× عـــ آلمجنون ـــالمي [] و آنا بكيفي {} - الصفحة 3 - °~*¤®§(§ شبـــكة ويــلان العـربـيـه §)§®¤*~ˆ°

**مازن الفهد** · 11/08/10, (02:07 PM)

.
الهنود ما ينقدون على أفلامهم ..
تابعت فلم هندي .. و آخر الفلم المجرم يصير أخو الضابط ..
و فلم ثاني .. قائد عصابه و عنده ثلاثين مجرم من عصابته و آخر شي يكتشف ان واحد منهم ولده بعد اربعين سنه خخخخخ
أحس الهنود يستعبطون علينا ..
يا حظ المخرج الهندي ما يبلش .. آخر الحلقه يموت المجرم بأي طريقه .. لو يغص بفلفل .. أهم شي ان الفلم ينتهي ..
لا .. و مضارباتهم .. على باله مطبقين المضاربه صح .. الواحد يمد يده و بينها و بين وجه اللي يضاربه 10 أمتار و اتفاجأ .. انه يطير لآخر الشارع .. و المشكله إذا جته طلقه على كتفه تلقى الدم على رجله .. كيف جت ما أدري ؟
.
و تابعت فلم عن حرمه فقدت الذاكره لأنها طاحت على راسه من مبنى لأنها شافت حبيبها و تبغى تلحقه .. أهم شي تفرقوا عيالها و هم صغار .. واحد أخذته معها و واحد عطته جارتها هديه ( هذا الكرم ) و بعد 50 سنه العيال يتعرفون على بعض ( ماهيش و راجيش ) و أخيراً يكتشفون إن سواقهم يطلع أبوهم .. و العجوز لها 50 سنه فاقده الذاكره .. و لما شافت رجلها بعد هالسنين .. سبحان الله رجعت لها الذاكره .. و أول ما شافته قامت تغني ..بس تعجبني الافلام الهنديه .. الأحداث كلها ما تجي 10 دقايق و الباقي رقص و أغاني ..
.

**مازن الفهد** · 11/08/10, (03:35 PM)

اعجبني الكاريكاتير ..
بس وش قصده بها ..
طبعا واضح .. و كل واحد راح يفهم ..
آآآآه يالقهر .. حتى الحمير تحتقرنا يالبشر ..
بس ما ألومها ..

**مازن الفهد** · 12/08/10, (02:52 PM)

اعجبني موضوع بالمنتدى العام ..
اللي كتب الموضوع جائز المليحان و عنوان موضوعه ( هل نميل للقلم ) ..
و انا بتكلم عن موضوع ثاني ( شوفوا الشطحه .. طيّب وش دخل جائز ) ..
لأن موضوع يسحب موضوع.. مثل سوالف جدي .. يسولف عن التمر و النخل و فجأه ألقاه يسولف عن البعارين و الخيل ..
أحس أحيانا ان جدي يستهبل و تمسك معه غلط ..
المهم ..
.
.
.
.
.
.
.
.

ليه ما اقدر ادخل قسم وسع صدرك قبل ما أكمل 100 مشاركه ..

**مازن الفهد** · 12/08/10, (04:07 PM)

ابشركم ..
و أخيرا بعد عناء و مشقه .. سمح لي المفتش ادخل قسم وسع صدرك ..
لا و معطيني الدرجه الممتازه .. يقول انت معك 8 نقاط زياده ..

**مازن الفهد** · 12/08/10, (05:02 PM)

امس العصر اتصل علي ( صايل ) ولد عم ابوي بس رضاع .. و قال يا بو فهد نبي نلعب مباراه الليله بملعب على كيفك .. اتطاردبه الحمير .. قلت و شو .. قال اتطاردبه الخيل .. قلت اشوا .. قال هاه وش قلت .( بيني و بين نفسي قلت يا ربي لك الحمد .. توك تلعب كوره يوم جاء رمضان ) .و طبعا أنا فكرت و لقيت اني فاضي و عطيته كلمه .. قلت : تم .. و لو عندي شغل أفضي لعيونك ( وربي لو عندي شغل ما جيته ) .. المهم .. جت الساعه 11 و أدق على صايل .. يا صايل الملعب و ين مكانه .. و هو قاعد يوصف المكان .. مريت من عند حارات .. لو معي ددسن ما دخلت مع شوارعها .. و الرجال يمين يسار فوق تحت.. لين وصلت الملعب .. و افتح عيوني .. الملعب صغير .. و ما فيه اضاءه .. على لمبة الشارع .. و أرضية الملعب يا ساتر .. لو تدخل السياره كان يصيبها قطع بالرباط الصليبي ..
شوفوا شكل صايل و هو متشنطح بالملعب ( على فكره هذا قبل نبدا المباراه .. انهد حيله .. )

