قصائد للشاعر العملاق سعود الايداء

[احمد الرسلاني]

الشاعر سعود محمد الايداء

احد الشعراء المتميزين اللذين اهملهم الاعلام مع الكثير من الشعراء من قبيلة عنزه

وانا صراحه ما اعرف سعود معرفه شخصيه ولكني من اشد المعجبين في هذا الشاعر

شاعر نظم وشاعر قلطه رغم صغر سنه الا ان قصائده مليئه بالحكم تجعل من يقرأها يعتقد بأن عمر الشاعر فوق الستين عام

لا يسعني الا ان اضع لكم بعض من قصائد هذا الشاعر

1
ليتنـــــي ماكنـت مجنونـك

ياناكر الملح والعشره علـى هونـك=لاتحسب الجرح ضيق خاطري ساعه
صرت ابتسم لاجل ماتهزمني عيونك=لو كل لحظه تمـر الـروح نزاعـه
ياظالمـه ليتنـي ماكنـت مجنونـك=عشق عصاه الزمان وخاطري طاعه
وياليتني شخص ماله قلب ويصونـك=لااجرحك مع كل صرخة قلب ملتاعه
وليت البشر كلهم مثلـي يعرفونـك=كان اعرفوا ليش نفسي منك مرتاعه
عاشق نفـاه الزمـان ولاذ بركونـك=ومن الندم عظ بشفاته على صباعـه
هاك السهر يوم نام الليـل بجفونـك=وانا اتهجى السنين بعقـرب الساعـه
تقرحت شفتااي...استبشـر مزونـك=تبل قلـب همومـه تلـوي ذراعـه
ياوقت كم قلـت هملهـم يعرفونـك=ياشـاري عزتـه والنـاس بيـاعـه
شفني ثلاثين مـره قلـت اباخونـك=لكن عزوم الرجال أحيـان خذاعـه
ياما الياضاق صدرك قلـت ياعونـك=واجيك لو دونـك العربـان فزاعـه
لكن فضحك الزمان وبـان مكنونـك=وقلب خذلته نسـاك وبـدل اطباعـه
وخذها وعد مثل مابالغـت بطعونـك=لاابيعك بلاثمـن دام الهـوى طاعـه
أرحل وخل الطعون لصدر مظنونك=وانا على عزة اللي ساتـر اوجاعـه
مريت مثل النعاس ان مـر بعيونـك=واقفيت مثل الشقا بعيـون مرتاعـه
واذا على الحب انا ماعدت مفتونـك=حبك خلاص انتهى من بعد هالساعه
والا العمر راح اعيشه فيك وبدونـك=ماني بمجبور اجامل نـاس خداعـه

2-

عزيــــــــــز الدمــــــــــع

عزيز الدمع لاطاح ومعـاه أرواح تشبـه نـاس=ربوا مثل اليتامى يسرقون الطيـش مـن عينـي
على المنفى حسافه كان جفني حولهـم حـراس=مثل وجه الدخيل ان جا من اقصى الناس ناصيني
عزيز الدمع لابـل الكفـوف وسيـل الكـراس=سوالف من حنين عـاش فينـي واندفـن فينـي
هما مثل المطر لااسقى عروق العسجد اليبـاس=وانا عطشان اموت الفيـن مـره بينـي وبينـي
أنا يالدمع لو شحيت بك ماجدت بـك باحسـاس=أشوفك رغم ماتهـوى انكسـاري شـي تعنينـي
معي حسبة وصاه وزود همه ماتعـرف اليـاس=عليهـا قلبـي اللـي ممتلـي طيبـه موصينـي
عليك من الملامه مانزف حبر وروى قرطـاس=وعلي من البيـاض اللـي مـن الدنيـا يكفينـي
أبيك اليا زفرك الوقت غـي ولاشهقـك اليـاس=اتعرف الحاجه اللي لاسـرى الهاجـس تبكينـي
مهي جمله على متن السطر تخرج عن الأقواس=غمامه ترتحل بـي مـن هنـا لآخـر عناوينـي
مثل ماتنبش جروح المواجـع حرقـة الأنفـاس=إذا مـر بعتـيـم الـذاكـره شــي يبكيـنـي
ثنين اليا تلبسنا السهـر يسـري بنـا الهوجـاس=على ذاك المكان اللي سرقنـي أجمـل سنينـي
عطيته من تناهيدي كثييييـر وقلـت لـه لابـاس=عساه اليا اليـا ذكرنـي بعدهـا يقـدر يعزينـي
على عزة فقير وصبر عاجـز وانكسـارة بـاس=وشـيٍ كـم تمنيتـه ولاوصلـت لـه يديـنـي
عزيز الدمع طاح وداخلـه روح وبقايـا نـاس=مثل ماأغلى جروحي عاش فيني واندفـن فينـي

