نتائج المسابقة الرمضانيه للشعراء لعام 1432هـ

[هندي المقبل]

مشاركة الشاعر حمد الضوي الحاصل على وسام المركز الاول

المرحله الاولى

هل رمضان وكل مُسلم تهيّا=لعبادة الرحمن رب البرايا
شهر التسامح بالحساني مليّا=بصيامه الصدْقات تمحى الخطايا
فيه يتقرّب كل عبد ٍ تقيّا=يرجو عفو ربه عظيم العطايا
وفي فاقة الفقري يحس الغنيّا=ويعطف على المعوِز وينفق زكايا
يابخْت من يجعل به الليل حيّا=يوم الكسالى بالمراقد غفايا
خذها نصيحه ياللبيب الذكيّا=وافتح سموعك وانتبه للوصايا
إغنم لوقتك دام جسمك عفيّا=فرصة عمر للغافلين اللهايا
وأخلص لوجه الله في كل شيّا=وسدد وقارب والعمل بالنوايا
تنجا بيوم ٍ طايل ٍ سرمديّا=يوم ٍ عظيم ٍ به تبين الخفايا
وتكشف سراير كل بير مغطيّا=والخلْق محشوره حفاة ٍ عرايا
وإما سعيْد تصير وإلا ّ شقيّا=يالله عسانا في سعد لا شقايا
برفقة محمد بالمقام العليّا=نشرب من حياض الرسول الرهايا

المرحله الثانيه

بالأمس شهر الصوم نوّخ ركابه=واليوم شهر الصوم يعلن شديده
ياعزتي للي رحل مادرابه=وغيره من الحسنات زوّد رصيده
وعيد الفطر شارف هلابه هلابه=يالله علينا كل عام ٍ تعيده
العيد بالأسلام ماله مشابه=له ذوق غير وله مزايا عديده
يلبس به المسلم جدايد ثيابه=ويعيش فرحه من سواها فريده
عيدين سنّه للنبي والصحابه=لاعيد يوجد غيرهن بالعقيده

========================

مشاركة الشاعر عبدالرحمن الجابري الحربي الحاصل على وسام المركز الثاني

المرحله الاولى

ياهاجسي شد الركاب وخل لك قسم وسهم=بين الرجال اللي تسابق للمعالي كل حين
اكتب بيوت الشعر وارفع من طموحك والهمم=والله يوفقنا ونرجع ياهجوسي فايزين
وأشهد إن الفوز الأعظم والمكاسب والأهم=إنا بلغنا خير الأشهر يارفاقي سالمين
يا مرحبا بك يا ارْمضان عداد ما خط القلم=ضيفٍ جميع المسلمين قلوبهم لِهْ فاتحين
تِفْتَحْ بهْ أبواب الجنان الخلد والرحمة تِعم=ويصك باب النّار ويصفّد به إبليس اللعين
شهرٍ به الغفران والتوبة لمن نفسه ظلم=شهر العبادة والتكاتف خوّة الدنيا ودين
شهر العطا والجود والخيرات ذا شهر الكرم=فيه نتسابق بالعطايا رحمة الله طالبين
بِهْ ليلةٍ من صام فيها وقام عز الله سلم=هي ليلة القدر الفضيلة خير من كل السنين
الصوم في هذا الشهر له لذّة ولون وطعم=يجمعنا بأحبابٍ وأقارب من يسار ومن يمين
وإليا أذّن المغْرٍبْ تشوف بعينك أصناف النّعم=أرزاق من عند الإله الفرد رب العالمين
وإليا حضر وقت السحور نخاف كله من وهم=إن المؤذن أذن وحنا ما زلنا جايعين
طالبك ياللي مالك أمثالٍ ولا غيرك رحم=تعتق رقاب عبادك اللي لأجل عفوك صايمين

المرحله الثانيه

العيد ياحلوه ومحلى لياليه=في كل عامٍ له تواجد وميعاد
كلٍّ يدوّرْ بهْ عزيزٍ ومغليه=ويقول بالخيرات يا جِعْل ينعاد
وكلٍّ يدوّر به حبيبٍ ويهديه=عيديّته باللي بها خاطره جاد
وأنا تعبت أنادي الخل وأرجيه=وأرسل له أشواقي ولكن مافاد
واليوم جيت بصادق الود أهنيه=كل عام وانت الخير يا رمز الأعياد
عيديّتي شوفه وذكره وطاريه=وعيديّته حبٍّ بالاشواق يزداد

=========================
مشاركة الشاعره بنت راشد الحاصله على وسام المركز الثالث

المرحله الاولى

موسم حصاد وموسم(ن)للتجارة = وموسم تزيد أعمالك الصالحاتي
هل رمضان وبارك الله مزاره = وانزل به القرآن وهدي(ن) ثباتي
من قام ليله ثم صام بنهاره = تكتب له الحسنة بعشر حسناتي
ويضاعف الله حسنته باقتداره = ومنزله بآياته المحكماتي
رب(ن) رسم للكون خطة مساره = وبلغ عباده في حبال النجاتي
في منهج الإسلام صدق ومناره = ومعزت (ن) بالآخرة والحياتي
من يرزق المحتاج ممن جواره = وقام الصلاة وثم يوتى الزكاتي
وصام رمضان وناجح باختباره = به ليلة (ن)ياهب بها المكرماتي
كل يعد خطاه يبغى الصداره = وأنا طلبتك رفعتي يا غناتي
ما هان عبد(ن) يرفع الله وقاره = يا الله ترحمني وترحم أمواتي
وصلوا على المختار بأزكى عباره = على النبي سلامنا والصلاتي

المرحله الثانيه

عسى يعود العيد في عز الاسلام = وعسى الفتن والتفرقة ماتعيدي
للعيد بهجه والطفوله لها احلام = وحنا انتليها في خضم القصيدي
ناسً تقتل بااليمن واوسط الشام = وشلون نفرح لا لبسنا الجديدي
وشلون نفرح والجسد غادي أقسام= ومقسمينه بالفشق والحديدي
الشعب توه صاحين عقب مانام = والي على السلطة عتيً عنيدي
ناسً تقطع بالاواصل والارحام = وكلً يقول لزمرته ياالشهيدي
يارايت التوحيد رفي لقدام = وياجعل عمرك ياابو متعب مديدي
انتم حمات البيت عسكر وخدام = والشعب حبك وانت رايك سديدي
رفعت اهل العز يا حبر الاسلام = وكل القبايل دمهم بالوريدي
صلاة ربي والتحية له ختام = على نذير الخلق يوم الوعيدي