يا حليلك يا صايل .. اسمح لي بحش فيك هنا ..
صايل رغم وزنه لكنه شاب طموح و يعجبني فيه انه شايف نفسه حريف كوره و هو من جنبها .. و لازم يجيب معه بين الشوطين همبورغر و عصير عائله ببسي .. و فيه حركه و ربي ما يدري عنها رونالدينهو .. ما يطبقها إلا صايل ..
.
و طبعا شلة صايل لزموا عليّ اصورهم بس و الله من قرادتهم هالصوره ..

آخر واحد يسار هذا أخوه فهيد .. حبيب بس شرس عند اللزوم و اللي جنبه أول ما شفته قلت سواقهم البنقالي بس طلع حامد ولد خال صايل و اللي جنبه حكم المباراه اللي و الله لو يدري له خليل جلال كان أعلن استقالته .. هذا ولد خال صايل بعد و اسمه رمزي و اللي جنبه سليمّ أخو حامد .. و شوفوا ماسك الكوره على باله بيليه و الا مارادونا ..

**مازن الفهد** · 13/08/10, (03:58 PM)

استغرب ..
و على فكره استغراباتي كثيره بس هذي وحده من استغراباتي ..
فيه دردشه بالجوالات اسمها تشاتي و الثانيه اسمي .. بصراحه مدري وش قصة هالناس عليها ..
جلست مع واحد من الشله اربع ساعات و هو مدنق على جواله و يضحك و يكتب رساله و يرسل و انا قاعد اتفرج عليه ..قلت يا وافي وش عندك بهالجوال .. لي اربع ساعات ما سولفت علي .. قال دقيقه .. و قاعد يرسل .. المهم مشيت .. و من بكره سألته .. قال .. هذي خويتي .. اتراسل انا و ياها بالدردشه اللي عن طريق الجوال .. قلت .. شايفها .. قال .. لا .. قلت .. سمعت صوتها ... قال .. لا .. قلت .. غبي .. تراسل شنب يا وافي .. قال .. اسلوبها اسلوب .. بنت .. قلت .. اطلب منها رقم الجوال .. أو قل بقطع الرسايل .. قال .. خلاص .. المهم .. طلب منها رقم الجوال و أرسلت له .. تقول آسفه .. ما أقدر إلا إذا أرسلت لي بطاقة شحن .. و المسكين حتى المكافأه ماهي عنده .. و تسلف من أخوه 10 ريال و أرسلها البطاقه .. و المصيبه .. غيرت لقبها بالدردشه ..
و جاني يشكي .. قلت احمد ربك اللي شحنت 10 ما شحنت 100 ..
و قبل اسبوع .. قلت بشوف .. ردود فعل الشباب الله يهاديهم .. و سجلت بالدردشه .. بس اللقب ( دلوعة الدلوعات ) خخخخخ أدري مو لايق ..
المهم ما امداني انزل الجوال إلا و الرسايل .. و اقروا معي رسايل الشباب ..
1- ذيب يعوي ( هلابك يا دلوعه .. انا ؟؟؟ و عمري 23 و ساكن بالرياض و راتبي 6000 و سيارتي لكزس و حاب اتعرف )
خخخخخ يقطع ابليسه و الله بغيت اعطيه وجه لما قال سيارته لكزس ..
2- حبيتها و انحاشت ( ارررررحبي .. و الله ان معرفة مثلك و شرواك تجيب المطر .. أنا شاب وسيم و الدنيا رخيصه عندي .. و احب اتعرف عليك يادلوعه .. وش قلتي ؟)
هههه من شفته ماد حرف الراء و انا غاسل يدي منه ..
3- ونيت ( السلام.انا وحيد بهالدنيا و مالي صديق و حبيت تكونين صديقتي و اوعدك اني راح أوفي معك.بس عطيني مجال اعرفك على نفسي و اذا عرفتيني ماراح تندمين.معك سامي.22سنه.)
الله الله .. حزنت على شانه .. و المصيبه بحثت عن الرسايل من جهازه لقيته مرسل 33 رساله .. الله اكبر هذا اللي لحاله ..
4- شقردي وردي ( احم احم .. وشلونك يا دلوعه .. معك شقردي الوردي و حاب اتعرف عليك اذا ماعندك مشاكل .. و شو اخبارك ؟)
اوخص ياللبناني .. شو اخبارك .. و الله لو ابحث عنه ألقاه منطوي تحت ظل طلحه ..
5-فنان.مجهول ( مساء الخيرات .. كيفك .. ودي اتعرف عليك .. ردي لي ..)
ماشالله واثق اني برد له .. بس شكله محترم ..
6-رومنسي.منسي ( يابنت وشرايك تعطيني وجه .. و الله اني غادي و لالقيت لي احد يونسنس بغربتي )
لا و قال رومنسي .. ياولد أنت وين و الرومانسيه و ين ..
7- ولد أبوه ( )
مرسل رساله فاضيه .. يجس النبض .. هذا الاسلوب ..
8- كرااااش ( طق طق طق تسمحين ادخل يادلوعه .. و الله انك على اسمك دلوعه .. ممكن نتعرف ..)
هههههههه على باله شايفني .. و الله من الدجه ..
9- snow ( صباح الخير .. شو اسمك يا حلوه .. حابين نتعرف ع بعض )
ياويلي .. وش هالناس .. على باله اني مصدق انه لبناني ..
10 - كوماندر( اسمي فهد و ابي وحده حلووووه مثلك .. و انا عاقل ماني من اهل الحركات ..)
بصراحه شككني الولد هذا .. اذا منت من اهل هالحركات وش فيك مرسل ..
.
و عندي اكثر من كذا بس ابختصر الوضع ..
أحيانا أحس ان العالم تستهبل من زود الغباء ..
.