صـــــبرك علي

صبرك علي؟ خل الزمن ياقف على ساق وقدم=والله لترجع لي ذليل النفس مكسـور الجنـاح
دامك رضيتي بالمذلـه لـي ونزلتـي العلـم=اللي رفعته فوق هام السحب وادراج الريـاح
اندم كثر حب الثـرى ماعـاد ينفعـك النـدم=جمع شتات اوراق حب ضيعه نـور الصبـاح
ابعد وناظر من ورى الجـدران حـب منهـدم=وان صاحت الجدران تبكي لا تشاركها الصياح
انت السبب واللي محيت الفرحه اللي تبتسـم=بغرورك اللي يقتل الفرحه ويرمـي بالرمـاح
وش عاد باقي مابقى بالكـون شـي ينرسـم=الا{ خناجر} تهتف وتحمـل بقايـا حـب راح
الله يادنيا العجب كم فيك مـن شخـص ظلـم=وكم فيك من مظلوم عاش الذل بالعثرات طاح
ياما بكيتك دمع؟ وجروح؟وجفا غربه؟ وهـم=وياما هدب عيني عليه الدمع من فرقاك ساح
الى متى وانا ارسم وجيه الحقايق من عـدم=والى متى بتبقى معاناتي معك هـم وجـراح
ان جيت لك باصل الحقايق صرت بعيونك وهم=وان جيت لك كلي وهم عقد الحقايق منك طاح
واصبر الى من الزمن ياقف على ساق وقـدم=تعيش عمرك بالمذله طير مكسـور الجنـاح

4-

ضيـــــــقة اليـــــــوم

خلينـي ارقـد ياحنـيـن الامـاكـن=مبطي وانا من هالمكان اطلب.. النـوم
هذي سنه جرحـي بالاعمـاق ساكـن=وانا مشرد ضايـق البـال.. مهمـوم
ياعيونـي الدنـيـا فرح..لاتبـاكـن=دام الشقا من بين هالنـاس.. مقسـوم
ماهو خطاي الدمـع ..هـذا خطاكـن=لاني تعبت امشي وانـا اطيح..واقـوم
ماقـدرت صـدق النوايـا وفـاكـن=لومارضيتن لي على ضعفـي ..اللـوم
وياالمقبلات من العمر...وش وراكن؟؟.=عشان ابيح اللي ورا الصدر..مكتـوم
هاليـوم هـذا بيـن الايـام داكــن=رغم انتصاري..طحت بيديه مهـزوم
دايم..يضيق بوجهـي الكـون لكـن..=ماعمرها ضاقت مثل ..ضيقـة اليـوم

غــــــربة الأيام

بامـان الله ياوجـه فقدتـه مـن ثـلاث أعـوام=عليه النفس باتت مـن ضيـاع البعـد مقهـوره
بامـان الله ياصـوت مسافـر والـدروب هيـام=غيابه عن عيوني ماطرى في ساعـة حضـوره
قسـم بالله لـو يبكـي قصيـدي دمـع ماينـلام=حروف الشعر منهيـه علـى حبـك ومآمـوره
حضنتك حب صآدق ماتجـود بصدقـه الأحـلام=وفقدتك للأسـف حـب فجعنـي تالـي شعـوره
تعبت.أنزفـك شعـر ماتطاوعنـي بـه الأقـلام=تعبت. أرسمك دمعة عشق طاحت غصب مجبوره
وأنا كل مالمحت بهالمدى الكذاب ضـوح أوهـام=أسج بحلمـي العابـر علـى هالطيـف وآزوره
تمنيت الرحيل وخطوتـي حـارت بهـا الأقـدام=تحملـت العنـآ يااكبـر عنـآ صلبـه وبلـوره
هجير الوقت خلى فرحتي في هالزمـآن حطـام=عبايـر غربتـي بأجفانـي الخـدرات مقبـوره
كفآني من زمآن الـذل ماحاشـت لـي الأقسـام=تجيني منك؟ ولا من زمـن هالغربـه وجـوره
أجيك من الغلآ مثل البشآيـر فـي يـد الأيتـام=وأروح ولا معي غيـر النـدم وأوراق منثـوره!
أنا وش جابني لك من مواطن غربتـي؟ مـادام=همومي هي همومي بالزمـن والحـال مستـوره
أغيب أحسن مدام الغيبه لنفـس الكريـم إكـرام=تخيـرت الفـراق ولا بقـآي بـروح مأسـوره
أنا رآحل وأشوف العمر رآحـل والشقـا قـدام=لحضن ضمني مـن هالظـلآم ولابـدى نـوره
وقبل لاارحل دخيلك شف غلاك بوجهي المنظـام=وخذ حزني معك ذكرى غرام ..ونفـس مقهـوره
رحلت وعن عيوني سافرت بك (غربـة الأيـام)=وبقت لك بين عيني والدموع الحآيـره (صـوره)

ســـــــــالفة توطيـــــــــــــن

سهارى ياوسن رش النعاس بهجعـة الغافيـن=على ليلي توسدت الطعون وصحـت ياليـلاي
أناجيتك علي من العنا لمحـه ودمعـة عيـن=بكيت ولا احسب اني يوم جيتك ترخصين بكـاي
اباغفى بين مرباع العبيـر وظاميـات التيـن=واببكي لين من دمعي تجيبيـن أولـي واتـلاي
اباادفى كم لحفت البرد من عمر الزمان سنيـن=وابااحكي قبل تغتال السوالف ظاميـات شفـاي
بعيشك من صباحات الكرز لين الغروب يحيـن=واموتك لارحل وجه الشفق واسستوحشت دنياي
أبوس الوردتين اللي يداعبهـا النسيـم بليـن=واضمك لين ترقد بين نشوة حضني ومركـاي
حزين اليوم اببكي بس اخاف انك معي تبكيـن=وانا اللي لابكيتي دمعتك جابتني مـن اقصـاي
أنا يامترفه عاشـق تحـداه الزمـان الشيـن=عزاي إن الصراحه نظرتي وان الوفـا مبـداي
مواطن ماعرف معنى مكان وسالفـة توطيـن=متى ماملني هذا الثرى رحـل اسـج خطـاي
فقيـر ماملـت الا الكرامـه والوفـا والديـن=تلحفت الصبر حت غـدى سجادتـي وغطـاي
دخيلك دثرينـي وان تركتينـي بـروح لميـن؟=فقدت احبابي وللحين باقي في وجيـه اعـداي

هذا مااستطعـــــت جمعه
من قصـائد
سعـــــود الايداء
وأعلـــم أن لديه الكثيـر
من القصـائد الرائعـه
لكم ودي

[نافع عيد الجديد]

الاخ العزيز احمد الرسلاني

صح ا لسانك والسان الشاعر سعود الايداء

قصائد من اجمل القصايد


لاهنت على الاختيار المميز


لك الاحترام واتقدير

[سعوط المجانين]

شهادة حق انه شاعر جزل وهذا الشي يفرح حقيقه

لاتحرمنا من جديده يالرسلاني

[طلال الايداء]

سلمت انااملكــ

اخوووي احمـــد

ومن جد نصووص رااقيه شاامخه كعاادتة كاااتبهااا


واتمنى من كل قلبي ان تمتعنااا بنصوصه البااقيـــــه

وصح لساانك ولساان كااتبهاااا


ودمتم بالموده

اخوكــ طـــــــــــــــــــــــلال الايــــــــــــــــــــــــداااء

[عـبـدالله الأيـــداء]

احمد الرسلاني

كل الشكر لاقلام تبحث وتنصف الابداع سعود محمد الأيداء شاعر مدهش للغايه

اذكر من ما اذكر

تباطيني سفر دام الغياب يعلم الغالين

لو بعض الحضور ان ما نقصني ما فضح شكواي

لمحتك في تفاصيل المرايا والخزف والطين

على اغلفة الهديا والصور ووسادتي واشياي

وبساط من الخزف والعاب مصنوعه من الفلين

و على ولا على ولا على تدرين ويش الراي

تعالي واحذفي من عمرنا اللي فات عشر اسنين

ونعرف قبل عشر سنين ويش كنا ويش الجاي

ومن هذا النص العملاق

مواطن ماعرف معنى مكان وسالفة توطين

متى ما ملني هذا الثر رحلت اسج اخطاي

والختام مع هذه الموسيقى الرائعه

دخيلك دثيرني وان تركتين بروح لمين

فقدت احبابي وللحين باقي في وجيه اعداي

وهنا قامه اخرى من نصوصه المدهشه اذكر منها مقتطفات

ياناكر الملح والعشره على هونك

لا تحسب البع ضيق خاطري ساعه

صرت ابتسم لجل ما تهزمني اعيونك

لو كل لحظه تمر الرو ح نزاعه

عاشق نفاه الزمان ولاذ بركونك

ومن الندم عض باشفاته على اصباعه

هاك السهر يوم نام الليل بجفونك

واتركني اقراء الوجيه بعقرب الساعه

مريت مثل النعاس ان مر بعيونك

واقفيت مثل الشقا بعيون مرتاعه

يا وقت كم قلت هملهم يعرفونك

يا من شراء عزته والناس بياعه

اخــي احــمد الرسلاني

احيي فيك روح الانصاف الادبيه

تقبل مروري

[سعود المسعودي]

الاخ العزيز احمد الرسلاني

صح ا لسانك والسان الشاعر سعود الايداء

قصائد من اجمل القصايد


لاهنت على الاختيار المميز


دمت بكل خير

[الصقار]

لاهنت على الاختيار الرائع

قصائد تستحق النقل والاعجاب

تسلم

تحيااااااتي