إلجامها بيدي وتمشي على الضيح=وتقرض زهر فيضٍ وسيعٍ أرحابه
فيه النفل يبيح سره على الشيح=والأرض تحضن ما نزل من سحابه
أسوق خيل القافية بالسوافيح=وأنط فيها ما علا من أهضابه
ألينها جادة بنبض المشافيح=أجروح قلبٍ من عناها تشابه
أجروح قلبٍ للعنا تركب الريح=من كل فج وصوب جتني شذابه
أهموم تخلق للرجال الزحازيح=زاحت على قلبي وزادة صوابه
منها وفيها زادت القلب تجريح=أسيوفها غدر أوفاها حرابه
أحب لا ما أحب مدري وش الليح=أعشق شموخ وكن عشقي أنهابه
ما قول أحب المترفات المصاليح=اللي يحفظن الرجل في غيابه
غيدا لها بالقلب وردٍ مفاليح=متسابه فيها المعاني سهابه
ما كنها ألا ضيح نور المصابيح=فيها شموخ وكبرياء ونسابه
أن سلهمت تأمر على القلب وتبيح=معذور قلبي لو يزود أنسهابه
اللي بها خيل المعاني مجاميح=خيل الجمال وخيل زود المهابة
متخالط ثلج بجمرٍ مطافيح=وداجي سواد الليل بأخر ذهبه
هذي لها بالقلب بعض اللواليح= لا شك ما شبت بقلبي شهابه
أفهم كلامي يا بعيد المشاويح=بعض البشر ياخوي لا واسفابه
ما كف أنا المعروف ويدي مطاويح=ولا جب أنا حبل الصداقة أجبابة
طبعي وطبع الغانمين الطحاطيح=ما اقيف في وجه الزمن بنهضابه
الحر حر وينجذب للمراويح=والكلب ينجس فيه حتى لعابه
وألا الضعيف عادته دايم النيح=ما شره عليه ولا أحتسب له حسابه
أدري غريب وكلمتي كلها فيح=فايح شذاها بالوفاء والغرابة
دامي بطيح ولا تحيملت بطيح=أطيح غدر ولا تطيح الذرابه
دام الذرابه ترفع الصوت وتصيح=والقرب ضيع مذهبه وسط غابة
ومزهب هل الطولات يشكي من التيح=وسيف المعزة محكمٍ في جرابه
والوقفة اللي ترفع الرأس وتريح=صارت كسابه والمراجل كسابه
لا صار ميقافك مع الحق تمييح=أما معي ولا عدوٍ نهابه
مالي ومال مكثرين التمازيح=أهل الوجيه اللي تشوف الشقاء به
الغدر والصدق المصنع تصاريح=والجود يكره والعفن يحتذابه
الوضع يأهل العرف يحتاج تصحيح=وش جاب فارس للنبي والصحابة
أقول دام الجود مدفون وذبيح=وشلي ومال السالفه الغرابه
يا جعلها للريح وأعتى التباريح=أو جعلها تبقى وتبقى الذيابه

[محمد خلف الزايدي]

أخي الجضيعي المحترم,,

صح لسانك وإلى الأفضل من جديدكـــ المكنون
سلمت اناملك وبوحك الرائع

تحياتي لك وللجميع

[نواف ابن ثويني]

اخي الجضيعي صح لسانك وعلى شانك

امتعتنا بهالقصيده الجميله والابداع المنقطع النظير

الجضيعي ننتظرجديدك بلهفه وشوق

الجضيعي اكرر صح لسانك

[الخاطر]

الجضيعي.
انت شاعر متمكن ومبدع الا مالا حدود.
نص جزل من شاعر جزل.
جميل كل ماحتواه هذا النص من معاني وصور بالغه.
صح لساانك وعلا شانك ودمت بكل الخير.
اخوك محمد العنزي.

[عمر الطويلعي]

الجضيعي ,,, صح الله لسانك لا هنت

نص جميل من شاعر متمكن ,, سبق وأن قرأتها لك وما زال المطلع عالق معي وأرددهـ دائما

للريح والا جعلها للتباريح لليل والا جعلها للذيابه

صح لسانك يا المبدع , تحياتي وتقديري

[عوض بن خميس]

الشاعر الجضيعى
سلمت وسلم لسانك
نص جميل
تحياتى اخى ولا عدمناك

[مزيد المزيد]

الجضيعي

سلمت يمينك وصح لسانك على هذه القصيده الرائع وكلمات بالصميم تستحق القراءه

للريح وألا جعلها للتباريح // لليل وألا جعلها للذيابه
الصدر يكفيه العنا يا المساريح // والعقل يكفيه الذكاء وللبابه



دمت بكل خير