**مازن الفهد** · 14/08/10, (12:40 AM)

ناس تتمشى على البحر و ناس تتمشى ع الرصيف و ناس تتمشى على الزفلت ..
و ناس لابسه حذيان جري و ناس لابسين نعول سبورت و ناس نعولهم العاديه ام عشر ريال و ناس للأسف حافين ..
.
مدري كيف طرت بس .. الناس منازل و مراتب .. و مكانات ..
ناس تستلم 850 خخخخ مكافأتنا .. و ناس 1000 ريال مكافآت العلمي .. و ناس 1500 سكيورتي حقين البنوك و الشركات .. و ناس 2000 و ناس 3000 و ناس و ناس و ناس ... و ناس 15000 و ناس 20000 ....
ناس تصيّف بلندن و ناس في باريس و ناس في كوالالمبور و ناس ... و ناس تصيف في الباحه و الطايف و عسير .. و المشكله ناس ما تروح لا يمين و لا يسار .. ليش ؟؟ لأن المسكين مرتبه ما يكفي أو ما عنده راتب من الأساس ..
.
المصيبه .. اذا قعدنا نستغل اصحاب الرواتب الضعيفه على شان مصلحتنا و حنا مغنينا الله ..
اعطيكم مثال ..
.
حمد صارت عنده ظروف و ضروري خلال يومين لازم يوفر 4000 ريال .. و المشكله مالقى أحد يسلفه .. راح لواحد من اللي يقصدون صابون .. المعروف 5000 و المكسب 2500 و الاقساط 500 .. قال راعي المكتب .. المكسب 3500 ريال .. حمد ماقدامه الا انه ياخذه ..
و مره من المرات اشترى خالد جوال بالتقسيط .. طبعا قيمة الجوال 1800 ( بلاك بيري يبغى يرز عند الزقرت ) و كل شهر اقساط 400 و المبلغ الكامل 3600 ريال .. يعني القيمه دبل ..و المسكين أخذ الجوال .. و المصيبه العظمى انهم ألغوا خدمة المسنجر ( لولاي ماسك حلقه و الا كان منتحر زمان بس دبرت له ملف بمستشفى شهار و أبشركم رقم الملف مميز ) ..
.
الله لا يحدنا على هالاشكال .. و الله بعد ما جيت أعز الناس محتاج 200 ريال و ردني و انا غاسل يدي من الكون كله ..
معك ريال تسوى ريال .. و الله توي عرفت قدر هالكلام ..

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري